پھولا شفق سے چرخ پہ جب لالہ زارِ صبح

( 1)

Phoola shafaq se charkh pe jab lalaazar-e-subh

Gulzaar-e-shab khizaan hui aayi bahaar-e-subh

Karne laga falak zar-e-anjum nisaar-e-subh

Sar garm-e-zikr-e-haq huey taa’at guzaar-e-subh

Tha charkh-e-akhzari pe rang aaftaab ka

Khilta hai jaise phool chaman me gulaab ka

( 2)

Chalna wo baad-e-subh ke jhonko ka dum ba dum

Murgaan-e-baagh ki wo khush alhaaniyaan baham

Wo aab o taab-e-naher wo maujo ka pech o kham

Sardi hawa me parind ziyada bahut na kam

Khaa khaake aos aur bhi sabza haraa hua

Tha motiyo se daaman-e-sahera bhara hua

( 3)

Wo subh-e-noor aur wo sahera-e-sabza zaar

The taairo ke gol darakhto pe be shumaar

Chalna naseem-e-subha ka reh rehke baar baar

Koo koo wo qamariyo ki wo taaoos ki pukaar

Waa the dareeche baagh behishti naeem ke

Harsu rawaan the dasht mein jhonke naseem ke

( 4)

Aamaada aaftaab ki wo subh ka samaan

Tha jiski zuu se wajd me taaoos-e-asmaan

Zarro ki raushni pe sitaaro ka tha gumaan

Nehr-e-furaat beech mein thi misl-e-kahkashaan

Har nakhl par ziyaa-e-nakhl-e-sar-e-koh-e-toor thi

Goya falak se baarish-e-baaraan-e-noor thi

( 5)

Auj-e-zameen se past tha charkh-e-zabarjadi

Koso tha sabza zaar se sahera zamarrudi

Har khushk o tar pe tha karam-e-behr-e-sarmadi

Be aab the magar dur-e-dariya-e-ahmadi

Roke huey thi naher ko ummat rasool ki

Sabza haraa tha khushk thi kheti batool ki

( 6)

Wo phoolna shafaq ka wo meena-e-laajaward

Makhmal si wo giyaah wo gul-e-sabz o surkh o zard

Rakhti thi phoonk kar qadam apna hawa-e-sard

Ye khauf tha ke daaman-e-gul par pade na gard

Dhota tha dil ke daagh chaman lalaazaar ka

Sardi jigar ko deta tha sabza kachhaar ka

( 7)

Tha bas ke roz-e-qatl-e-shah-e-aasmaan janaab

Nikla tha khoon male huey chehre pe aaftaab

Thi nehr-e-alqama bhi khijaalat se aab aab

Rota tha phoot phootke dariya me har habaab

Pyaasi jo thi sipaah-e-khuda teen raat ki

Saahil se sar patakti theen maujein furaat ki

( 8)

Tha lashkar-e-yazeed me saamaan-e-qatl-e-shaah

Harsu jama raha tha safein shimr-e-rusiyaah

Kheti ko tahelka tha ye thi kasrat-e-sipaah

Mumkin na tha ke ho guzar-e-taair-e-nigaah

Sab mustaeed the qatl-e-shah-e-kaayenaat par

Toofaan-e-aab-e-tegh utha tha faraat par

( 9)

Ek saf me barchiyo ki chamak thi ke alhazar

Lachka rahe the daand sawaaraan-e-kheera-sar

Wo barchiyaan jo sang ke dil me kare guzar

Enaan wo tod daale jo faulaad ka jigar

Tha ek gala to khanjar-e-be peer ke liye

Wo barchiyaan thi sab tan-e-shabbir ke liye

( 10)

Naavak figan liye huey halqe kamaan ke

Chillaate the ye chhaathiyo ko taan taanke

Dushman hain baadshaah-e-do aalam ki jaan ke

Dum lenge jism-e-shaah ko teero se chhaan ke

Hargiz karenge paas na ahmad ki aal ka

Reti pe khoon bahaayenge zehra ke laal ka

( 11)

Jab bandh chukeen safein to alam khul gaye tamaam

Gul padgaya ke jung ko niklein shah-e-anaam

Halqe me ahlebait ke rote the yaan imaam

Lipti hui thi qadmo se baanu-e-nek naam

Bikhraaye sar ke baal haram saath saath the

Patke me shaah-e-deen ke sakina ke haath the

( 12)

Zainab bilak rahi thi pareshaan the sar ke baal

Naalayn ka na hosh na chaadar ka tha khayaal

Seena kabood chaak garebaaan shikasta haal

Kehti thi mujhpe rahem kar ay fatima ke laal

Puchega kaun saath chhutega jo aapka

Ne maa ka aasraa hai mujhe ab na baap ka

( 13)

Zainab iztiraab pe shah roye zaar zaar

Farmaaya ay bahan teri ulfat ke mai nisaar

Yaad aagaya hussain ko iss waqt maa ka pyaar

Lekin mai kya karun nahi kuch mera ikhtiyaar

Wallaah apne qaul ka har dum khayaal hai

Pota hussain mukhbir-e-saadiq ka laal hai

( 14)

Bachpan me jo zabaan se kaha hai karenge hum

Khaayenge teer-e-zulm lahu me bharenge hum

Halq apna zer-e-khanjar-e-qaatil dharenge hum

Ummat ke bakshwaane ko pyaase marenge hum

Ab haath uthaao fatima ke noor-e-ayn se

Hogi kabhi na waada khilaafi hussain se

(1)

پھولا شفق سے چرخ پہ جب لالہ زارِ صبح

گلزارِ شب خزاں ہوئی آئی بہارِ صبح

کرنے لگا فلک زرِ انجم نثارِ صبح

سرگرمِ ذکرِ حق ہوئے طاعت گزارِ صبح

تھا چرخِ اخضری پہ رنگ آفتاب کا

کھلتا ہے جیسے پھول چمن میں گلاب کا

(2)

چلنا وہ بادِ صبح کے جھونکوں کا دم بہ دم

مرغانِ باغ کی وہ خوش الحانیاں بہم

وہ آب و تابِ نہر وہ موجوں کا پیچِ و خم

سردی ہوا میں پرند، زیادہ بہت نہ کم

کھا کھا کے اوس اور بھی سبزہ ہرا ہوا

تھا موتیوں سے دامنِ صحرا بھرا ہوا

(3)

وہ صبحِ نور اور وہ صحرائے سبزہ زار

تھے طائروں کے غول درختوں پہ بے شمار

چلنا نسیمِ صبح کا رہ رہ کے بار بار

کوکو وہ قمریوں کی وہ طاؤس کی پکار

وا تھے دریچے باغِ بہشتِ نعیم کے

ہر سو رواں تھے دشت میں جھونکے نسیم کے

(4)

آمادہ آفتاب کی وہ صبح کا سماں

تھا جس کی ضو سے وجد میں طاؤسِ آسماں

ذروں کی روشنی پہ ستاروں کا تھا گماں

نہرِ فرات بیچ میں تھی مثلِ کہکشاں

ہر نخل پر ضیائے نخلِ سرِ کوہِ طور تھی

گویا فلک سے بارشِ بارانِ نور تھی

(5)

اوجِ زمیں سے پست تھا چرخِ زبرجدی

کوسوں تھا سبزہ زار سے صحرا زمردی

ہر خشک و تر پہ تھا کرمِ بحرِ سرمدی

بے آب تھے مگر دُرِ دریائے احمدی

روکے ہوئے تھی نہر کو امت رسول کی

سبزہ ہرا تھا خشک تھی کھیتی بتول کی

(6)

وہ پھولنا شفق کا وہ مینائے لاجورد

مخمل سی وہ گیاہ وہ گلِ سبز و سرخ و زرد

رکھتی تھی پھونک کر قدم اپنا ہواۓ سرد

یہ خوف تھا کہ دامنِ گل پر پڑے نہ گرد

دھوتا تھا دل کے داغ چمن لالہ زار کا

سردی جگر کو دیتا تھا سبزہ کچھار کا

(7)

تھا بس کہ روزِ قتلِ شہِ آسماں جناب

نکلا تھا خوں ملے ہوئے چہرے پہ آفتاب

تھی نہرِ علقمہ بھی خجالت سے آب آب

روتا تھا پھوٹ پھوٹ کے دریا میں ہر حباب

پیاسی جو تھی سپاہِ خدا تین رات کی

ساحل سے سر پٹکتی تھیں موجیں فرات کی

(8)

تھا لشکرِ یزید میں سامانِ قتلِ شاہ

ہر سو جما رہا تھا صفیں شمرِ روسیاہ

کھیتی کو تہلکہ تھا یہ تھی کثرتِ سپاہ

ممکن نہ تھا کہ ہو گزرِ طائرِ نگاہ

سب مستعد تھے قتلِ شہِ کائنات پر

طوفانِ آبِ تیغ اٹھا تھا فرات پر

(9)

اک صف میں برچھیوں کی چمک تھی کہ الحذر

لچکا رہے تھے ڈانڈ سوارانِ خیرہ سر

وہ برچھیاں کہ سنگ کے دل میں کریں گزر

عنان وہ توڑ ڈالیں جو فولاد کا جگر

تھا ایک گلا تو خنجرِ بے پیر کے لیے

وہ برچھیاں تھیں سب تنِ شبیر کے لیے

(10)

ناوک فگن لیے ہوئے حلقے کمان کے

چلّاتے تھے یہ چھاتیوں کو تان تان کے

دشمن ہیں بادشاہِ دو عالم کی جان کے

دم لیں گے جسمِ شاہ کو تیروں سے چھان کے

ہرگز کریں گے پاس نہ احمد کی آل کا

ریتی پہ خوں بہائیں گے زہرا کے لال کا

(11)

جب بندھ چکیں صفیں تو علم کھل گئے تمام

غل پڑ گیا کہ جنگ کو نکلیں شہِ انام

حلقے میں اہل بیت کے روتے تھے یاں امام

لپٹی ہوئی تھی قدموں سے بانوئے نیک نام

بکھرائے سر کے بال حرم ساتھ ساتھ تھے

پٹکے میں شاہِ دیں کے سکینہ کے ہاتھ تھے

(12)

زینب بلک رہی تھی پریشاں تھے سر کے بال

نعلین کا نہ ہوش نہ چادر کا تھا خیال

سینہ کبود چاک گریباں شکستہ حال

کہتی تھی مجھ پہ رحم کر اے فاطمہ کے لال

پوچھے گا کون ساتھ چھوٹے گا جو آپ کا

نہ ماں کا آسرا ہے مجھے اب نہ باپ کا

(13)

زینب کے اضطراب پہ شاہ روئے زار زار

فرمایا اے بہن تری الفت کے میں نثار

یاد آ گیا حسین کو اس وقت ماں کا پیار

لیکن میں کیا کروں نہیں کچھ میرا اختیار

واللہ اپنے قول کا ہر دم خیال ہے

پوتا حسین مخبرِ صادق کا لال ہے

(14)

بچپن میں جو زباں سے کہا ہے کریں گے ہم

کھائیں گے تیرِ ظلم لہو میں بھریں گے ہم

حلق اپنا زیرِ خنجرِ قاتل دھریں گے ہم

امت کے بخشوانے کو پیاسے مریں گے ہم

اب ہاتھ اٹھاؤ فاطمہ کے نورِ عین سے

ہوگی کبھی نہ وعدہ خلافی حسین سے