Bismi rabbil hussain

(1)

Koofe me jab haram-e-hazrat-e-shabbir aaye

Rote aur peet te baa haalat-e-tageer aaye

Nange sar balwe me sab saahib-e-tauqeer aaye

Pahene zanjeer-e-garaa.n aabid-e-dilgeer aaye

Yun to iss shaher me bandi na kabhi aayi thi

Nange sar raandein thin aur khalq tamaashaayi thi

(2)

Sar-e-baazaar ajab tarha ka tha balwa-e-aam

Sair ko log gharo se chale aate the tamaam

Jaa kahin khali na thi bhargaye the koocha-o-baam

Kasrat-e-khalkse mushkil tha uthaana ek gaam

Koie ghumgeen tha aur shaad koie hota tha

Koie hasta tha aseero pe koie rota tha

(3)

Ek se ek yahi kaheta tha bas khush ho ho

Bandi aati hai madeene ki tamashe ko chalo

Sair phir howegi aisi na mayassar tumko

Jinko dekha na kisi ne unhe chal kar dekho

Parde waale sar-e-baazaar na dekhe honge

Aise qaidi kabhi zinhaar na dekhe honge

(4)

Shaher ke qile se hai naake tak anbwa-e-kaseer

Shaad-o-khurram chali aati hai pyaado ki baheer

Ghul tha awaarit me har samt ke haiyehaye shabbir

Be khatar ho ho ke kahete the sageer aur kabeer

Nange oonton pe jo saidaaniyaan mahboos hain ye

Ahemad-o-haider-o-shabbir ke namoos hain ye

(5)

Aamad-e-fauj-e-mokhalif ka karun kya mai bayaa.n

Aage aage to chale aate the lashkar ke nashaa.n

Peeche ghodo pe the aswaar namoodaar jawaa.n

Baj raha tha dhol fattha har ek tha shaadaa.n

Par tamaashayiyo ki chhaati phati jaati thi

Baajo se haaye hussaina ki sadaa aati thi

(6)

Peeche inn logo ke maqtoolon ke kotal ghode

Qisme baago ke kiye gardano pe teer lage

Zeen dhalke huey aur khoo.n me sara sar doobe

Baal se unke tapakte the lahu ke qatre

Gardanein daale huey chupke chale jaate the

Aansu unn ghodon ki aankhon se bahe jaate the

(7)

Peeche inn ghodon ke naizo pe shaheedo ke sar

Peeche khursheed liqa aur koie rashk-e-qamar

Raah ki gard jami chaand se rukhsaaro par

Khushk lab pyaas se aur khoon se the chehre tar

Sar se ek ek ke thi saulat-o-shaukat zaahir

Baad marne ke bhi thi shaan-o-shuja’at zaahir

(8)

Sab ke aage sar-e-abbas tha naize pe alam

Band the guncha-e-nargis ki tarha deeda-e-nam

Dekh kar usko tamashaayi ye kahte the baham

Dekho to margaye par bhi hai ajab jaah-o-hasham

Rutba pahuncha ye shahenshah-e-bani hashim ka

Sar hai naize pe dhara maah-e-bani hashim ka

(9)

Sar-e-akbar pe jo padti thi khalaeq ki nigah

Kahete the ro ro ke kya rob hai kya husn hai waah

Koie kaheta tha ke wallah ye hai gairat-e-maah

Koie ghabraake ye kaheta tha ke ay baar-e-ilaa

Naize par yusuf-o-yaaqoob ka sar dekha hai

Ya sina par tere maheboob ka sar dekha hai

(10)

Sar-e-qasim ko har ek dekh ke karta tha bayaa.n

Isme sab sayyad-e-samoom ki hai shaukat-o-shaa.n

Sahera maathe pe bandha hai to ye hota hai ayaa.n

Aqd ke baad ye naushaah hua hai bejaa.n

Iss tarha byaah kisi ka na hua howega

Aisa naushaah to koie na bana howega

(11)

Ek sina par tha sar-e-sibt-e-rasool-e-madani

Log kahete the ke teero se hai peshani chhani

Hai ayaa.n chehere se mazloomi gareebul watani

Ye sar-e-paak kaha.n aur kahan naize ki ani

Iss ka kya naam hai yaaro ye pisar kiska hai

Kis se poochein nahi maloom ye sar kiska hai

(12)

Ye jo aapas me tamaashaayiyo ne zikr kiya

Aayi ussdum sar-e-shaah-e-shohada se ye sada

Ayyuhannas mai bekas hoon wali ka beta

Mere nana hai nabi baap ali sher-e-khuda

Tann se sar mere azeezon ka utaara na haq

Mai wo hoon bhooka pyaasa jisey maara na haq

(13)

Dosh par apne payambar ne chadhaya tha mujhe

Jeete jee apne nabi ne na rulaaya tha mujhe

Rakht nau eid ke din khuld se aaya tha mujhe

Doodh khaatun-e-qayamat ne pilaaya tha mujhe

Ghar bula kar ye koie jor-o-jafa karta hai?

Aise mehmaa.n se koie bhi daga karta hai?

(14)

Aap se to mai na tha shaher me unke aaya

Yaan ke baashindo ne khat likh ke mujhe bulwaaya

Mehmaani ke auz khoon piya ghum khaaya

Teen din maine na iss garmi me paani paaya

In laeeno ne juda tann se kiya sar mera

Khaime se phoonk diye loot liya ghar mera

(15)

Barchiyaan khaake mai ghode se zamee.n par jo gira

Maine chaaha ke karun sajda-e-mabood adaa

Leke khanjar mere chhati pe sitamgaar chadha

Poora sajda bhi mujhe shimr ne karne na diya

Sar ke be kaate na utra mere seene par se

Ragde de de ke gala kaanta mera khanjar se

(16)

Sar hai iss naize pe jangal me pada hai mera tann

Laash ne aaj talak paaya nahi ghusl-o-kafan

Haath me aabid-e-beemaar ke baandhi hai rasan

Qaid kar laaye hain naamoos mere ye bad zan

Nange sar balwe me oonto pe bitha kar laaye

Chadarein bhi nahi bewo ko udhaa kar laaye

(17)

Kya kahun nanhe se bacho pe jo hai zulm-o-sitam

Naam lekar mera roti hai sakina har dum

Maarte hain usay jhunjlaake tamache azlam

Kaan bhi zaqmi hai gaalo pe bhi hai uske waram

Aaj jo iss meri pyaari pe sitam hote hain

Ye meri rooh pe wallah alam hote hain

(18)

Sar-e-sarwar ne fazaahat se kiye ye jo bayaa.n

Apne sar peet ke rone lage sab khurd-o-kalaa.n

Khooli tab aage badha le ke sar-e-shaah-e-zamaa.n

Dekha sab logo ne phir qaid me ek aur jawaa.n

Tha waram paaun pe tann zaaf se tharraata tha

Rassi kheenche huey oonto ki chala jaata tha

(19)

Hatkadi haatho me aur paau’n me bhaari zanjeer

Kheenche talwarein kaie uske pas-e-pusht shareer

Thi ye taakid ke chalne me na kijo taaqeer

Aur thi zaaf se iss qaidi ki haalat tageer

Kaheta tha zaalimo be jurm sataate ho mujhe

Chal nahi sakta hoon kheenche liye jaate ho mujhe

(20)

Na to hai paau’n me nalain na sar par dastaar

Purze purze hai abaa jism hai kaanto se figaar

Mujhpe ab rehem karo main hoon zaeef-o-beemaar

Ladkhadata hoon chadha hai mujhe shiddat se bukhaar

Ab ghash aaya to nahi phir mai sambhal sakne ka

Gir pada ab ki to hargiz nahi chal sakne ka

(21)

Kaie manzil to chala aaya hoon din bhar paidal

Maine iss haal se bhi tay kiye kya kya jangal

Pindliyaan sooj ke shal hogayin raanein bhi hain shal

Aaj na taaqati se dil yahi kaheta hai na chal

Zaalimo ek to hai tauq-o-salasil bhaari

Aur hai sab manzilo se aaj ki manzil bhaari

(22)

Kahete the ro ro ke ek ek se ye zeen-e-ibaad

Se jiKoie deta na tha uss bekas-o-mazloom ki daad

Zulm kheenche liye jaate the usko jallaad

Bano ushtar se ye chillaati thi haye haye sajjad

Jo jo iss bekas-o-tanha pe sitam hote hain

Peet kar seena-o-sar ahle haram rote hain

(23)

Bolna kya ke wo the gard sawaaro ke pare

Thi taqeed ke khabardaar koie ghul na kare

Ghum se the ashk har ek bibi ki aankho me bhare

Ahlebait-e-nabwi haath the chehero pe dhare

Pusht paa par thi nigaa zaanu pe nehwaada sar tha

Arq-e-sharm se har ek ka chehra tar tha

(24)

Apne saaye se bhi jo log ke sharmaate the

Balwa-e-aam me sar nange wo jaate the chale

Baal sunbul se the har bibi ke rukh par bikhre

Chaand se chehre pe thi apne koie khaak male

Oont par baid ke maanind koie kaampti thi

Aur koie mahendi lage haatho se muh dhaampti thi

(25)

Nange sar baithi thi ek oont pe bint-e-zahera

Na qasaaba tha na burqa tha na thi sar pe rida

Dekh kar suye falak kaheti thi ay baar-e-khuda

Aal ka ye tere maheboob ki rutba pahuncha

Ye sitamgaar nahi paas hamara karte

Paas aa aake hain raando ka nazaara karte

(26)

Raando ki chhatiyo se lipte huey the atfaal

Hont gulbarg se sookhe huey rukh dhoop se laal

Ashk aankho me bhare pyaas ke maare be haal

Raah ki gard se aalooda jhandoole wo baal

Dil dhadakte the pade khauf se chehre faq the

Jor-e-aada se kaie bacho ke chehre faq the

(27)

Thiñ kaie ladkiyaañ choti kaie ladke chhote

Aansu aankho me bhare zabt kiye sehme huey

Gore gore wo gale aur garebaan pathe

Nargisi aankho se the maaon ke soorat takte

Maang sakta tha na rokar koie bacha paani

Darke aada se hua jaata tha zahara paani

(28)

Chaand se chehre se ek ek ke yateemi thi ayaa.n

Kaie faaqe jo kiye the to na thi taab-o-tawaa.n

Bibiyaan inki gareebi pe jo karti thi fugaa.n

Jod kar haath wo kahete the na rovo amma

Kheench kar tegh na phir tumko daraawe koie

Nok-e-neze ki na shaane pe chubaawe koie

(29)

Koofi laaye the jo humraah wahan bacho ko

Mewe le le ke khilaate the wadan ko khush ho

Oont par kaheti thi maa se ye sakina ro ro

Beti qurban zara muh ko to apne kholo

Ladke khaate hain jo cheezein wo dila do humko

Mewe bazaar me bikte hain mangaa do humko

(30)

Baanu ushtar pe ye samjhaati thi usko ro ro

Qaid me sadqe gaie zidd na karo hat na karo

Mewe baazaar me bikte hain agar bikne do

Band aankhein karo muh dhaampo udhar mat dekho

Mewe kuch cheez hai jinke liye tum roti ho

Sabr laazim hai tumhe fatima ki poti ho

(31)

Mewe unn koofiyon ke bache na khaaye kyun kar

Qaid me maayein nahi sar pe salaamat hai padar

Be gunaah baap tera qatl hua hai dukhtar

Khurme dilwaadu.n kahan se tumhe ay khasta jigar

N

Dekhti ho ke museebat me giraftaar hoon mai

Raand hoon qaid me aada ki hoon naadaar hoon mai

(32)

Hote sarwar to abhi tumko khilaate mewe

Yaan na milte to wo jannat se mangaate mewe

Hote abbas to lene abhi jaate mewe

Jeete hote ali akbar to wo laate mewe

Ab nahi jeete tere naaz uthaane waale

Margaye sab tere mewe ke khilaane waale

(33)

Kiye baanu ne sakina se jo rokar ye bayaa.n

Dhaamp kar kurte se muh rone lagi wo naadaa.n

Itne me aaya nazar haakim-e-azlam ka makaa.n

Shimr chillaaya ke jald oonto ko bithlaao yahan

Nezadaaro se kaho ghul na machaayein qaidi

Baa adab oonto se jaldi utar aaye qaidi

(34)

Suni ye zulm ki taqreer to ghabraaye haram

Oonto par baid namat khauf se tharraaye haram

Bache le god me naachaar utar aaye haram

Chale darbaar me zaalim ke wo dukh paaye haram

Kabhi baalon se kabhi haatho se muh dhaampte the

Paau’n kohne me na the sab ke qadam kaampte the

(35)

Jabke dhyodhi pe isi haal se pahunche qaidi

Uss ghadi chha gaayi har bibi ke rukh par zardi

Baanu darwaze ke baazu se lipat rone lagi

Khaak par baith ke ye kahene lagi binte ali

Wo hai murtad usay soorat na dikhaaungi mai

Saamne haakim-e-azlam ke na jaaungi mai

(36)

Umar-e-saad ne uss waqt ye zainab se kaha

Uthke darbaar me chal tu ne ye heela hai kiya

Sar barehna tujhe baazaariyo ne dekhliya

Pesh-e-haakim tujhe jaate huey aati hai haya

Chal tu chal warna abhi shimr ko bulwaata hoon

Sar-e-darbaar tujhe kheenche liye jaata hoon

(37)

Peet kar sar kaha zainab ne oo naahinjaar

Mere bhayi ki tarha mera bhi sar tan se utaar

Par na le ja mujhe darbaar laeen mai zinhaar

Fatima maa hai meri mai hoon ali ki dildaar

Kheench kar tu jo yahan se mujhe lejaawega

Kya payambar ko na muh hashr me dikhlaawega

(38)

Taish me aagaya zainab se ye sunte hee shareer

Jaake sardaar se yun kahne laga wo be peer

Udgaye hain dar-e-daulat pe kaie aake aseer

Aapke khauf se desakta nahi mai taazeer

Binte zahera kisi tadbeer nahi aati hai

Shah-e-mazloom ki humsheer nahi aati hai

(39)

Maajra sunte hee ye gaiz me aaya be dee.n

Shimr se kahene laga chee.n ba jabee.n hoke laee.n

Yun to naamoos-e-hussain ibne ali aate nahi

Jaa unhe rassiyo se baandh ke laa mere qaree.n

Mai to sunta hoon bahot bekas-o-majboor hai wo

Koie waaris abhi jeeta hai jo magroor hai wo

(40)

Shimr be dee.n chala sunte hee haakim ki ye baat

Rassi ek le ke hua khooli-e-maloon bhi saath

Pahuncha jab aal-e-mohammad ke qaree.n wo bad zaat

Khooli se kahene laga baandhe ek ek ke haath

Shimr se sunte hee ye bibiyaan jee khone lagin

Koie waaris jo na tha dhaamp ke muh rone lagin

(41)

Khooli rassi liye zainab ki taraf jo hai badha

Daude sajjad ye kahete huey karta hai kya

Roke phir hazrat-e-zainab se ye aabid ne kaha

Ru ba ru haakim-e-azlam ke chalo bahr-e-khuda

Aapke rutbe se aagaah ye jallaad nahi

Baba saahib ki wasihat thi kya tumhe yaad nahi

(42)

Ro ke zainab se ye sajjad ne taqreer jo ki

Khaak se peet ti chhati ko uthi binte ali

Pahunchi.n darbaar me raandein to laga kahene shaqi

Inn me hai kaunsi aurat jo yahan aati na thi

Arz ki shimr ne tab zainab-e-dilgeer ye hai

Dukhtar-e-fatima hai shah ki humsheer ye hai

(43)

Dekh zainab ki taraf kahene laga wo mal’oon

Shart ab hai ke na aane ki saza mai tujhe doon

Tab kaha zainab-e-bekas ne baha chashm se khoon

Mere rutbe ko samjhta nahi ay sifla-e-doo.n

Deen-o-duniya ke shahenshah ki beti hoon mai

Oo sitamgar asadullah ki beti hoon mai

(44)

Tujhko maloom nahi haal meri maadar ka

Gair mehram ne janaza bhi na jiska dekha

Uski beti hoon mai sar hai mera majlis me khula

Ab bhi iss zulm se dil me nahi na dum hota

Kya jawaab iska payambar ko tu dega zaalim

Tune barbaad kiya khaana-e-zahera zaalim

(45)

Tegh-e-kee.n sibte payambar pe chalaayi tune

Ki bulakar mere bhai se buraai tune

Shakl naa mehramo ko meri dikhaai tune

Haaye looti meri amma ki kamaayi tune

Kuch saza tune na iss zulm ki paayi zaalim

Margaye wo pa tujhe maut na aayi zaalim

(46)

Sar-e-darbaar jo zainab ne kiya ye irshaad

Barham uss dum hua wo dushman-e-dee.n hadd se ziyaad

Bola khooli se ke goya hai bahot ye naa shaad

Tegh ko kheench ke aawe koie jaldi jallaad

Shah-e-mazloom ke khwaahar ki utaare gardan

Tann se iss bekas-o-muztar ki utaare gardan

(47)

Sunke ye kheenchli ek dushman dee.n ne takwaar

Sar jhuka khaak pe tab baith gayi zainab-e-zaar

Daude thaame huey zanjeer imaam-e-beemaar

Liptein ye kaheke tab uss bibi se raandein naachaar

Zulm aurat pe ye allah re dar ay zaalim

Dukhtar-e-fatima ko qatl na kar ay zaalim

(48)

Bilbilaane lage ye dekh ke nanhe bache

Peet kar sar ko sakina ne kaha haatho se

Meri bekas phupi amma mai tumhaare sadqe

Apke badle sitamgar meri gardan kaate

Ab kahan hain shah-e-waala jo bachaaye tumko

Haaye jeete nahi baba jo bachaaye tumko

(49)

Takht ke neeche jo rakha tha sar-e-shaah-e-huda

Bhaai ke sar ki taraf dekh ke zainab ne kaha

Kuch khabar hai tumhe jo zulm hai mujh par hota

Qatl hoti hoon bachaate nahi mujhko bhayya

Ab to ay fatima ke laal karaamat kijiye

Apni humsheer ki iss waqt himaayat kijiye

(50)

Sar-e-sarwar se ye zainab ne kiya ye mazkoor

Takht se bas hua ooncha sar-e-shaah-e-magfoor

Hoke haakim se muqaatib ye kaha oo maqhoor

Qatl zainab ko kare tu ye tera kya maqdoor

Fazl-e-khaliq se mai majboor nahi hoon zaalim

Ab bhi chaahun to tera takht ulat doon zaalim

(51)

Tujhko maloom nahi kya meri khwaahar hai ye

Aur sitamgar jigar-e-jaan-o-payambar hai ye

Bakhuda haider-e-karrar ki dukhtar hai ye

Binte zahera hai ye zahera ki baraabar hai ye

Haath gar uss pe utha tera to gul jaawega

Bad nigaah se isay dekhega to jal jaawega

(52)

Maine to sajda-e-khaalik me kataaya sar ko

Tune lutwaaliya maloono se mere ghar ko

Sar ba rehna kiya ahle haram-e-muztar ko

Ab sataana na khabardaar meri khwaahar

Ko

Muh chhupaane ko na burqa na rida deta hai

Dukhtar-e-fatima zahera ko saza deta hai

(53)

Iss sitam ki jo khabar khuld me paawegi batool

Apne sar khole tale arsh ke jaawegi batool

Paaya-e-arsh ko jis waqt hilaawegi

Batool

Haq ka dariya-e-gazab josh me laawegi batool

Sar-e-makhdooma-e-kaunain jo uriyaa.n hoga

Darham-o-barham abhi daftar-e-imkaa.n hoga

(54)

Maujze se sar-e-sarwar ne jo ye baatein ki.n

Bhaaga tab takht se uthke wo mal’oon-e-badee.n

Khauf se darham-o-barham hua darbaar-e-laeen

Bas anees aage mujhe likhne ki ab taab nahi

Jis se ghumgee.n hain nabi aah ye wo maatam hai

Jiska paayaa.n nahi wallah ye wo maatam hai