Bismi Rabbil Hussain
(1)
Qaid khaane me talaatum hai ke hind aati hai
Dukhtar-e-fatima gairat se muie jaati hai
Rooh qaalib me wo zindaan me ghabraati hai
Be hawaasi se har ek baar ye chillaati hai
Aasmaa.n door zamee.n sakht kidhar jaaun mai
Bibiyo milke dua maango ke mar jaaun mai
(2)
Aamad-e-hind ka gul itrat-e-shabbir me hai
Shor-e-maatam haram-e-saahib-e-tatheer me hai
Dukhtar-e-fatima rida poshi ki tadbeer me hai
Kehti hai jaaun kahan paaun to zanjeer me hai
Kis ghazab ki ye khijaalat hai duhaayi logo
Hind aa pahuncah mujhe maut na aayi logo
(3)
Jaake darbaano ko qasmein do ke behr-e-subhaan
Koie khulwaaye na tum kholiyo qufl-e-zindaan
Raat ka waqt hai bache hai hamaare naadaan
Gar nikal jaayenge to hum inhein dhoondenge kahan
Haakim-e-shaam ka kal tumpe itaab aayega
Aur hamaara to gala pahle hi katt jaayega
(4)
Kya karun kya na karun jald bataao logo
Sadqa akbar ka haqaarat se bachaao logo
Oot karke ho khade mujhko chhupaao logo
Ya kisi kone me lejaake bithaao logo
Sar khule hoon kisi hujre me mujhe band karo
Ye bhi mumkin na ho to khaak ka paiwand karo
(5)
Saltanat par hai wo naazaa.n mai aseer-o-majboor
Muh jo baalo se chhupaaungi to wo samjhegi guroor
Aamad-e-harf me keh baithegi ye hind zaroor
Bibi darbaar me to jaati thi mardo ki huzoor
Aisi gairat thi to balwe me na aayi hoti
Halq par apne chhuri aap phiraayi hoti
(6)
Sharm baazaar me kal tumko na aayi bibi
Waan to gird oonto ke thi saari khudaayi bibi
Shimr ke qauf se gardan na jhukaayi bibi
Dekh kar mujhko abas shakl chhipaayi bibi
Hind jo chaahegi badh kar mujhe keh jaayegi
Dukhtar-e-fatima muh dekh ke reh jaayegi
(7)
Aur jo mehmaan ke mujhse kiya khulq-e-hasaava.n
Laundiyaa.n hind ki ghabraake girengi pasbaa.n
Bibi kuch khair hai zainab kahan zindaan kahan
Baap to uqda-kusha beti aseer-e-zindaa.n
Be rawaayi hai tabaahi hai pareshaani hai
Tauba tauba ye nabi zaadi hai saidaani hai
(8)
Kis tarha hind ke aane se na ghabraaun mai
Bint-e-haidar hoon na kyun qaid me sharmaaun mai
Koie deewaar jo shaq ho to safariyaaun mai
Seedhi maa-jaaye ke maqtal ko chali jaaun mai
Karbala me na ye zillat hai na ruswaayi hai
Be rida mai hoon to be gor mera bhaayi hai
(9)
Leke laashe ki balaayein kahun haal-e-zindaan
Hind waan aayi thi bhayya mai chali aayi yahaan
Tha yahi khauf ke ghabraake giregi wo bayaa.n
Ay payambar ki nawaasi tu aseero me kahan
Qaabil-e-tauq huie laayiq-e-zanjeer huie
Kya gunah tujhse hua kaunsi taqseer huie
(10)
Sab sitam dekhe ye andoh uthaaye na gaye
Hind ko khaak bhare baal dikhaaye na gaye
Qaid me naam buzurgo ke bataaye na gaye
Dar ba dar phirne ke ahwaal sunaaye na gaye
Milti kya hind se mai khaak-e-aza thi sar par
Na to tum the mere sar par na rida thi sar par
(11)
Karbala ka jo suna naam sakina ne aah
Yak ba yak hoke khadi kehne lagi bismillah
Achi meri phupi amma mujhe lena humraah
Waan milegi mujhe zaalim ke tamaacho se panaah
Zabt ab rone ka zinhaar na hoga mujhse
Nang-e-sar roz ka darbaar na hoga mujhse
(12)
Aah bhar kar kaha zainab ne mai tum par qurbaa.n
Karbala shaah-e-shaheedaa.n ki kahan aur mai kahan
Tauq gardan me hai aur haatho me zanjeer-e-garaa.n
Mai hoon zindaan ki qaabil meri qaabil zindaa.n
Baitho sadqe gayi baitho mai kidhar jaaungi
Bediyaa.n pehne kisi din yahin mar jaaungi
(13)
Mai hoon monkhud mere kehne pe na jaao waari
Aane jaane ka kahin zikr na laao waari
Phupi keh kehke na ab shor machaao waari
Hind aati hai meri god me aao waari
Gair milne ko jo aata hai to chup rehte hain
Phupi ko aisi jagah kunba muie kehte hain
(14)
Maa ko wo puche to aawaara watan batlaana
Naam khwaahar ka faqat raand dulhan batlaana
Bhaayi ko qaidi-e-zanjeer-o-rasan batlaana
Baap ko sayyad-e-be-gor-o-kafan batlaana
Dekho gairat se mai hojaaungi paani paani
Hind ke aage na tum maangiyo jaani paani
(15)
Roke wo boli ke acha phupi saahib acha
Mai bhi akbar ki bahan hoon mujhe gairat nahi kya
Jaan faaqe se nikal jaaun to maangoo.n na giza
Apne saqqe ke liye roti hoon paani kaisa
Paani uss se nahi mai tashna jigar maangungi
Laash baba ki hai be gor, kafan maangungi
(16)
Mai nahi lene ki mewe wo agar laayegi
Khaak samjhungi agar khil’at-o-zar laayegi
Kaan dikhlaaungi zakhmi jo guhar laayegi
Par dua dungi jo haajat meri bar laayegi
Pucha zainab ne kya roke kaha kehdungi
Baba saahib ka jo sar degi to mai lelungi
(17)
Naagaahaa.n fizza ne di ahl-e-haram ko ye khabar
Hind aati hai bade jaah-o-tahammul se idhar
Beruqee.n naqra-o-zar ki hain jilu ke andar
Par kaneezein to rida odhe hain wo nang-e-sar
Har qadam hoti hai be hosh wo shayda-e-hussain
Haaye zainab kabhi kehti hai kabhi haaye hussain
(18)
Kehti hai qaidiyo ki shor-o-buka ne maara
Mujhko bas haaye hussaina ki sada ne maara
Unke sardaar ko kis fauj-e-jafa ne maara
Kya wo sayyad tha jisey ahl-e-daga ne maara
Ek bijli si kaleje pe mere girti hia
Nang-e-sar fatima aankho ke tale phirti hai
(19)
Margaya kaunsa ye khaasaa-e-baari logo
Ins-o-jinn hoor-o-malak karte hain zaari logo
Le chalo suye najaf meri sawaari logo
Hogi mushkil wahi.n aasaan hamaari logo
Khair se hain mere aaqa to wo sote honge
Warna marqad me ali bete ko rote honge
(20)
Dar-e-zindaa.n pe hua itne me anboh-e-kamaal
Bole darbaa.n ke badhe daulat-o-umar-o-iqbaal
Qaidiyo utho dua deke karo istaqbaal
Zan-e-haakim ka hai zindaa.n me nuzool-e-ijlaal
Tum khule sar the huzoor ab tumhein chaadar denge
Rehem dil hain abhi zindaa.n se rihaa kar denge
(21)
Meherbaa.n hongi to khil’at pehnaawenge
Subha ko bediyaa.n bhi paaun ki kattwaa denge
Uzr haakim na karega jo ye samjhaadenge
Naam jis shaher ka loge wahin pahuncha denge
Qasr-e-shaahi se jo tashreef yahan laayi hain
Parwarish karne ko tum sabki huzoor aayi hain
(22)
Dum ba khud rehgayi.n saidaaniyaa.n sunkar ye sada
Hogayi qata’ tegh-e-hayaa se goya
Dum na tha jaan na thi hosh na tha sabr na tha
Thar tharaane lage bache bhi ke kya qahr hua
Yun haram lot te the jakde huey aahan me
Zibha hokar shah-e-dee.n tadpe the jaise ran me
(23)
Dar-e-zindaa.n pe qadam hind ne rakha naagaah
Aur baahar se naqeebo ne kaha bismillah
Laundiyaa.n aage badhi.n kehti hui.n pesh-e-nigaah
Peeche daaman liye haatho me khavaasee.n humraah
Sar pe rakhe koie kursi-e-zabarjad aayi
Koie baglo me liye takiya-o-masnad aayi
(24)
Zan-e-haakim ki ye hashmat ye libaas-e-pur-zar
Aur baanu-e-hussain ibn-e-ali nang-e-sar
Na mada’in na madeena na padar na shauhar
Dono sarkaar lutee.n rehne ko paaya ye ghar
Khoon akbar ka lagaaye huey peshaani par
Roti thi apni giraftaari-o-hairaani par
(25)
Laundiyaa.n thi.n zan-e-haakim ke jilo me jo rida
Dekhti kya hai ke ek sher hai aahan me nihaa.n
Laagar-o-khasta-tan-o-faaqa-kash-o-tashna-dahaa.n
Muh pe saili ke nishaa.n pusht pe durro ke nishaa.n
Saaq-e-paa faaqe se zanjeer me tharraati hai
Ustakhwaa.n kaunse larzne ki sada aata hai
(26)
Sab ne mud kar taraf-e-hind pe ki nauha-gari
Dekhiye shaam ke zindaa.n me charaagh-e-sahari
Kyun musalsal kiya ye to hai adam ka safari
Yaad-e-haq se hai khabar khalq se hai be khabari
Kisne dum band kiya tauq-e-jafa se iska
Silsila milta na ho sher-e-khuda se inka
(27)
Khushki-e-lab se aayaa.n hai ke maheeno ki hai pyaasa
Tap se be hosh hai par shukr-e-khuda ka hai hawaas
Na bichhona hai na takiya na amaama na libaas
Sar ko zaanu pe jhukaaye huey baitha hai udaas
Langar-e-tauq se seedha nahi ho sakta hai
Na to so sakta hai beemaar na ro sakta hai
(28)
Beechme zaanuwo ki sar ki hai kya shaukat-o-shaa.n
Noor ki rahel pe goya ke dhara hai quraa.n
Kya bhavo ke tale aankho se tajalli hai ayaa.n
Kaabe ke taaq me raushan hai charaagh-e-eemaa.n
Qalam-e-qudrat-e-haq beeni-e-nooraani hai
Loh-e-mehfooz ki asbaat ko peshaani hai
(29)
Sura-e-noor jo padhna ho to chehra dekho
Lailatul qadr hai kaakul huvaida dekho
Shajar-e-toor ke badle qad-e-zeba dekho
Yad-e-baiza ke auz aabla-e-paa dekho
Kyun na yaan salle alaa muh se hamaare nikle
Sadqe inn paaun ke jinse ye sitaare nikle
(30)
Hatkadi me hai ye patli si kalaayi raushan
Ya hilaal-e-shab-e-awwal ke hai chaugird gahan
Dekhna bibi gale me hai ye tauq-e-aahan
Ya ke haale me hai khursheed-e-falak jalwa fagan
Bibi qurbaan tere iski rihaayi karde
Haath hum baandhte hain uqda-kushaayi karde
(31)
Hind ne dekh ke raando ki taraf di ye sada
Khaak par durr-e-najaf haaye pada hai kiska
Kiska yusuf hai ye zindaa.n me giraftaar-e-balaa
Kaise be qadr ho tum qadr nahi iski kya
Kaam aakhir hua ek dum me dum todta hai
Aise beemaar ko tanha bhi koie chhodta hai
(32)
Gird aabid ke phiri phir wo ba haal-e-taa’geer
Rakh diya paaun pe sar apna hata kar zanjeer
Bole wo kaun ye chillaayi kaneez-e-shabbir
Assalaam ay rasan-o-tauq-o-salaasil ke aseer
Hai wasiyyat ka mahal marne pe tayyaar hai tu
Kuch kafan ke liye rakhta hai ke naadaar hai tu
(33)
Ghum na khaa gor-o-kafan mai tujhe dungi wallaah
Nange sar tere janaaze ke chalungi humraah
Marne waale tera kya naam hai aur kyun hai tabaah
Bole moula bhi chaalees baras jeena hai aah
Naam bekas bhi hai qaidi bhi hai naadaar bhi hai
Haal ye hai ke aseeri bhi hai aazaad bhi hai
(34)
Hind ne pucha maraz kya hai kaha be padari
Roke wo boli dawa kya hai kaha nauha-gari
Ghar jo dariyaft kiya kehne lage dar ba dari
Boli leta hai khabar kaun kaha be khabari
Aah karne ka sabab pucha to sharmaane lage
Taaziyaano ke nishaa.n pusht pe dikhlaane lage
(35)
Boli wo kaunsi isiyaa.n pe mili ye taazeer
Roke farmaaya gunah kuch bhi nahi be-taqseer
Usne muh peet liya aur kaha kabse ho aseer
Bole dasvi thi muharram ki jo pehni zanjeer
Kuch kafan ke liye humraah nahi laaya hoon
Baap ko chhod ke be-gor-o-kafan aaya hoon
(36)
Boli wo koie tere sar pe hai ay khaak nashee.n
Sar uthaaya suye gardoo.n ke khudawand-e-zamee.n
Haath bewo ki taraf karke pukaara wo hazee.n
Ye hamaare liye hum inke liye hain ghumgee.n
Baba saahib ke gale par jo na khanjar phirta
Inke sar khulte na mai kaanto pe dar dar phirta
(37)
Sunke aabid ka kalaam usne khavaaso se kaha
Saaf kaabe ke faseeho ka hai lehja ba khuda
Mil gaya haidar-e-karraar ki baato ka maza
Ab chalo raando se puchein na isay dein eeza
Paas bewo ke jo wo saahib-e-hashmat aayi
Aur khaatun-e-qayaamat pe qayaamat aayi
(38)
Shaan-e-zainab pe nazar karke kaha ya daawar
Khuld se fatima zindaan me aayi.n kyun kar
Dekha baanu ko to ye kehne lagi wo shashdar
Haaye iraan ki shehzaadi hai kyun nang-e-sar
Qudrat-e-khaaliq-e-qayyum nazar aati hai
koie zainab koie kulsoom nazar aati hai
(39)
Boli zainab ke na le zainab-o-kulsoom ke naam
Wo nabi zaadiyaa.n hai qaid me unka kya kaam
Hai ghazab fatima ki aal ke haq me ye kalaam
Nauha kar hosh me aa bibi zabaa.n apni thaam
Balwe me itrat-e-mehboob-e-ilaahi aaye
Aur jahaa.n me na qayaamat na tabaahi aaye
(40)
Din ko jis bibi ka murda bhi na nikla baahar
Shaam me phirne lagi.n betiyaa.n uski dar dar
Jinki taareef ki minbar pe nabi ne aksar
Unko lootenge musalmaa.n tumhe aaya baawar
Jinko allah-o-nabi hurmat-o-izzat denge
Chaadarein unki bhala saahib-e-eemaa.n lenge ?
(41)
Hind boli ke buri hoti hai hirs-e-duniya
Anbiya par nahi kya kya sitam ummat ne kiya
Mustafa kaunsa raazi gaye ummat se bhalaa
Marte dum tak rahein naalaa.n meri bibi zahera
Zakhm baazu pe laga wo ke phir acha na hua
Haath makhdooma-e-kaunain ka seedha na hua
(42)
Shaah-e-mardaa.n ko rasan me kiya ummat ne aseer
Zaher shabbar ko mukhaalif ne diya be-taqseer
Ab faqat panjatan-e-paak me hain ek shabbir
Unki bhi jaan ke dushman hain hazaaro be peer
Chayn dil ko mere iss ranj se jeene me nahi
koie kehta tha ke shabbir madeene me nahi
(43)
Zulm guzrein hain jo aage wo hain ek ek ko yaad
Karbala me koie ghar taaza hua hai barbaad
Laayi hai maal-o-asaasa sipaah-e-ibn-e-ziyaad la
Ya ilaahi rahe sarkaar-e-hussaini aabaad
Kal mujhe loot ka asbaab jo dikhlaaya tha
Ek phate jaame pe haakim ko bhi ghash aaya tha
(44)
Ek alam hain usi asbaab me khursheed-e-nashaa.n
Mashk panje me bandhe khoo.n me bhara har afshaa.n
Ek gahewaare ki khushbu se ye hota hai ayaa.n
Ke Abhi uthke sidhaara hai koie guncha dahaa.n
Beechme takiyo ke tanha sa shalooka dekha
Doodh ugla hua aur daagh lahu ka dekha
(45)
Chaadarein bhi kaie maili si hain boseeda kamaal
Aashkaar unse hain saidaaniyo ke faqr ka haal
Topiyaa.n hansliyaa.n roomaalilyaa.n purze khalkhaal
Sar kahin tan me kahin tegho ke phal khoon me laal
Usi gaarat me kuch asbaab naya byaah ka hai
Nath hai ek bundi ki sahera kisi naushaah ka hai
(46)
Ek anghuti usi asbaab me nikli naagaah
Laal tha uska nagee.n khoon se maalik ki aah
Maine jhuk jhuk ke jo ki uske nageene pe nigaah
Dekhti kya hai ke marqoom hai masha allah
Jab usay soonghti hoon jaan nikal jaati hai
Saaf khushbu-e-hussain ibn-e-ali aati hai
(47)
Usne asbaab ki tafseel jo hain batlaayi
Tha ye nazdeek ke zainab kahein haye haye bhaayi
Kaha kubra ne ke shaadi na mujhe raas aayi
Dulha ke murde pe taqdeer ne nath padhwaayi
Jhoole waale ke tasavvur me pukaari baanu
Tere sadqe tere gehwaare ke waari baanu
(48)
Hind ek ek ke qadmo pe giri ghabraa kar
Aur duhaayi di ke ab chup na raho sharmaakar
Zibha kardaalo mujhe ek chhuri mangwa kar
Kis museebat me padi aah mahal se aakar
Zikr shabbir ka karti hoon to ro candy ho
Naam jab puchti hoon sar ko jhuka leti ho
(49)
Kaha zainab ne na iss baat pe ho daaman-e-geer
Naam waaris ka hamaare bhi hai bekas shabbir
Maal asbaab hamaara bhi luta be-taqseer
Peet kar usne kaha haaye laga dil pe teer
Ye guzaarish meri zehra ke liye maano tum
Uss anghoti ko mai mangwaati hoon pehchaano tum
(50)
Kehke ye khaatam-e-shaah-e-shohada mangwaayi
Ek laundi gayi daudi huie aur le aayi
Hind sab raando ke aage wo anghoti laayi
Behr-e-taazeem uthi sher-e-khuda ki jaayi
Gul hua shaah-e-shaheedaa.n ki nishaani aayi
Logo zehra ke sulaymaa.n ki nishaani aayi
(51)
Aayi uss gul me ye aawaaz-e-batool-e-ghumgee.n
Ay aseero ye mere laal ka hai surkh nagee.n
Kaat kar laash ki ungli ko le aaye hain laee.n
Royi.n saidaaniyaa.n sar peet ke haye haye shah-e-dee.n
Kaha totla ke sakina ke mai pehchaan gayi
Ye anghoti mere baba ki hai qurbaan gayi
(52)
Sunghte sunghte anghushtari-e-shaah-e-zaman
Hoke be hosh giri bint-e-shah-e-qala-shikan
Kaha fizza ne ke haye haye mere mehboos-e-rasan
Pad gaya gul ke tasadduq huie bhaayi pe bahan
Bolo ay mariyam-e-saani meri saahib zaadi
Meri bibi ki nishaani meri saahib zaadi
(53)
Haul aata hai mujhe hosh me aao bibi
Sehmi jaati hai sakina na rulaao bibi
Hind deti hai qasam naam bataao bibi
Bache sab rote hain aawaaz sunaao bibi
Utho taazeem ko zahera ka pisar aaya hai
Dekho deewaar pe shabbir ka sar aaya hai
(54)
Neem wa chashm se ki zainab-e-bekas ne nigaah
Hind ne roke kaha aah nabi zaadi aah
Mai na kehti thi ke ghar hogaya zahera ka tabaah
Ye hussain aur nahi ibn-e-ali hai wallah
Noor-e-haq khaak me posheeda-o-panhaa.n kab ho
Mai to pehle hi ye samjhi thi ke tum zainab ho
(55)
Bakshiye meri khata behr-e-janaab-e-shabbir
Mai rahi parde me aur tum phiri.n balwe me aseer
Kaha zainab ne phir ismein teri kya taqseer
Isi qaabil thi hussain ibn-e-ali ki humsheer
Khoob haakim tera bibi haq gaafil samjha
Pisar-e-fatima ko zibha ke qaabil samjha
(56)
Naagaahaa.n noor-e-khuda se hua zindaa.n raushan
Sar-e-deewaar hua shaah ka sar jalwa fagan
Chashm harsu nigaraa.n garq-ba-khoo.n khush dahan
Lab-e-ejaaz se jaari tha har ek dum ye sukhan
Dekh ay hind bahan bhaayi ki taqdeer ye hai
Sar-e-shabbir mai hoon khwaahar-e-shabbir ye hai
(57)
Nazr dene lagi zainab ko rida wo ghum khwaar
Aayi zahera ki sada beti na lena zinhaar
Be kafan hai abhi jangal me hamaara dildaar
Dhoop me laash padi hai na kafan hai zinhaar
Dekhun kab dafn mera lakht-e-jigar hota hai
Laash par sher-e-khuda aata hai aur rota hai
(58)
Sunke ye bibiyo ke saath kiye hind ne bayn
Aur kaha kaun hai baanu-e-imaam-e-kaunain
Baanu chilaayi kaho boli wo yaa shiyyon-e-shayn
Sunti hoon aapka maasoom hai humshakl-e-hussain
Jaan qurbaan-e-jamaal-e-shah-e-abraar karoon
Do meri god me asghar ko to mai saaya karoon
(59)
God khaali usay dikhlaake ye baanu ne kaha
Bibi asghar kahan asghar huey baba pe fida
Teen din tak mere shashmaah ko paani na mila
Chhid gaya hai ghazab-e-teer se tanha sa gala
Doodh ugalte huey jannat ko sidhaara asghar
Naam lekar mera haye haye na pukaara asghar
(60)
Bas dabeer ab nahi tasneef ka yaara baaqi
Go ke mazmoon naye hain abhi kya kya baaqi
Ya ilaahi rahe jabtak ke ye duniya baaqi
Taaziyaa-daar rahe shaah ke har jaa baaqi
Jo ghulaamaan-e-ali ibn-e-abitalib ho.n
Gaalib-e-kul ke mukhaalif pe sada gaalib ho.n
Allahumma solle alaa mohammad wa aal-e-mohammad