Bismi Rabbil Hussain jjh

(1)

Jab khaime me rukhsat ko shah-ebehr-obar aaye

Chillaayi sakina mere bekas padar aaye

Hazrat ko jo naamoos-epayambar nazar aaye

Rokar kaha hum qabr me asghar ko dhar aaye

Lo bibiyo shabbir jahan se safari hai

Ab fatima ka laal charaagh-esahari hai

(2)

Tanha huey kis tarha na hum marne ko jaayein

Qaasim hain ke ammu ke auz khoo.n me nahaayein

Abbas hain jo nehr pe haath apna kataayein

Akbar hain jo baba ki auz barchhiyaan khaayein

Yaawar koie juz bekasi-oyaas nahi hai

Asghar bhi muye ab to koie paas nahi hai

(3)

Ali margaya hum marne na paaye

Khaaliq mujhe uss qaafle se jald milaaye

Kis se kahun jo hijr-eazeezaa.n ka khalaq hai

Dil tukde hai seene me kaleja mera shaq hai

(4)

Tum sabko kiya khaaliq-eakbar ke hawaale

Zahera ke hawaale kiya haidar ke hawaale

Sab ghar hai mera aabid-emuztar ke hawaale

Hai meri sakina mere khwaahar ke hawaale

Maatam me mere naala-ofariyaad karegi

Behlaayiyo jisdum wo mujhe yaad karegi

(5)

Asghar ko liye god me phirti thi wo din bhar

Behlaayegi dil kis se ke maare gaye asghar

Ab aur yateemi ki balaa aati hai sar par

Ghum hai ke ye kis tarha jiyegi meri dukhtar

Kaun uske bhalaa naaz uthaayega mere baad

Chhaathi pe usay kaun sulaayega mere baad

(6)

Afsos meri pyaari ye ab hoyegi be daad

Dur ke liye maarenge tamaache sitam ijaad

Chillaayegi le leke mera naam wo na shaad

Markar bhi ghum-oranj se hum honge na aazaad

Haihaath galaa baandhega jab shimr rasan me

Laasha mera sadme se tadap jaayega ran me

(7)

Kehkar ye sukhan rone lage sayyad-eakram

Naamoos-emohammad me bapaa hogaya maatam

Sar peetke zainab ne kaha ay shah-eaalam

Kis se sukhan-eyaas ye farmaate ho iss dum

Kuch meri bhi hai fikr jo sar dete ho bhaayi

Haye haye mujhe marne ki khabar dete ho bhaayi

(8)

Jaate ho to humraah bahan ko liye jaao

Mai teer-esitam khaaungi tum barchhiyaan khaao

Jab ghash me sar-epaak ko harne pe jhukaao

Mai thaam loo.n taa khaak pe tum girne na paao

Tanha tumhe shamsheer-otabar khaane na dungi

Mar jaaungi par aapko mai jaane na dungi

(9)

Baba nahi amma nahi bete bhi nahi paas

Pardes me hai kaun ba juz bekas-obeyaas

Iss khwaahar-eghumgee.n ko faqat aapki hai aas

Baad aapke karne ka nahi koie mera paas

Har shaher me sar nange mai dil khasta phirungi

Sadqe gaie dar dar mai rasan basta phirungi

(10)

Rone lage zainab se ye sunkar shah-eabraar

Chhaathi se lagaaya usay baa deeda-ekhoo.nbaar

Farmaaya ke de sabr tujhe yazda-egaffaar

Wallaah behen bhaayi hai iss amr me laachaar

Kis tarha na marne ka iraada kare zainab

Hai marzi-ekhaaliq to yahi kya kare zainab

(11)

Jaane do bahan khaaliq-eakbar ki qasam hai

Roko na hamein tumko payambar ki qasam hai

Zahera ki tumhe rooh-emutahhar ki qasam hai

Bas sabr karo tumko mere sar ki qasam hai

Tanhaayi se dil seene me ghabraata hai behnaa

Ab thaheru to waade me khalal aata hai behnaa

(12)

Ye sunke giri zainab-edilgeer zamee.n par

Chillaayi ke duniya se chale haaye baraadar

Phir shah ne kaha dekh ke baanu ko khole sar

Saahib kaho kya haal hai kyun phenkdi chaadar

Lab par kabhi naala hai kabhi seena zani hai

Hum to abhi jeete hain ye kya shakl bani hai

(13)

Rokar kaha baanu ne ke ya sibt-epayambar

Kuch hosh nahi jabse muye hain ali akbar

Kis tarha mai chhaathi ko na peetu.n mere sarwar

Akbar hi ko roti thi ke maare gaye asghar

Jeene ki nahi dil pe badaa ranj-otaa'b hai

Aaqa ne bhi laundi ko jo chhoda to ghazab hai

(14)

Shah ne kaha baanu yahi qismat me likha hai

Taqdeer se kuch zor nahi sabr ki jaa hai

Aaya hai jo duniya me wo ek roz fanaa hai

Ghabraao na har dukh me madadgaar khuda hai

Do bete fidaa kar chuki ho raah-ekhuda me

Shauhar ko bhi qurbaan karo raah-ekhuda me

(15)

Paighaam-erandaape ka suna shaah se jisdum

Ye roie ke be hosh huie baanu-epur ghum

Aabid ke sarhaane gaye rote shah-eaalam

Baazu ko hilaa kar kaha baa deeda-epur nam

Kya ghash me ho rukhsat ko padar aaya hai beta

Utho ke wasiyyat ko padar aaya hai beta

(16)

Baba ki sadaa sunke usay hosh jo aaya

Utha na gaya sar qadam-eshah pe jhukaaya

Shah baith gaye aur usay aahista uthaaya

Muh dekhke aabid ne ye hazrat ko sunaaya

Raushan huie.n aankhein shah-ewaala nazar aaye

Bas ab huie sehat ke maseeha nazar aaye

(17)

Shah ne kaha de tujhko shifaa yazda-egaffaar

Jaata hai padar marne ko ay aabid-ebeemaar

Khaime ke jalaane ko ab aayenge jafaakaar

Rehna haram-epaak se balwe me khabardaar

Iss ghar ke bas ab maalik-omukhtaar tumhi ho

Be waarsi raando ke madadgaar tumhi ho

(18)

Samjhaata hoon jo kuch wahi karna mere dildaar

Rassi bandhe gardan me to mat kijiyo takraar

Nehwaadiyo sar dekhte hi tauq-egaraa.n baar

Rakhdijo qadam bediyaa.n laayein jo sitamgaar

Farzand ho tum ibne shah-euqda kusha ke

Paaband raho silsila-esabr-oraza ke

(19)

Aur ek ye wasiyyat rahe yaad ay mere jaani

Kijo na faraamosh meri tashna dahaani

Chaubees pahar guzre hain paaya nahi paani

Dein paani agar baad mere zulm ke baani

Tum fatiha baba ki dilaa dijiyo beta

Aur pyaasi sakina ko pila dijiyo beta

(20)

Aur suye watan jaayiyo jab qaid se chhut kar

Sughra se ye kahiyo mere jaanib se muqarrar

Bibi tujhe bhoola nahi mai bekas-omuztar

Thi yaad teri dil me galaa tha tah-ekhanjar

Taqdeer ne zindaa hamein pheraa na safar se

Ab hashr me howegi mulaaqaat padar se

(21)

Sajjaad ne hazrat se kaha thaamke riqqat

Kya bande ko marne ki na deejega ijaazat

Iss qaid-emuseebat se to behtar hai shahaadat

Bin aapke hai zeest mere haq me qayaamat

Ye shiddat-etap aur ye tanhaayi hamaari

Gar aapne chhoda to ajal aayi hamaari

(22)

Shah ne kaha sadqe tere mazloomi ke shabbir

Ay aabid-ebekas hai yahi khwaahish-etaqdeer

Kis tarha se tu halq dharega tah-eshamsheer

Pyaare tere hisse me to hai tauq-egulu geer

Taa zeest tujhe baap ke maatam me hai rona

Chaalees baras tujhko mere ghum me hai rona

(23)

Har channd ke hai tum pe firaaq-epadari jabr

Jab tum na huey kaun banaayega meri qabr

Aajaayega ghash ro'o na beta sifat-eabr

Ab ghar me na hum aayenge baba ko karo sabr

Naamoos-erasool-edosara ko tumhe sonpaa

Sonpaa tumhe ghar aur khuda ko tumhe sonpaa

(24)

Ghash hogaye sajjaad-ehazee.n sunke ye taqreer

Rote huey maidaa.n ko chale hazrat-eshabbir

Sadme se hua zard rukh-ezainab-edilgeer

Chillaake kaha baanu ne haye haye meri taqdeer

Uthtaa hai mere shaah ka saaya mere sar se

Logo mai chhuti jaati hoon zahera ke pisar se

(25)

Samjhaate the ek ek ko shah ba dil-ena shaad

Ay bibiyo be faaida hai naala-ofariyaad

Bhoolo humein ab khaaliq-eakbar ko karo yaad

Shaakir raho har dukh me ke haq ka hai ye irshaad

Ye sunke har ek takti thi shabbir ki surat

Shah dekhte the ro roke humsheer ki surat

(26)

Khaime se bar aamad huey aakhir shah-esafdar

Sab bibiyaa.n dyodhi pe rahi.n khole huey sar

Kya kije bayaa.n bekasi-esibt-epayambar

Beta na bhateeja na alamdaar na lashkar

Thaame jo rakaab aapki itna na koie tha

Rehwaar tha ya raakib-edosh-enabawi tha

(27)

Kis yaas se har chaar taraf takte the sarwar

Dikhlaayi na deta tha koie monis-oyaawar

Rokar kabhi chillaate the aao ali akbar

Dil thaamke kehte the kabhi haaye baraadar

Lo jald khabar bekas-obeyaar hain abbas

Tum thaamo rakaab aake to aswaar ho.n abbas

(28)

Ro roke ye kehte the shahenshaah-edoaalam

Mazloomi-eshabbir pe tha khaime me maatam

Hargiz dil-ezainab ko qaraar aaya na uss dum

Chillaati huie dyodhi se nikli wo basad ghum

Ay bhaayi dikhaaun kisey tanhaayi tumhaari

Thaamegi rakaab aaj ye maa jaayi tumhaari

(29)

Shah ne kaha zainab teri ulfat ke mai qurbaa.n

Bhaayi ke lilye parde ka tumko na raha dhyaa.n

Phir ghode ke nazdeek gaye sarwar-ezeeshaa.n

Ro roke kaha lo bahan allah nigahbaa.n

Zainab ne rakha haath rakaab-eshah-edee.n par

Shabbir huey jalwa numa khaana-ezee.n par

(30)

Maidaa.n ko chali sayyad-ebekas ki sawaari

Zainab gayi khaime me basad giriya-ozaari

Jangaah me pahuncha asad yazda-ebaari

Iss gaiz se dekha ke lage kaanpne naari

Kya rob tha kya dabdaba tha ibne ali ka

Qabze ki taraf haath na badhta tha kisi ka

(31)

Bachpan ka tha markab tahe raan barq ki tamsaal

Har martaba chamkaartaa tha fatima ka laal

Kehte the sitamgaar zahe hashmat-oijlaal

Dekho to zara shauqat-eshabbir-ekhush iqbaal

Lab tashna kaie din shah-emazloom rahe hain

Par sher se maidaa.n me khade jhoom rahe hain

(32)

Din hogaya jalwe se rukh-etaab ke mehtaab

Abru hain hareem-eharam-epaak ke mehraab

Hain nargisi aankhein to hai chehra gul-eshadaab

Lab gairat-eyaaqoot hain dandaa.n dur-ekhush aab

Aayina hai gardan to saraahi sa galaa hai

Hazrat ka badan noor ke saanche me dhalaa hai

(33)

Itne me huey badhke rajaz khwaa.n shah-esafdar

Pehchaano mere rutbe ko ay qaum-esitamgar

Nana hai payambar meri maa bint-epayambar

Bhaayi hasan-esabz-eqabaa aashiq-edaawar

Mai sarwar-ewaan-echaman-esher-ekhuda hoon

Wallah daro mujhse mai shamsheer-ekhuda hoon

(34)

Tum wo ho ke lilkh likh ke khat-eshauq bulaaya

Mai wo hoon ke ghar chhodke iss garmi me aaya

Tum wo ho ke be jurm-okhata mujhko sataaya

Mai wo hoon ke shikwe ka sukhan lab pe na laaya

Tum wo ho ke tasveer payambar ki mitaa di

Mai wo hoon ke jisne tumhe bakshish ki dua di

(35)

Be jaa.n kiye tumne mere yaawar mere pyaare

Mai rehgaya sab jaanib-efirdaus sidhaare

Tum subh-omasaa rehte ho dariya ke kinaare

Bache muye jaate hain mere pyaas ke maare

Mehmaa.n ko bhi eeza kabhi duniya me mili hai ?

Paani nahi dete ho ye kya be adabi hai

(36)

Kuch bole na hazrat ki sukhan sunke sitamgaar

Ek baar baje tabl huie teero ki bochhaar

Ki sibt-epayambar ne alam tegh-esharar baar

Bijli ki tarha jaa pada fauj me rehwaar

Dum band huey tegh se be daad garo ke

Har chaar taraf chhaa gaye badal siparo ke

(37)

Kis se ho bayaa.n tezi-etegh-eshah-eaalam

Hangaam-eraqam hurf kate jaate hain baaham

Kahiye usay barq-eghazab-ekhaaliq-eakram

Khoo.nrez-ojafaakaar-osar andaaz-osharar dum

Jis gaul pe bijli si wo jaa padti thi thamke

Sar girte the misl-etagrag ahl-esitam ke

(38)

Maidaa.n me zebas khoon ke dariya ka hua josh

Machli ki tarha lot te phirte the ziraaposh

Naami jo bahaadur the na tha unme zara hosh

Tha shor ke bas shamm-ehayaat ab huie khamoosh

Kya jaate bhalaa sibt-epayambar ke baraabar

Ek barq nikal jaati hai do kar ke baraabar

(39)

Kya tegh thi kya zarb thi al azmatulillah

Yaan koh jo howe to kate misl-eparkaah

Dum lene na dete the kisi ko shah-ezee jaah

Dozaq ki taraf ran se chale jaate the gumraah

Sau jaa.n se fidaa zarbat-edast shah-edee.n par

Kitne hi tadapte nazar aate the zamee.n par

(40)

Karta hai alam saif zabaa.n raawi-epur ghum

Ladte huey dariya pe jo pahunche shah-eaalam

The ghaat jo roke huey waan saikado azlam

Ek hamle me un sabko kiya darham-obarham

Aayi jo hawaa asp-eshah-etashna dahaa.n ko

Latka diya paani pe nazar karke zabaa.n ko

(41)

Hazrat ne jo dekha ke bahut tashna hai rehwaar

Thakraake usay daal diya naher me ek baar

Farmaaya ke sairaab ho ay asp-ewafaadaar

Parchha hai abhi gher na lein phir kahin kuffaar

Aur mai to kabhi paani se lab tar na karunga

Pyaase muye abbas mai pyaasa hi marunga

(42)

Be jaa.n huey bin paani tadap kar ali akbar

Haatho pe mere tashna dahan margaye asghar

Dum todti hai khaime me pyaasi meri dukhtar

Ay ghode tu munsaf ho mai paani piyun kyunkar

Ab dil ko mere saagar-ekausar ki hos hai

Aur halq ko aab-edum-ekhanjar ki hos hai

(43)

Raakib ki jo taqreer suni ghode ne saari

Ek naddi huie aansuwo ki chashmo se jaari

Ro roke ye ki arz ke ay aashiq-ebaari

Sairaab hoon mai aur na bujhe pyaas tumhaari

Hazrat ki tarha paani se bezaar hoon aaqa

Mai bhi na piyunga ke wafaadaar hoon aaqa

(44)

Rone lage ye sunke shah-ebekas-obe par

Phir sochke kuch paani bhara chullu ke andar

Chaaha jo hain shah ne ke lab-ekhushk karein tar

Chillaake ye tab kehne lagaa ek sitamgar

Paani se abhi halq na tar kijiye hazrat

Ghar lut ta hai haan jald khabar lijiye hazrat

(45)

Taaraaj hua ahl-eharam ka zar-ozewar

Saidaaniyaan khaime se nikal aayi.n hai baahar

Ye sunte hi shaah-edo jahaa.n hogaye muztar

Uss paani ko bas phenk diyaa naher ke andar

Le tegh-edo dum haath me ghode pe sanbhal kar

Khaime ko lage dekhne dariya se nikal kar

(46)

Ghar sayyad-emazloom ko saalim nazar aaya

Mutlaq asar uss shaami ki baato ka na paaya

Abbas ke laashe ko jo dekha to sunaaya

Ay bhaayi khabar lo hamein aada ne sataaya

Ghar hogaya weeraa.n ali akbar gaye maare

Uthkar hamein pursa do ke asghar gaye maare

(47)

Ro roke abhi kehte the ye sibt-epayambar

Jo gher liya fauj-esitamgaar ne aakar

Teer aise pade chhin gaya saara tan-eanwar

Seene pe padi.n barchiyaan aur pahelu pe khanjar

Tukde hua tegho se amaama shah-edee.n ka

Aalooda-ekhoo.n hogaya jaama shah-edee.n ka

(48)

Zakhmi jo ba shiddat hua zahera ka wo jaani

Taaqat to ghati aur badhi tashna dahaani

Talwaarein lagaate the khade zulm ke baani

Honto pe zabaa.n pherke shah kehte the paani

Karta tha koie rahem na uss tashna dahan par

Paani ke auz teer baraste the badan par

(49)

Farmaate the afsos na rutba mera jaana

Ay zaalimo acha nahi zahera ka sataana

Samjhe ho gunaah pyaase ko paani ka pilaana

Malboos-enabi karte ho teero ka nishaana

Talwaarein ye sab chalti.n hain haidar ke jigar par

Padte hain ye sab teer payambar ke jigar par

(50)

Sunte the na mazloom ki fariyaad sitamgar

Ek pyaase pe toota hua tha shaam ka lashkar

Beh behke lahu zakhmo se girta tha zamee.n par

Rehwaar bhi majrooh tha tegho se baraabar

Lagte the jo paikaan-esitam chehre pe aakar

Har martaba khoo.n jhaadta tha sar ko phiraakar

(51)

Itne me chhida teer se halq-eshah-eabraar

Paikaan-esitam gardan-eanwar se hua paar

Halqoom se kheencha juhi.n wo naawaq-ekhoo.nkhaar

Fawwaare ki misl chhuti khoon ki ek dhaar

Sadma tha ajab dosh-emohammad ke makee.n par

Girta tha garebaa.n se lahu daaman-ezee.n par

(52)

Peshaani pe ek teer laga aur bhi kaari

Aalooda-ekhoo.n reesh mubaarak huie saari

Mal malke lahu chehre pe wo aashiq-ebaari

Kehta tha kuch ummat ne na ki qadr hamaari

Firdaus me jaakar yuhi.n baba se milunga

Jannat me isi tarha mai nana se milunga

(53)

Naagaah bin-ewahab ne ek barchi lagaayi

Thi zaher me zaalim ne sinaa.n uski bujhaayi

Wo dilbar-ezahera ke kaleje me dar aayi

Gardan shah-emazloom ne hirne pe jhukaayi

Sanbhlaa na gaya dosh-emohammad ke makee.n se

Ya sher-ekhuda kehke girey khaana-ezee.n se

(54)

Sab zakhm-ebadan phat gaye girte hi zamee.n par

Aalooda huey khaak se geysu-emunabbar

Talwaarein lagaane lage gird aake sitamgar

Thi kushk zabaa.n bol na kuch sakte the hazrat

Mazloomi se ek ek ka muh takte the hazrat

(55)

Chillati thi dyodhi pe khadi khwaahar-eshabbir

Iss bekas-omazloomi ke sadqe ho ye humsheer

Dum todte ho paani pilaate nahi be peer

Ab ran me nikal aati hoon mai bekas-odilgeer

Talwaarein padengi to na ghabraaungi bhaayi

Mai aapko khaime me uthaa laaungi bhaayi

(56)

Reti pe tadapte ho tumhe kaun uthaaye

Haye haye kisey bheju.n jo laeeno se bachaaye

Haye haye kahu.n kis se ke tumhe paani pilaaye

Haye haye kisey maa jaayi tera haal dikhaaye

Ya haidar-osafdar tumhi.n imdaad ko pahuncho

Bhaayi ka galaa katt ta hai fariyaad ko pahuncho

(57)

Fariyaad suni zainab-enaa shaad ki jisdum

Khaime ki taraf takne lage sayyad-eakram

Dekha ke ye hai khwaahar-eghum deeda-eaalam

Sar peet ti hai haatho se aur karti hai maatam

Thaame hain kaie bibiyaan uss khasta jigar ko

Iss sadme se ghash aagaya zahera ke pisar ko

(58)

Lashkar se badha shimr-elaee.n kheenchke khanjar

Fariyaad hai chhaathi pe chadha shah ki sitamgar

Zaanu se dabaa seena-ezakhmi jo saraa sar

Uss waqt lahu muh se ugalne lage sarwar

Khanjar ko rakha shah ke galey par jo laee.n ne

Takbeer kahi kholke aankhein shah-edee.n ne

(59)

Zaalim ko zabaa.n sukhi dikhaayi kayi baari

Paani na diya zibha lagaa karne wo naari

Jabtak ke gardan ki ragein katt chuki.n saari

Takbeer rahi shah ke lab-ekhushk pe jaari

Jis waqt judaa hogaya sar tegh se katt kar

Kham hogaya qible ki taraf jism ulat kar

(60)

Gul padgaya be sar hua sardaar-edo aalam

Khanjar se dil-ojaa.n-enabi hogaya be dum

Khaamoosh anees abke padha bazm me maatam

Ab khaaliq-eakbar se dua maang ye issdum

Gair az ghum-eshabbir koie ghum na zara de

Ya rab mujhe tauqeer-etafakkur se chadha de

(1)

 جب خیمے میں رخصت کو شاہِ-بحر-و-بر آئے 

چلائی سکینہ مرے بےکس پدر آئے 

حضرت کو جو ناموسِ-پیمبر نظر آئے 

روکر کہا ہم قبر میں اصغر کو دھر آئے

لو بیبیو جہاں سے سفری ہے

 اب فاطمہ کا لال چراغِ-سحری ہے

(2)

 تنہا ہوئے کس طرح نہ ہم مرنے کو جائیں

 قاسم ہیں کہ عمو کے عوض خوں میں نہائیں

 عباس ہیں جو نہر پہ ہاتھ اپنا کٹائیں

 اکبر ہیں جو بابا کی عوض برچھیاں کھائیں

یاور کوئی جز بےکسی-و-یاس نہیں ہے 

اصغر بھی موئے اب تو کوئی پاس نہیں ہے

(3)

 علی مرگیا ہم مرنے نہ پائے

 خالق مجھے اس قافلے سے جلد ملائے

کس سے کہوں جو ہجرِ-عزیزاں کا خلق ہے

 دل ٹکڑے ہے سینے میں کلیجا مرا شق ہے

(4) 

تم سب کو کیا خالقِ-اکبر کے حوالے

 زہرا کے حوالے کیا حیدر کے حوالے

 سب گھر ہے مرا عابدِ-مضطر کے حوالے 

ہے میری سکینہ مرے خواہر کے حوالے

ماتم میں مرے نالہ-و-فریاد کرے گی

 بہلائیو جس دم وہ مجھے یاد کرے گی

(5)

 اصغر کو لیے گود میں پھرتی تھی وہ دن بھر 

بہلائے گی دل کس سے کہ مارے گئے اصغر 

اب اور یتیمی کی بلا آتی ہے سر پر

 غم ہے کہ یہ کس طرح جیے گی مری دختر

کون اس کے بھلا ناز اٹھائے گا مرے بعد

 چھاتی پہ اسے کون سلائے گا مرے بعد

(6)

 افسوس مری پیاری یہ اب ہوئے گی بیداد 

در کے لیے ماریں گے تماچے ستم ایجاد 

چلائے گی لے لے کے مرا نام وہ ناشاد

 مرکر بھی غم-و-رنج سے ہم ہوں گے نہ آزاد

ہیہات گلا باندھے گا جب شمر رسن میں

 لاشا مرا صدمے سے تڑپ جائے گا رن میں

(7) 

کہہ کر یہ سخن رونے لگے سیدِ-اکرم

 ناموسِ-محمد میں بپا ہوگیا ماتم

 سر پیٹ کے زینب نے کہا اے شاہِ-عالم

 کس سے سخنِ-یاس یہ فرماتے ہو اس دم

کچھ میری بھی ہے فکر جو سر دیتے ہو بھائی 

ہائے ہائے مجھے مرنے کی خبر دیتے ہو بھائی

(8)

 جاتے ہو تو ہمراہ بہن کو لیے جاؤ 

میں تیرِ-ستم کھاؤں گی تم برچھیاں کھاؤ 

جب غش میں سرِ-پاک کو ہرنے پہ جھکاؤ 

میں تھام لوں تا خاک پہ تم گرنے نہ پاؤ

تنہا تمہیں شمشیر-و-تبر کھانے نہ دوں گی 

مر جاؤں گی پر آپ کو میں جانے نہ دوں گی

(9) 

بابا نہیں اما نہیں بیٹے بھی نہیں پاس

 پردیس میں ہے کون بجز بےکس-و-بےیاس

 اس خواہرِ-غمگیں کو فقط آپ کی ہے آس 

بعد آپ کے کرنے کا نہیں کوئی مرا پاس

ہر شہر میں سر ننگے میں دل خستہ پھروں گی 

صدقے گئی در در میں رسن بستہ پھروں گی

(10) 

رونے لگے زینب سے یہ سن کر شہِ-ابرار

 چھاتی سے لگایا اسے با دیدۂ-خوں‌بار 

فرمایا کہ دے صبر تجھے یزدائے-غفار

 واللہ بہن بھائی ہے اس امر میں لاچار

کس طرح نہ مرنے کا ارادہ کرے زینب

 ہے مرضیِ-خالق تو یہی کیا کرے زینب

(11) 

جانے دو بہن خالقِ-اکبر کی قسم ہے

 روکو نہ ہمیں تم کو پیمبر کی قسم ہے

 زہرا کی تمہیں روحِ-مطہر کی قسم ہے

 بس صبر کرو تم کو مرے سر کی قسم ہے

تنہائی سے دل سینے میں گھبراتا ہے بہنا

 اب ٹھہروں تو وعدے میں خلل آتا ہے بہنا

(12) 

یہ سن کے گری زینبِ-دلگیر زمیں پر 

چلائی کہ دنیا سے چلے ہائے برادر

 پھر شہ نے کہا دیکھ کے بانو کو کھولے سر 

صاحب کہو کیا حال ہے کیوں پھینک دی چادر

لب پر کبھی نالہ ہے کبھی سینہ زنی ہے 

ہم تو ابھی جیتے ہیں یہ کیا شکل بنی ہے

(13)

 روکر کہا بانو نے کہ یا سبطِ-پیمبر 

کچھ ہوش نہیں جب سے موئے ہیں علی اکبر 

کس طرح میں چھاتی کو نہ پیٹوں مرے سرور

 اکبر ہی کو روتی تھی کہ مارے گئے اصغر

جینے کی نہیں دل پہ بڑا رنج-و-تعب ہے

 آقا نے بھی لونڈی کو جو چھوڑا تو غضب ہے

(14) 

شہ نے کہا بانو یہی قسمت میں لکھا ہے 

تقدیر سے کچھ زور نہیں صبر کی جا ہے 

آیا ہے جو دنیا میں وہ اک روز فنا ہے

 گھبراؤ نہ ہر دکھ میں مددگار خدا ہے

دو بیٹے فدا کر چکی ہو راہِ-خدا میں

 شوہر کو بھی قربان کرو راہِ-خدا میں

(15)

 پیغامِ-رنڈاپے کا سنا شاہ سے جس دم 

یہ روئی کہ بےہوش ہوئی بانوِ-پر غم

 عابد کے سرہانے گئے روتے شاہِ-عالم

 بازو کو ہلا کر کہا با دیدۂ-پر نم

کیا غش میں ہو رخصت کو پدر آیا ہے بیٹا

 اٹھو کہ وصیت کو پدر آیا ہے بیٹا

(16)

 بابا کی صدا سن کے اسے ہوش جو آیا 

اٹھا نہ گیا سر قدمِ-شہ پہ جھکایا 

شاہ بیٹھ گئے اور اسے آہستہ اٹھایا

 منہ دیکھ کے عابد نے یہ حضرت کو سنایا

روشن ہوئیں آنکھیں شاہِ-والا نظر آئے

 بس اب ہوئی صحت کہ مسیحا نظر آئے

(17)

 شہ نے کہا دے تجھ کو شفا یزدائے-غفار

 جاتا ہے پدر مرنے کو اے عابدِ-بیمار

 خیمے کے جلانے کو اب آئیں گے جفاکار

 رہنا حرمِ-پاک سے بلوے میں خبردار

اس گھر کے بس اب مالک-و-مختار تمہی ہو 

بےوارثی رانڈوں کے مددگار تمہی ہو

(18) 

سمجھاتا ہوں جو کچھ وہی کرنا مرے دلدار 

رسی بندھے گردن میں تو مت کیجیو تکرار

 نہواڑیو سر دیکھتے ہی طوقِ-گراں‌بار 

رکھ دیجیو قدم بیڑیاں لائیں جو ستمگار

فرزند ہو تم ابن شاہِ-عقدہ کشا کے 

پابند رہو سلسلۂ-صبر-و-رضا کے

(19)

 اور ایک یہ وصیت رہے یاد اے مرے جانی 

کیجیو نہ فراموش مری تشنہ دہانی

 چوبیس پہر گزرے ہیں پایا نہیں پانی

 دیں پانی اگر بعد مرے ظلم کے بانی

تم فاتحہ بابا کی دلا دیجیو بیٹا

 اور پیاسی سکینہ کو پلا دیجیو بیٹا

(20) 

اور سوئے وطن جائیو جب قید سے چھٹ کر 

صغریٰ سے یہ کہیو مرے جانب سے مقرر

 بیبی تجھے بھولا نہیں میں بےکس-و-مضطر 

تھی یاد تری دل میں گلا تھا تہِ-خنجر

تقدیر نے زندہ ہمیں پھیرا نہ سفر سے

 اب حشر میں ہووے گی ملاقات پدر سے

(21) 

سجاد نے حضرت سے کہا تھام کے رقت 

کیا بندے کو مرنے کی نہ دیجے گا اجازت

 اس قیدِ-مصیبت سے تو بہتر ہے شہادت

 بن آپ کے ہے زیست مرے حق میں قیامت

یہ شدتِ-تپ اور یہ تنہائی ہماری 

گر آپ نے چھوڑا تو اجل آئی ہماری

(22)

 شہ نے کہا صدقے ترے مظلومی کے شبیر

 اے عابدِ-بےکس ہے یہی خواہشِ-تقدیر 

کس طرح سے تو حلق دھرے گا تہِ-شمشیر 

پیارے ترے حصے میں تو ہے طوقِ-گلو گیر

تا زیست تجھے باپ کے ماتم میں ہے رونا

 چالیس برس تجھ کو مرے غم میں ہے رونا

(23) 

ہر چند کہ ہے تم پہ فراقِ-پدری جبر

 جب تم نہ ہوئے کون بنائے گا مری قبر

 آجائے گا غش روؤ نہ بیٹا صفتِ-ابر 

اب گھر میں نہ ہم آئیں گے بابا کو کرو صبر

ناموسِ-رسولِ-دوسرا کو تمہیں سونپا 

سونپا تمہیں گھر اور خدا کو تمہیں سونپا

(24) 

غش ہوگئے سجادِ-حزیں سن کے یہ تقریر 

روتے ہوئے میداں کو چلے حضرتِ-شبیر

 صدمے سے ہوا زرد رخِ-زینبِ-دلگیر 

چلا کے کہا بانو نے ہائے ہائے مری تقدیر

اٹھتا ہے مرے شاہ کا سایہ مرے سر سے

 لوگو میں چھٹی جاتی ہوں زہرا کے پسر سے

(25) 

سمجھاتے تھے ایک ایک کو شہ با دلِ-ناشاد 

اے بیبیو بےفائدہ ہے نالہ-و-فریاد

 بھولو ہمیں اب خالقِ-اکبر کو کرو یاد 

شاکر رہو ہر دکھ میں کہ حق کا ہے یہ ارشاد

یہ سن کے ہر ایک تکتی تھی شبیر کی صورت

 شہ دیکھتے تھے رو رو کے ہمشیر کی صورت

(26) 

خیمے سے برآمد ہوئے آخر شہِ-صفدر 

سب بیبیاں ڈیوڑھی پہ رہیں کھولے ہوئے سر

 کیا کیجیے بیاں بےکسیِ-سبطِ-پیمبر

 بیٹا نہ بھتیجا نہ علمدار نہ لشکر

تھامے جو رکاب آپ کی اتنا نہ کوئی تھا

 رہوار تھا یا راکبِ-دوشِ-نبوی تھا

(27)

 کس یاس سے ہر چار طرف تکتے تھے سرور

 دکھلائی نہ دیتا تھا کوئی مونس-و-یاور 

روکر کبھی چلاتے تھے آؤ علی اکبر 

دل تھام کے کہتے تھے کبھی ہائے برادر

لو جلد خبر بےکس-و-بےیار ہیں عباس

 تم تھامو رکاب آکے تو اسوار ہوں عباس

(28) 

رو رو کے یہ کہتے تھے شہنشاہِ-دوعالم

 مظلومیِ-شبیر پہ تھا خیمے میں ماتم

 ہرگز دلِ-زینب کو قرار آیا نہ اس دم

 چلاتی ہوئی ڈیوڑھی سے نکلی وہ بصد غم

اے بھائی دکھاؤں کسے تنہائی تمہاری

 تھامے گی رکاب آج یہ ماجائی تمہاری

(29) 

شہ نے کہا زینب تری الفت کے میں قرباں

 بھائی کے لیے پردے کا تم کو نہ رہا دھیاں 

پھر گھوڑے کے نزدیک گئے سرورِ-ذیشاں

 رو رو کے کہا لو بہن اللہ نگہباں

زینب نے رکھا ہاتھ رکابِ-شاہِ-دیں پر

 شبیر ہوئے جلوہ نما خانۂ-زیں پر

(30) 

میداں کو چلی سیدِ-بےکس کی سواری 

زینب گئی خیمے میں بصد گریہ-و-زاری 

جنگاہ میں پہنچا اسدِ-یزدائے-باری

 اس غیظ سے دیکھا کہ لگے کانپنے ناری

کیا رعب تھا کیا دبدبہ تھا ابن علی کا 

قبضے کی طرف ہاتھ نہ بڑھتا تھا کسی کا

(31) 

بچپن کا تھا مرکب تہ ران برق کی تمثال

 ہر مرتبہ چمکارتا تھا فاطمہ کا لال

 کہتے تھے ستمگار زہے حشمت-و-اجلال 

دیکھو تو ذرا شوکتِ-شبیرِ-خوش اقبال

لب تشنہ کئی دن شاہِ-مظلوم رہے ہیں

 پر شیر سے میداں میں کھڑے جھوم رہے ہیں

(32)

 دن ہوگیا جلوے سے رخِ-تاب کے مہتاب

 ابرو ہیں حریمِ-حرمِ-پاک کے محراب 

ہیں نرگسی آنکھیں تو ہے چہرہ گلِ-شاداب

 لب غیرتِ-یاقوت ہیں دنداں درِ-خوش آب

آئینہ ہے گردن تو صراحی سا گلا ہے 

حضرت کا بدن نور کے سانچے میں ڈھلا ہے

(33)

 اتنے میں ہوئے بڑھ کے رجز خواں شہِ-صفدر 

پہچانو مرے رتبے کو اے قومِ-ستمگر

 نانا ہے پیمبر مری ماں بنتِ-پیمبر 

بھائی حسنِ-سبزِ-قبا عاشقِ-داور

میں سرورِ-وانِ-چمنِ-شیرِ-خدا ہوں

 واللہ ڈرو مجھ سے میں شمشیرِ-خدا ہوں

(34)

 تم وہ ہو کہ لکھ لکھ کے خطِ-شوق بلایا

 میں وہ ہوں کہ گھر چھوڑ کے اس گرمی میں آیا 

تم وہ ہو کہ بےجرم-و-خطا مجھ کو ستایا

 میں وہ ہوں کہ شکوے کا سخن لب پہ نہ لایا

تم وہ ہو کہ تصویر پیمبر کی مٹا دی 

میں وہ ہوں کہ جس نے تمہیں بخشش کی دعا دی

(35) 

بےجاں کیے تم نے مرے یاور مرے پیارے

 میں رہ گیا سب جانبِ-فردوس سدھارے 

تم صبح-و-مسا رہتے ہو دریا کے کنارے

 بچے موئے جاتے ہیں مرے پیاس کے مارے

مہماں کو بھی ایذا کبھی دنیا میں ملی ہے؟

 پانی نہیں دیتے ہو یہ کیا بےادبی ہے

(36)

 کچھ بولے نہ حضرت کی سخن سن کے ستمگار

 اک بار بجے طبل ہوئی تیروں کی بوچھار 

کی سبطِ-پیمبر نے علم تیغِ-شرر بار

 بجلی کی طرح جا پڑا فوج میں رہوار

دم بند ہوئے تیغ سے بیداد گروں کے

 ہر چار طرف چھا گئے بادل سپروں کے

(37) 

کس سے ہو بیاں تیزیِ-تیغِ-شہِ-عالم 

ہنگامِ-رقم حرف کٹے جاتے ہیں باہم 

کہیے اسے برقِ-غضبِ-خالقِ-اکرم

 خوں‌ریز-و-جفاکار-و-سر انداز-و-شرر دم

جس غول پہ بجلی سی وہ جا پڑتی تھی تھم کے

 سر گرتے تھے مثلِ-تگرگ اہلِ-ستم کے

(38)

 میداں میں زبس خون کے دریا کا ہوا جوش

 مچھلی کی طرح لوٹتے پھرتے تھے زرہ‌پوش

 نامی جو بہادر تھے نہ تھا ان میں ذرا ہوش 

تھا شور کہ بس شمعِ-حیات اب ہوئی خاموش

کیا جاتے بھلا سبطِ-پیمبر کے برابر

 اک برق نکل جاتی ہے دو کر کے برابر

(39)

 کیا تیغ تھی کیا ضرب تھی العظمۃ‌للہ

 یاں کوہ جو ہووے تو کٹے مثلِ-پرکاہ 

دم لینے نہ دیتے تھے کسی کو شاہِ-ذی جاہ

 دوزخ کی طرف رن سے چلے جاتے تھے گمراہ

سو جاں سے فدا ضربتِ-دستِ شاہِ-دیں پر 

کتنے ہی تڑپتے نظر آتے تھے زمیں پر

(40) 

کرتا ہے علم سیفِ زباں راویِ-پر غم

 لڑتے ہوئے دریا پہ جو پہنچے شاہِ-عالم 

تھے گھاٹ جو روکے ہوئے واں سینکڑوں اظلم

 اک حملے میں ان سب کو کیا درہم-و-برہم

آئی جو ہوا اسپِ-شاہِ-تشنہ دہاں کو

 لٹکا دیا پانی پہ نظر کر کے زباں کو

(41) 

حضرت نے جو دیکھا کہ بہت تشنہ ہے رہوار 

ٹھکرا کے اسے ڈال دیا نہر میں اک بار 

فرمایا کہ سیراب ہو اے اسپِ-وفادار

 پروا نہیں ابھی گھیر نہ لیں پھر کہیں کفار

اور میں تو کبھی پانی سے لب تر نہ کروں گا

 پیاسے موئے عباس میں پیاسا ہی مروں گا

(42) 

بےجاں ہوئے بن پانی تڑپ کر علی اکبر

 ہاتھوں پہ مرے تشنہ دہن مرگئے اصغر

 دم توڑتی ہے خیمے میں پیاسی مری دختر

 اے گھوڑے تو منصف ہو میں پانی پیوں کیوں کر

اب دل کو مرے ساغرِ-کوثر کی ہوس ہے

 اور حلق کو آبِ-دمِ-خنجر کی ہوس ہے

(43) 

راکب کی جو تقریر سنی گھوڑے نے ساری

 اک ندی ہوئی آنسوؤں کی چشموں سے جاری

 رو رو کے یہ کی عرض کہ اے عاشقِ-باری 

سیراب ہوں میں اور نہ بجھے پیاس تمہاری

حضرت کی طرح پانی سے بیزار ہوں آقا

 میں بھی نہ پیوں گا کہ وفادار ہوں آقا

(44)

 رونے لگے یہ سن کے شہِ-بےکس-و-بے پر

 پھر سوچ کے کچھ پانی بھرا چلو کے اندر 

چاہا جو ہے شاہ نے کہ لبِ-خشک کریں تر

 چلا کے یہ تب کہنے لگا اک ستمگر

پانی سے ابھی حلق نہ تر کیجیے حضرت

 گھر لٹتا ہے ہاں جلد خبر لیجیے حضرت

(45)

 تاراج ہوا اہلِ-حرم کا زر-و-زیور 

سیدانیاں خیمے سے نکل آئیں ہیں باہر 

یہ سنتے ہی شاہِ-دو جہاں ہوگئے مضطر

 اس پانی کو بس پھینک دیا نہر کے اندر

لے تیغِ-دو دم ہاتھ میں گھوڑے پہ سنبھل کر

 خیمے کو لگے دیکھنے دریا سے نکل کر

(46)

 گھر سیدِ-مظلوم کو سالم نظر آیا 

مطلق اثر اس شامی کی باتوں کا نہ پایا 

عباس کے لاشے کو جو دیکھا تو سنایا

 اے بھائی خبر لو ہمیں اعدا نے ستایا

گھر ہوگیا ویراں علی اکبر گئے مارے 

اٹھ کر ہمیں پرسہ دو کہ اصغر گئے مارے

(47)

 رو رو کے ابھی کہتے تھے یہ سبطِ-پیمبر 

جو گھیر لیا فوجِ-ستمگار نے آکر

 تیر ایسے پڑے چھن گیا سارا تنِ-انور

 سینے پہ پڑیں برچھیاں اور پہلو پہ خنجر

ٹکڑے ہوا تیغوں سے عمامہ شہِ-دیں کا

 آلودۂ-خوں ہوگیا جامہ شاہِ-دیں کا

(48) 

زخمی جو بشدت ہوا زہرا کا وہ جانی

 طاقت تو گھٹی اور بڑھی تشنہ دہانی

 تلواریں لگاتے تھے کھڑے ظلم کے بانی

 ہونٹوں پہ زباں پھیر کے شاہ کہتے تھے پانی

کرتا تھا کوئی رحم نہ اس تشنہ دہن پر

 پانی کے عوض تیر برستے تھے بدن پر

(49) 

فرماتے تھے افسوس نہ رتبہ مرا جانا 

اے ظالمو اچھا نہیں زہرا کا ستانا 

سمجھے ہو گناہ پیاسے کو پانی کا پلانا 

ملبوسِ-نبی کرتے ہو تیروں کا نشانہ

تلواریں یہ سب چلتی ہیں حیدر کے جگر پر 

پڑتے ہیں یہ سب تیر پیمبر کے جگر پر

(50) 

سنتے تھے نہ مظلوم کی فریاد ستمگر

 اک پیاسے پہ ٹوٹا ہوا تھا شام کا لشکر

 بہہ بہہ کے لہو زخموں سے گرتا تھا زمیں پر 

رہوار بھی مجروح تھا تیغوں سے برابر

لگتے تھے جو پیکانِ-ستم چہرے پہ آکر

 ہر مرتبہ خوں جھاڑتا تھا سر کو پھراکر

(51) 

اتنے میں چھدا تیر سے حلقِ-شہِ-ابرار

 پیکانِ-ستم گردنِ-انور سے ہوا پار

 حلقوم سے کھینچا جونہی وہ ناوکِ-خوں‌خوار 

فوارے کی مثل چھوٹی خون کی اک دھار

صدمہ تھا عجب دوشِ-محمد کے مکیں پر 

گرتا تھا گریباں سے لہو دامنِ-زیں پر

(52) 

پیشانی پہ اک تیر لگا اور بھی کاری

 آلودۂ-خوں ریش مبارک ہوئی ساری

 مل مل کے لہو چہرے پہ وہ عاشقِ-باری

 کہتا تھا کچھ امت نے نہ کی قدر ہماری

فردوس میں جاکر یونہی بابا سے ملوں گا

 جنت میں اسی طرح میں نانا سے ملوں گا

(53) 

ناگاہ بنِ وہب نے اک برچھی لگائی

 تھی زہر میں ظالم نے سناں اس کی بجھائی

 وہ دلبرِ-زہرا کے کلیجے میں در آئی

 گردن شہِ-مظلوم نے ہرنے پہ جھکائی

سنبھلا نہ گیا دوشِ-محمد کے مکیں سے

 یا شیرِ-خدا کہہ کے گرے خانۂ-زیں سے

(54) 

سب زخمِ-بدن پھٹ گئے گرتے ہی زمیں پر

 بسمل کی طرح خوں میں تڑپتے گئے سرور

 آلودہ ہوئے خاک سے گیسوِ-منور

 تلواریں لگانے لگے گرد آکے ستمگر

تھی خشک زباں بول نہ کچھ سکتے تھے حضرت

 مظلومی سے اک اک کا منہ تکتے تھے حضرت

(55) 

چلاتی تھی ڈیوڑھی پہ کھڑی خواہرِ-شبیر

 اس بےکس-و-مظلومی کے صدقے ہو یہ ہمشیر

 دم توڑتے ہو پانی پلاتے نہیں بےپیر 

اب رن میں نکل آتی ہوں میں بےکس-و-دلگیر

تلواریں پڑیں گی تو نہ گھبراؤں گی بھائی

 میں آپ کو خیمے میں اٹھا لاؤں گی بھائی

(56)

 ریتی پہ تڑپتے ہو تمہیں کون اٹھائے 

ہائے ہائے کسے بھیجوں جو لعینوں سے بچائے

 ہائے ہائے کہوں کس سے کہ تمہیں پانی پلائے

 ہائے ہائے کسے ماجائی ترا حال دکھائے

یا حیدر-و-صفدر تمہیں امداد کو پہنچو

 بھائی کا گلا کٹتا ہے فریاد کو پہنچو

(57)

 فریاد سنی زینبِ-ناشاد کی جس دم 

خیمے کی طرف تکنے لگے سیدِ-اکرم 

دیکھا کہ یہ ہے خواہرِ-غم دیدۂ-عالم 

سر پیٹتی ہے ہاتھوں سے اور کرتی ہے ماتم

تھامے ہیں کئی بیبیاں اس خستہ جگر کو 

اس صدمے سے غش آگیا زہرا کے پسر کو

(58) 

لشکر سے بڑھا شمرِ-لعیں کھینچ کے خنجر

 فریاد ہے چھاتی پہ چڑھا شہ کی ستمگر

 زانو سے دبا سینۂ-زخمی جو سراسر 

اس وقت لہو منہ سے اگلنے لگے سرور

خنجر کو رکھا شہ کے گلے پر جو لعیں نے

 تکبیر کہی کھول کے آنکھیں شہِ-دیں نے

(59) 

ظالم کو زباں سوکھی دکھائی کئی باری

 پانی نہ دیا ذبح لگا کرنے وہ ناری 

جب تک کہ گردن کی رگیں کٹ چکیں ساری

 تکبیر رہی شاہ کے لبِ-خشک پہ جاری

جس وقت جدا ہوگیا سر تیغ سے کٹ کر

 خم ہوگیا قبلے کی طرف جسم الٹ کر

(60)

 غل پڑگیا بےسر ہوا سردارِ-دوعالم 

خنجر سے دل-و-جانِ-نبی ہوگیا بیدم 

خاموش انیس اب کے پڑھا بزم میں ماتم 

اب خالقِ-اکبر سے دعا مانگ یہ اس دم

غیر از غمِ-شبیر کوئی غم نہ ذرا دے 

یا رب مجھے توقیرِ-تفکر سے چڑھا دے