Aaj shabbir pe kya aalam e tanhaai hai

(1)

Aaj shabbir pe kya aalam-e-tanhayi hai

Zulm ki chand pe zahera ki ghata chhayi hai

Uss taraf lashkar-e-aada me saf-aarayi hai

Yaan na beta na bhatija na koie bhayi hai

Barchiyaan khaate chale jaate hain talwaro mein

Maarlo pyaase ko hai shor sitamgaaro mein

(2)

Zaqmi baazu hai kamar kham hai badan me nahi taab

Dagmagaate hain nikal jaati hai qadmo se rakaab

Pyaas ka gaalba hai lab khushk hai aankein hai pur-aab

Tegh se dete hain har daar ka aada ko jawaab

Shiddat-e-zaaf me jis jaa pe taher jaate hain

Saikado teer-e-sitam tann se guzar jaate hain

(3)

Geysu-aalooda khoon lipte hain rukhsaaro se

Shaane kat kat ke latak aaye hain talwaro se

Teer-paiwast hai khoon behta hai soofaaro se

Laakh aafat me hai ek jaan dil-aazaaro se

Fikr hai sajda-e-maabood me sar dene ki

Waar se tegho ki fursat nahi dum lene ki

(4)

Khoon se tar peych amaame ke hain sar zakhmi hai

Hai jabeen chaand si pur-noor magar zakhmi hai

Seena sab barchiyon se taaba kamar zakhmi hai

Teer-e-bedaad se dil zakhmi jigar zakhmi hai 

Zarb-e-shamsheer se bekaar hai baazu dono

Zulm ke teero se majrooh hai pahelu dono

(5)

Barchi aakar koie pahelu mein laga jaata hai

Maarta hai koie naiza to ghash aa jaata hai

Badhte hain zakhm-e-badan zor ghata jaata hai

Band aankhein hain sar-e-paak jhuka jaata hai

Gird zahera-o-ali girya kuna phirte hain

Ghul hai ghode se imaam-e-do-jahan girte hain

(6)

Girte hain qatra-e-khoon zakhm-e-jabeen se paiham

Dast-e-majrooh se khinch sakte nahi teer-e-sitam

Fikr hai bakshish-e-ummat ki kuch apna nahi ghum

Karte hain shukr-e-khuda khush zabaan se har dum

Hai abaa teero se gurbaal qabaa ghulgoo.n hai

Hont yaqoot se zakhmi hai dahan purqo hai

(7)

Zeen se hota hai juda dosh-e-mohammad ka makeen

Chaman-e-fatima ka sarv hai maayil ba zameen

Barchiyaan gird hain aur beechme hain sarwar-e-deen

Hai ye nazdeek gire mohr-e-nabuwwat ka nageen

Paaon har baar rakaabo.n se nikal jaate hain

Ya Ali kaheti hai zainab to sambhal jaate hain

(8)

Laakh talwarein hain aur ek tan-e-athar hai

Ek mazloom hai aur zaalimo ka lashkar hai

Saikado khanjar-e-faulaad hai aur ek sar hai

Na koie yaar na humdum na koie yaawar hai

Baag ghode ki latakti hai utha sakte nahi

Saamne ahle-haram rote hain jaa sakte nahi

(9)

Koie sayyad ka nahi aah bachane waala

Harbe laakhon hain aur ek zaqm uthaane waala

Pyaas me koie nahi paani pilaane waala

Sambhle kis tarha bhala barchiyaan khaane waala

Charq se aag barasti hai zameen hilti hai

Maare garmi ke zabaan khushk hai loo chalti hai

(10)

Kahin dum lene ko saaya nahi hai waqt-e-zawaal

Ainthi jaati hai zabaan pyaas ki shiddat hai kamaal

Kabhi zainab ka hai ghum gaah-e-sakina ka qayaal

Din jo dhalta hai to hazrat huey jaate hai nidhaal

Misl-e-khursheed badan zaaf se tharraataa hai

Nayyar-e-burj-e-imaamat pe zawaal aata hai

(11)

Kahete hain zaalimo se khushk zabaan dikhlaakar

Bahr-e-haq paani ka ek jaam pilado laakar

Ahle-keen kahete hain ye tegh-e-sitam chamkakar 

Aab-e-shamsheer piyo barchiyon ke phal khaa kar

Ye sukhan sunke bhi gussa nahi farmaate hain

Yaas se su-e-falak dekh ke rahe jaate hain

(12)

Arz karte hain ye khaaliq se ke ay rabb-e-gafoor

Tu hai aalim ke nahi kuch tere bande ka kusoor

Karte hai ye mujhe be jor-o-jafa teghon se choor

Haath ummat pe uthaana nahi mujhko manzoor

Jaante hain ke mohammad ka nawaasa hoon mai

Paani dete nahi do roz ka pyaasa hoon mai

(13)

Tune bachpan se mere naaz uthaaye ya rab

Wo inaayaat kiya jo tuhse kiya maine talab

Tera mehboob bana eid ko mera markab

Roza rakha to chhupa mehr numaiyan huie shab

Bhook me khuld ka khaana mujhe imdaad kiya

Bhej kar hirni ka bacha mera dil shaad kiya

(14)

Ab agar hai ye teri maslehat ay rabb-e-qadeer

Ho rawaan halq pe iss pyaase ke aab-e-shamsheer

Mere moula ba sar-e-chashm hai haazir shabbir

Hukm-e-haakim ye taaqat hai karun mai taaqir

Jald gardan pe rawaan khanjar-e-baaraan howe

Ay khusha wo jo teri raah me qurbaan howe

(15)

Ghum nahi kuch mujhe go bekas-o-be yaar hoon mai

Zer-e-shamsheer gala rakhne ko tayyaar hoon mai

Tu madadgaar hai mukhtaar hai laachaar hoon mai

Waqt-e-mushkil hai inayat ka talabgaar hoon mai

Tere sajde me ye sar tan se juda hojaawe

Ahad-e-tifli ka jo waada hai wafa hojaawe

(16)

Sakhtiyaan marg ki kar apne karam se aasaan

 Lab ba taqbeer ho jab halq pe khanjar ho rawaan

 Dil me ho yaad teri band ho jis waqt zabaan

 Dum bharun tera hee tan se jo nikalne lagi jaa.n

Baad-e-chehlum jo mujhe qabr mayassar howe

Zakhmi tan par na fishaar ay mere daawar howe

(17)

Rahem kar rahem kar sharminda hoon ay baar-e-khuda

Bandagi ka jo tere haq tha ada ho na saka

Khauf-e-mehshar se badan kaampta hai sar taa pa

Hogi aamaal ki pursish to kahunga mai kya

Koie tohfa tere laayaq nahi paata hai hussain

Haath khaali tere darbaar me aata hai hussain

(18)

Taqviyat dil ko karam se hai tere ya raheman

Nahi maayoos ke rahemat hai tere be-paayaan

Mushkilein bandon ki kar deta hai dum me aasaan

Shukr-e-altaaf-o-inaayaat me khaasir hai zabaan

Aasiyo se bhi mohabbat nahi kam karta hai

Jurm wo karte hain tu lutf-o-karam karta hai

(19)

Mai teri raah me mazloomi se hota hoon fida

Tu hai aagaah ke do din ka hoon bhooka pyaasa

Chaahta hoon mai yahi apni shahadat ka sila

Maghferat-e-ummat-e-aasi ki ho ay baar-e-khuda

Hai gawaara mujhe jo kuch ke aziyyat howe

Unko duniya me bhi uqbaa me bhi raahat howe

(20)

Arz karte the ye khaaliq se shah-e-banda-nawaaz

Yak-ba-yak aalam-e-baala se ye aayi aawaaz

Ay mere sher ke farzand nabi ke dum-saaz

Tujhse hum khush hai pazeera hai tera ajr-o-niyaaz

Mard hai aashiq-e-kaamil hai wafadaar hai tu

Jo kaha wo hee kiya saadiq-ul-iqraar hai tu

(21)

Tu bhi maqbool hai aur teri ibaadat bhi qubool

Ye ita'at bhi hai maqbool ye ta'at bhi qubool

Aajzi bhi teri maqbool shahadat bhi qubool

Teri qatir hai hume bakshish-e-ummat bhi qubool

Hum ne kheel shohada ka tujhe sardaar kiya

Ummat-e-ahmad-e-mukhtaar ka mukhtaar kiya

(22)

Dost daaro ka tere gulshan-e-jannat hai maqaam

Taa abad saaya-e-tooba me karenge aaraam

Honge mehshar me tere saath azadaar tamaam

Tujh pe jo royenge aanch unpe hai dozaq ki haraam

Ghum na kha ahle-jahan tere mohib saare hain

Tu hai pyaara tere pyaare bhi hume pyaare hain

(23)

Honge har ranj se mehfooz tere taaziyadaar

Sakhti-e-marg na unko hai na eeza-e-fishaar 

Dum-e-murdan nazar aawega ali ka deedaar

Qabr se gulshan-e-fidaus ki dekhenge bahaar

Daar duniya me hain jo sau inhe eeza hai

Aankhein jab band huie phir dar-e-jannat waan hai

(24) 

Tujhsa aabid na hua hai na koie howega

Teer kha kha ke kisi ne bhi hai yun shukr kiya

Taa'at-e-khalq se ek sajda hai afzal tera

Arsh-e-aazam pe malaik teri karte hain sana

Saara ghar meri mohabbat me fana tune kiya

Bandagi ka tha jo kuch haq wo ada tune kiya

(25)

Hashr tak royega mazloomi pe teri aalam

Tera maatam nahi howega jahan me kabhi kam

Roza-e-paak ko tere ye sharaf bakshenge hum

Aayenge jiski ziyaarat ko malak hoke baham

Ye zameen arsh se rutbe me siwa howegi

Khaak turbat ki teri khaak-e-shifa howegi

(26)

Ye sada sunke huey shaad shah-e-har dosara

Aagayi az sar-e-nau jism me taaqat goya

Jhuk ke sajde ki taraf ijz se rokar ye kaha

Mere moula mai teri banda-nawaazi ke fida

Kyun na mumtaaz ho wo tu jise rutba bakshe

Iss kaf-e-khaak ko kya rutba-e-aala bakshe

(27)

Abhi moula ne sar-e-ijz uthaya hi na tha

Neza ek chhati pe maara jo kisi ne naagaah

Ghash me girne lage ghode se imam-e-zee jaah

 Aayi khaatun-e-qayamat ki sada bismillah

Thaamne aaye ali khuld se ghabraaye huey

Daude mehboob-e-khuda haath ko phailaaye huey

(28)

Ek jafa-keesh ne phir pahelu pe neza maara

Chhid gaya tod ke chhati ko kaleja saara

Pusht-e-taazi pe sambhalne ka na paaya yaara

Gir pada khaak pe wo arsh-e-khuda ka taara

Gard-aalood qabaa-e-shah-e-pur-noor huie

Reyt zaqmo ke liye marham-e-kaafoor huie

(29)

Khaak-o-khoon me jo tadapte the shahenshah-e-zaman

Ghull ke maanind khule jaate the sab zaqm-e-badan

Talab-e-aab me khole huey the khushk dahan

Gard khinchte huey talwarein khade the dushman

Ghum-e-naamoos bhi tha pyaas ki bhi shiddat thi

Phir sakina ko na dekh aaye yahi hasrat thi

(30)

Kaan me aati thi zainab ki sada-e-jaankaah

 Dil tadap jaata tha karte the ajab dard se aah

Raah roke huey khaime ki khade the gumraah

Neem wa chashm se karte the su-e-khaima nigaah

Tan-e-zaqmi pe jo paikaan-e-sitam gadte the

Khaak se uthte the aur kaamp ke gir padte the

(31)

Kaheta tha fauj me sab se umar bad-akhtar

Khinche kyun tegho ko haatho me khade ho shashdar

Reg-e-taftida hai ghash me ali ka dilbar

Jaao kya der hai kaato shah-e-mazloom ka sar

Tegh se fatima zahera ka gala chaak karo

Jald haan khaatima-e-panjatan-e-paak karo

(32)

Aise mazloom ka sar kaatna kya hai dushwaar 

Jiska koie bhi madadgaar na humdard na yaar

Auratein hai kaie qaimo me gareeb-o-naachaar

Marchuke pahle hi jo khoon ke the daawe daar

Khoon baha bhi na koie maangne ko aawega

Ab pisar hai so wo beemaar hai marjawega

(33)

Kaamp kar kahete the sab humse na hoga ye sitam

Zibha farzand-e-mohammad ko nahi karne ke hum

Aise mazloom ke chhati pe jo rakhega qadam

Paaun jal jaayega tharrayega arsh-e-aazam

Peet te qabr se mehboob-e-khuda aawenge

Ba-khuda fatima ki aah se jal jaawenge

(34)

Kaun bekas ko bhala zibha kare be-taqseer

Pherta hai koie pyaase ke gale par shamsheer

Go ke bekas hai pa aasaan nahi qatl-e-shabbir 

Hashr me hoyenge mehboob-e-khuda daaman-e-geer

Tu samajhta hai ke iska koie khoon-khwaah nahi

Binte-ahmad nahi haider nahi allah nahi

(35)

Tha jo dumsaaz umar ibne nayyur azlam

Badhke tegh usne sar-e-shaah pe maari uss dum

Taa jabeen hogaya majrooh sar-e-shaah-e-umam

Thaam kar sar ko pukare ye imaam-e-aalam

Na mayassar tujhe iss haath se khaana howe

Tu tahi-dast jahannum ko rawaana howe

(36)

Chaaha zaalim ne ke phir shah pe kare tegh ka waar

Dekha angusht ba dandaa.n me rasool-e-mukhtaar

Khushk uss waqt huey dast-e-sitamgaar ekbaar

Haath se tegh giri khauf se bhaaga khoon-khwaar

Yaan sar-e-paak se hazrat ke lahu jaari tha

Kham su-e-qibla the band aankhein thin ghash taari tha

(37)

Jab tadapne ki bhi taaqat na rahi sarwar ko

Ghul hua ye ke ghash aaya khalaf-e-haider ko

Fauj se shimr utha khinche huey khanjar ko

Sab se kaheta tha ke ab kaato sar-e-sarwar ko

Khalaf-e-ahmad-e-mukhtaar ka qatil hoon main

Kaam mera hai isi kaam ka qabil hoon mai

(38)

Mujhko haider se garaz hai na mohammad se hai kaam

Rodein mehboob-e-khuda howe khushi haakim-e-shaam

Daulat-e-fatima le jaaun mai paaun inaam

Rooh haider ki ho be-chain mujhe ho aaraam

Muh na main daulat-e-duniya se kabhi pherunga

Aaj zahera ke kaleje pe chhuri pherunga

(39)

Tez karta hua khanjar ko gaya shah ke kharee.n

Aasmaa.n hilgaya tharragayi maqtal ki zamee.n

Ro ro chillane lagi zainab-e-naa-shaad-e-hazee.n

Ghash me bhi ghere hain hai hai mere bhayi ko laee.n

Rahem zahera ke pisar par nahi khaata koie

Khaak se bhi nahi zakhmi ko uthaata koie

(40)

Kis se fariyaad karun jaake mai dekha haye haye

 Na mohammad hai na haider hai na zahera haye haye

 Laakh dushman hai meera bhayi hai tanha haye haye

 Tegho se katt ta hai zahera ka kaleja haye haye

 Sarv-e-gulzaar-e-risaalat ko khalam karte hain

Haaye sayyad pe musafir pe sitam karte hain

(41)

Gard zainab ka tha namoos-e-payambar ka hujoom

Bano roti thi khadi peet ti thi sar kulsoom

Kaheti thi dekh ke maidaan ko sakina masoom

Ay phupi narga-e-aada me hain shaah-e-mazloom

Jaaungi ab mai taherne ki nahi aapke paas

Shimr khanjar liye jaata hai mere baap ke paas

(42)

Baap ke paas se jaakar usey sarkaaungi

Jod kar haatho ko minnat se mai samjhaungi 

Apne baba ki mai chhati se lipat jaaungi

Qaime tak unko samhale huey le aaungi

Bhooke pyaase mere baba ko na maare koie

Unke badle mera sar tan se utaare koie

(43)

Kitna roka usay bano ne pa hargiz na ruki

Chhote se haatho se sar peet thi maidaan ko chali

Peeche sar khole huey qaime se zainab nikli 

Pahunchi qaime me sakina ye umar se boli

Oo laeen haider-e-karrar ki poti hoon main

Rahem kar mujh pe ke bin baap ki hoti hoon main

(44)

Dekh gurbat ko meri kar mere bachpan pe nazar

Baap maara gaya mera to jiyungi kyun kar Sar

 pe aawegi yateemi to mai jaaungi kidhar 

Mai to hoon baap ki shayda mera aashiq hai padar

Baap bin ek dum aaraam na aawega mujhe

Kaun phir raat ko chhati pe sulayega mujhe

(45)

Hansliyaan apni gale se tujhe deti hoon utaar

Le mere kaan ka durr par mere baba ko na maar

Haatho ko jodti hoon mai tere aage naachaar

Mana karde koie bekas ko na maare talwaar

Ghar me jo kuch zar-o-zewar hai wo laa dungi main

Jaan baba ki bachegi to dua dungi main

(46)

Bheed me mujhko nazar aate nahi baba jaa.n

Itna kahede ke sarak jaayein ye sab be-imaa.n

Gard phir phir ke mai houn apne padar ke qurbaa.n

Jaake dekhungi badan par hai lage zaqm kahan

Dum-e-aakhir to bhala kaam mai aaun unke

Apne kurte se lahu muh ka chhudaau unke

(47)

Kitna kaheti rahin wo binte shah-e-arsh janaab

Uss sitamgar ne diya kuch na sakina ko jawaab

Peet kar sar kaha zainab ne ke oo khaana kharaab

Tujhko aata nahi kuch rooh-e-payambar se hijaab

Zulm mat kar asadullah ki jaayi hoon main

Nange sar parde se bahar nikal aayi hoon main

(48)

Meri amma ka hai mashhoor jahan me parda

Baade rahelat bhi janaza na kisi ne dekha

Uski beti hoon tere zulm se ye waqt pada

Sar barehna hoon garebaan bhi hai kurte ka phata

Muh ko allah-o-payambar se chupaata hai tu

Main to fariyaadi hoon aur aankh churaata hai tu

(49)

Maara jaata hai tere saamne zahera ka pisar 

Dekhta hai tu ye talwarein hain padti kis par 

Teer kisko lage gurbaal hua kiska jigar

Zibha karne ko kise khinchte hain zaalim khanjar

Dil-e-zahera jigar sher-e-khuda kat tha hai 

Zulm se tere mohammad ka gala kat tha hai

(50)

Qatl mazloom ko kyun karta hai be-jurm-o-gunaah

Ab talak maine bahot sabr kiya hai wallah

Dil jali hoon main abhi seene se khinchungi gar aah

Tu bhi jal jaaye teri fauj bhi ho khaak siyaah

Bad-dua doon main to naazil abhi aafat howe

Sar ke baalo ko jo kholun to qayamat howe

(51)

Ghash me hazrat ne sune jabke ye zainab ke sukhan

Khol kar deeda-e-purr-khoo.n ko uthaayi gardan

Dekha sar nange khadi roti hai maqtal me bahan

Binte-zahera ko pukaare ye shahenshah-e-zaman

Kya kiya tumne ke parde se khule sar niklin

Jeete ji mere sar parde se bahar niklin

(52)

Kisko samjhaati ho koie na sunega fariyaad

Baaz aayega nahi qatl se mere jallaad

Jitna tum peet thi ho aur laeen hote hain shaad

Hashr ke roz khuda dewega iss khoon ki daad

Shauq marne ka hai sar tan se juda hone do

Jaao ghar me mujhe ummat pe fida hone do

(53)

God me meri sakina ko uthaao humsheer

Koie asghar ki tarha maar na baithe isey teer

Phir ye beti ko pukaare tere sadqe shabbir 

Tu bhi jaa saath phupi jaan ke ab ay dilgeer

Waqt-e-ta'at hai zara yaad-e-khuda karleinwein

Hum bhi ab aate hain sajde ko ada karleinwein

(54)

Kaheke ye ghash huey phir rann me shahenshah-e-umam

Shimr-e-azlam ne rakha seena-e-akhdas pe khadam

Jigar-e-fatima zahera pe chali tegh-e-do-dum

Aah zainab ke huey zibha hussain aah sitam

Peetkar binte shahenshah-e-zaman rone lagi

Baap ko beti baradar ko bahan rone lagi

(55)

Fatha ka fauj-e-mukhaalif me baja naqqaraa

Ghul hua qatl hua sher-e-khuda ka pyaara

Bas anees ab goyayi ka mujhko yaara

Ghum se khoo.n hogaya seene me kaleja saara

Kis se iss dard-e-musibat ka baya.n hota hai

Aankhein rotin hai khalam rota hai dil rota hai