Bismi Rabbil Hussain
(1)
Abbas-e-ali sher-e-nayastaan-e-najaf hai
Taabindah dur-e-taaj-e-sulayman-e-najaf hai
Sarv-o-chaman-o-khizr-o-bayaabaan-e-najaf hai
Aayina-e-ru-e-ma-e-kan’aan-e-najaf hai
Tifli se usay ishq-e-imaam-e-dosara tha
Shah uspe fida the wo shah-e-dee.n pe fida tha
(2)
Kya dabdaba kya shaan thi kya saulat-o-shaukat
Kya husn tha kya khalq tha kya chashm-e-muravvat
Kya hilm tha kya rob tha kya quvvat-o-qudrat
Kya rahem tha kya adl tha kya bakshish-o-himmat
Jabtak ma-o-khursheed me ye noor rahega
Aalam me alamdaar ka nazkoor rahega
(3)
Allah re nasab waah re tauqeer zahe jaah
Dada to abutaalib-e-ghazi sa shahenshah
Um jaafar tayyaar hunar bar saf-e-jangaah
Aur waalid-e-maajud ko jo pucho asadullah
Fakhr unko ghulaami ka hussain ibn-e-ali ki
Maadar ko kaneezi ka sharaf bint-e-nabi ki
(4)
Har chandd na tha batan se zahera s.a ke wo mah-ru
Lekin kisey haath aata hai iss tarha ka baazu
Bachpan me jo chhoda na tha shabbir ka pahelu
Thi taba’ me saari gul-e-zahera hi ki khu buu
Khalq aamee.n jawaa.n-mardi-e-shaah-e-najaf isme
The ilm-e-imaamat ke siwaa sab sharaf isme
(5)
Paidaaish-e-abbas ka ye haal hai tehreer
Jab khuld ko duniya se huey fatima rahgeer
Yaawar thi zebas maadar-e-abbas ki taqdeer
Hum bistar-e-haidar huie wo saahib-e-tauqeer
Jis roz se aayi thi yadullah ke ghar me
Rehti thi shab-o-roz tamanna-e-pisar me
(6)
Daawa-e-kaneezi tha usay bint-e-nabi se
Tha uns bahot aal-e-rasool-e-arabi se
Matlab na tha apni usay haajat talabi se
Aagaah thi shabbir ki aali nasabi se
Masroof wo fizza se bhi khidmat me siwaa thi
sau jaan se farzando pe zahera ke fidaa thi
(7)
Haidar se kabhi puchti thi ya shah-e-safdar
Dono me bahot chaahte the kisko payambar
Uss bibi se farmaate the ye faatah-e-khaibar
Ulfat thi mohammad ko nawaaso se baraabar
Ye dono dil-o-jaan-e-rasool-e-do-saraa the
Sadqe kabhi uss par the kabhi ispe fidaa the
(8)
Jab mas’haf-e-naatiq se suni ussne ye taqreer
Ki haq se munaajaat ke ay maalik-e-taqdeer
Gar de tu mujhe ek pisar saahib-e-tauqeer
Mai usko khushi hoke karun fidiya-e-shabbir
Mumtaaz ghulaamo me jo zirgaam ho mera
Zahera ki kaneezo me badaa naam ho mera
(9)
Shabbir ka tha naam munaajaat me daakhil
Kis tarha na maqbool kare khaaliq-e-aadil
Jald usko samar nakhl dua ka hua haasil
Allah ne baksha pisar-e-nek shumaail
Khul aayi jo tasweer pisar-e-lakht-e-rasaa ne
Abbas-e-ali naam rakha sher-e-khuda ne
(10)
Shabbir ko abbas ki maadar ne bulaaya
Aur god mein farzand ko dekar ye sunaaya
Lo waari wafaadaar ghulaam aapne paaya
Naalain uthaayega tumhaari mera jaayaa
Aaqa ho shahenshah ho sardaar ho iske
Maalik ho tumhi aur tumhi mukhtaar ho iske
(11)
Chhaathi se lagaakar usay bole shah-e-khush khu
Ye taqviyat-e-rooh hai aur quvvat-e-baazu
Iss gul se wafaadaari ki aati hai mujhe boo
Kitna mere baba se mushaaba hai ye gulru
Ye sher madadgaari-e-shabbir karega
Allah isay saahib-e-tauqeer karega
(12)
Jab saat baras ka hua wo geysuvo walaa
Maa ne kaha tumne meri jaa.n hosh sanbhaala
Maani thi ye nazr aur tha isi waaste paala
Ab tumko karungi mai nisaar-e-shah-e-waala
Haq ulfat-e-zahera ka adaa karti hoon beta
Jo ahad kiya usko wafaa karti hoon beta
(13)
Khush ho ke ye ki hazrat-e-abbas ne taqreer
Ye ayn tamanna hai hou.n fidiya-e-shabbir
Haazir hoon karo jald fidaa hone ki tadbeer
Laazim nahi amma amal-e-khair me taakheer
Go umr me chhota hai gul andaam tumhaara
Par khalq me howega badaa naam tumhaara
(14)
Maadar ko ye farzand ki taqreer khush aayi
Leleke balaayein usay poshaak pehnaayi
Pakde huey haath aage yadullah ke laayi
Ki arz ke laundi ne jo daulat hai ye paayi
Tha deen adaa karne ka isske mere sar par
Ab isko fida kijiye zahera ke pisar par
(15)
Kuch sochke farzand se haidar ne ye pucha
Shabbir pe maa tujhko fidaa karti hai beta
Abbas bataade mujhe marzi hai teri kya
Wo ahl-e-wafaa jodke haatho ko ye bolaa
Mai aashiq-e-farzand-e-rasool-e-dosara hoon
Sau baar jo zinda hoon to sau baar fidaa hoon
(16)
Rokar asadullah ne dekha rukh-e-shabbir
Jangaah ke aankho ke tale phir gayi tasveer
Pyaaso ka khayaal aagaya haalat huie taageer
Yaad aayi bhari mashk kaleje pe lagaa teer
Taaqat na rahi zabt ki ahmad ke wasi ko
Nazdeek tha sadme se ghash aajaaye ali ko
(17)
Abbas ko liptaake gale karne lage pyaar
Choome kabhi abbas ke baazu kabhi rukhsaar
Farmaate the tujhsa nahi duniya me wafaadaar
Sadqe tere ay dilbar-e-zahera ke madadgaar
Maatam tera har taaziya khaane me rahega
Shohraa teri ulfat ka zamaane me rahega
(18)
Mujmal jo kiya mukhbir-e-saadiq ne ye akhbaar
Kuch pooch sake aage na abbas-e-alamdaar
Gardish pe jab aaya falak-e-sho’bdah kirdaar
Mehmaan huey koofiyo ke sayyad-e-abraar
Paani jo hua band dil-o-jaan-e-nabi par
Uss roz khula haal dil abbas-e-ali par
(19)
Subha shab-e-ashoor huie jabke namoodaar
Sar dene lage jins-e-shahaadat ke talabgaar
Rote the jo har laash pe jaakar shah-e-abraar
Ghum ki dil-e-abbas pe chal jaati thi talvaar
Kehte the ke rukhsat ka bahaana nahi milta
Sab jaate hain marne hamein jaana nahi milta
(20)
Jab qatl hua sayyad-e-masmoom ka dilbar
Likha hai nikal aaye haram khaime ke baahar
Shabbir chale laash ke tukdo ko jo lekar
Abbas bhi humraah the nehwaade huey sar
Tha sonch ke be jaa.n hua farzand hasan ka
Sar peetna dekha nahi jaayega dulhan ka
(21)
Rote huey abbas gaye bhaayi ke humraah
Khaime me raha der talak maatam-e-naushaah
Laasho me litaa aaye usay jab shah-e-zee jaah
Sabse kaha ab bhaayi ka pursa do mujhe aah
Lo saaf jo tasveer liye jaate hain abbas
Be tegh humein zibha kiye jaate hain abbas
(22)
Kehkar ye sukhan roye jo shahinshaah-e-aalam
Naushaah ke maatam me hua aur bhi maatam
Ghabraake lagi peetne sar zainab-e-purghum
Nazdeek ye tha zauja-e-abbas ho be dum
Dil hilgaya seene me randaape ki khabar se
Ghabraake jo uthi to ridaa gir gayi sar se
(23)
Abbas se kuch kehne ka mauqa jo na paaya
Roti gayi aur ghash se sakina ko jagaaya
Kehne lagi sadqe gayi utho ghazab aaya
Utha hai mere sar se alamdaar ka saaya
Barbaad mai hoti hoon sanbhaalo mujhe bibi
Lillaah randaape se bachaalo mujhe bibi
(24)
The sahen me khaime ke to ye hashr ke aasaar
Dyodhi pe khade ro rahe the sayyad-e-abraar
Sar khole huey zauja-e-abbas-e-alamdaar
Abbas ke qadmo pe giri aan ke ekbaar
Chillaati thi muh laundi se moda mere saahib
Inn qadmo ke sadqe mujhe chhoda mere saahib
(25)
Haye haye mere waali mere waaris mere aaqa
Haye haye mere humdum mere monis mere shayda
Bache mere kamsin hain mai hoon bekas-o-tanha
Saahib mai kahan baithke kaatungi randaapa
Shamsheer gale par mere dharte huey jaao
Jaate ho to be sar mujhe karte huey jaao
(26)
Abbas ne jhuk kar usay qadmo se uthaaya
Aur ponchke roomaal se aansu ye sunaaya
Jeeta hoon abhi se hai ye kya haal banaaya
Bande ke liye kaafi hai allah ka saaya
Karta hoon adaa haq mai shah-e-tashna gulu ka
Do saath tum iss waqt me zahera ki bahu ka
(27)
Wo qaid agar hoyein to tum qaid me jaana
Shahzaadi ki qidmat se kabhi muh na phiraana
Rakhein wo jahan paaun wahan aankh bhichaana
Haidar ki bahu hoon ye kabhi dhyaan na laana
Go samjhe wo shafqat se azeezo ke baraabar
Tum jaaniyo qadr apni kaneezo ke baraabar
(28)
Jaao jo watan dijiyo amma ko ye paighaam
Jo aapne farmaaya tha wo maine kiya kaam
Kaandhe pe uthaaya alam-e-lashkar-e-islam
Saqqa-e-haram aapke bete ka hua naaam
Mash’hoor hain ghumkhwaar-e-shahenshaah-e-zaman hain
Par doodh to baksho ke abhi tashna dahan hain
(29)
Ye kehke gaye khaime se ba deeda-e-khoo.nbaar
Maaangi jo sawaari to pukaare shah-e-abraar
Ay quvvat-e-dil raahat-e-jaa.n yaar-e-wafaadaar
Bhaayi ke kaleje se lipat jaao phir ek baar
Qismat tumhe haatho se mere khoti hai bhaayi
Tum jaate nahi rooh judaa hoti hai bhaayi
(30)
Di fauj-e-aduu ko ye khabar paik ne jaakar
Haan lashkariyo aate hain abbas-e-dilaawar
Sar taaba qadam garq hai aahan me wo safdar
Be taur nazar aate hain iss sher ke tewar
Haidar ki tarha haath me shamsheer-e-do dum hai
Naize pe to mashkeeza hai kaandhe pe alam hai
(31)
Tab shimr ne pucha ke hai kya aane me taakheer
Wo bola ke iss haal me hain kya karun taqreer
Hain aashiq-e-abbas-ali hazrat-e-shabbir
Sau baar huey ro roke bhaayi se baghal-geer
Kehte the abhi meri tashaffi nahi hoti
Phir chhathi se lag jaao ke seeri nahi hoti
(32)
Jab aakhri tasleem ko jhukta hai alamdaar
Girte hain kaleje ko pakad kar shah-e-abraar
Jis waqt sanbhalte hain to karte hain ye guftaar
Naachaar hoon qaaboo mera dil par nahi zinhaar
Riqqat ka hai ye josh ke tharraate hain abbas
Har martaba qadmo se lipat jaate hain abbas
(33)
Chillaati hai dyodhi se ye ek dukhtar-e-naadaa.n
Abbas chacha phirke chale aao mai qurbaa.n
Ghash hogayi hain sahen me khaime ke chachi jaa.n
Paani ke liye ab na sidhaaro suye maidaa.n
Jo hai meri qismat me musibat wo sahungi
Baba ko rulaao na mai pyaasi hi rahungi
(34)
Ye haal suna jab pisar-e-saad ne saara
Ghabraake kaha jald ho sab fauj saf aara
Aata hai suye naher yadullah ka pyaara
Haan gaaziyo roke raho dariya ka kanaara
Gar qatl kiya baazu-e-farzand-e-nabi ko
Jeeta hi pakadlenge hussain ibn-e-ali ko
(35)
Ye sunte hi saf basta hua lashkar-e-azlam
Har saf me nashaano ke chamakne lage parcham
Tha tegho ki taabandagi me barq ka aalam
Paighaam-e-qazaa teer liye jaate the paiham
Dariya pe ajab maa’rka aaraayi huie thi
Dhaalo ki ghataa chaar taraf chhaayi huie thi
(36)
Dete the jo naizo ko sitamgaar takaane
Juu.n barq har ek saf me chamakti thi sunaane
Goyaa ke nikaale huey the maar zabaanein
Kheenche the jo chille to kudakti thi kamaanein
Tarkash ke jo muh teer fagan khole huey the
Azdar the ke dasne ko dahan khole huey the
(37)
Ek samt ziraaposh sawaaro ke risaale
Tahtul hankee.n baandhe liye haatho me bhaale
Tole koie shamsheer koie gurz sanbhaale
Aur tees hazaar ek taraf barchiyo waale
Koso hi wafoor-e-sipah-e-shaam hua tha
Ek pyaase ki khaatir ye sar anjaam hua tha
(38)
Zeb-e-chaman-o-husn tha wo sarv-e-qabaa posh
Amaama jo sar par tha to shamla ba sar-e-dosh
Husn aisa ke nazzaare se yusuf ke udey hosh
Musa usay dekhe to tajalli ho faraamosh
Khud aan ke muh husn ne qadmo se malaa tha
Har azu badan noor ke saanche me dhalaa tha
(39)
Thi gairat-e-aayina wo peshaani-e-anwar
Ho maah-e-do hafta bhi jisay dekh ke shashdar
Thi rutbe me sar loh se quraa.n ki wo humsar
Aur jalwagari me kaf-e-musa ke baraabar
Bachpan se jo sar garm ibaadat wo jawaa.n tha
Sajde ka nashaa.n saaf sitaara sa ayaa.n tha
(40)
Abru ki kamaano me ajab tarha ka kham tha
Paiwasta the ye raabta gosho me baham tha
Aankh aisi ke hairat zada aahu-e-haram tha
Har mu-e-maza naawak-e-dilkash se na kam tha
Dil sahem gaya seene me har dushman-e-jaa.n ka
Tehreer na thi surme ki chilla tha kamaa.n ka
(41)
Naara tha ke haan ay sipe shaam khabardaar
Abbas-e-dilaawar hai mera naam khabardaar
Hai qaher-e-ilaahi meri samsaam khabardaar
Naiza hai mera maut ka paighaam khabardaar
Lakht-e-jigar-e-saahib-e-shamsheer-e-do-sar hoon
Hoshiyaar ke mai sher-e-ilaahi ka pisar hoon
(42)
Farmaake ye li tegh bahaadur ne mayaa.n se
Ghode ko jo chheda na ruka laakh jawaa.n se
Har waar me sar girne lage barg-e-khazaa.n se
Chalne me ziyaada thi rawaa.n aab-e-rawaa.n se
Jispar padi naazil hua qaher uspe khuda ka
Thi tegh ki zarbat ke tamaacha tha qazaa ka
(43)
Har zarb me naara tha ke ya haidar-o-safdar
Maqtal ki zamee.n hogai thi arsa-e-mehshar
Jab chamki wo bijli to judaa hogaye yaksar
Gardan se sar aur jism se jaa.n rooh se paikaar
Wo qaabiz-e-rooh-e-jad-e-ahl-e-jafaa thi
Abbas ki shamsheer ke qabze me qazaa thi
(44)
Ladtaa hua pahuncha sar-e-baahil jo wo zeehosh
Thi tegh alam haath me aur mashk sar-e-dosh
Dariya jo nazar aaya to riqqat ka hua josh
Yaad aayi sakina ki huie jung faraamosh
Thi khushk zabaa.n pyaas ki garmi se dahan me
Aayi jo hawaa sard to jaan aagayi tan me
(45)
Chamkaar ke rahewaar ko uss naher me daala
Lehraaya jo paani to hua dil ta-o-baala
Pyaase the jo do roz se ghar me shah-e-waala
Mashkeeze ko bharkar ba sar-e-dosh sanbhaala
Aswaar jo be pyaas bujhaaye huey nikla
Muh paani se ghoda bhi uthaaye huey nikla
(46)
Rehwaar se farmaaya ke ye sakht ghadi hai
Raste me paraa baandhe huey fauj khadi hai
Mashkeeze se ek ek ki aankh iitu ladi hai
Paani na talaf ho ye mujhe fikr padi hai
Dil seene me be taab hai pyaaso ke alam se
Mashkeeza sanbhaalo ke ladoo.n fauj-e-sitam se
(47)
Ghode ne kaha hai abhi darpesh ladaayi
Khaima talak iss fauj se mushkil hai rehaayi
Hazrat ne to yaan pyaas bhi aakar na bujhaayi
Aur uspe bhari mashk hai kaandhe pe uthaayi
Be paani piye zof siwaa hoyega aaqa
Taaqat hi na hoyegi to kya hoyega aaqa
(48)
Abbas ne farmaaya ke ay asp-e-wafaadaar
Sairaab alamdaar ho pyaasa rahe sardaar?
Marjaana to hai sahel pa ye amr hai dushwaar
Farzand mai uska hoon jo kausar ka hai mukhtaar
Tu peele agar shiddat-e-tashna dahaani hai
Ab hum hai ye anbo hai aur tegh-e-zani hai
(49)
Ghode ne kaha ay asadullah ke jaani
Har chandd hai do din se mujhe tashna dahaani
Par jab na piyein aap to kyunkar piyu.n paani
Hargiz mujhe manzoor nahi pyaas bujhaani
Taa khaima gaya bachke agar fauj-e-sitam se
Chaar aankhein na hongi faras-e-shaah-e-umam se
(50)
Abbas chale kehke tawakkaltu-alallah
Tanhaa pe pare toot pade fauj ke naagaah
Din ki huie jab shaam to badli me ghiraa maah
Anbo hai pyaase ko na khaime ki mili raah
Juu.n sher idhar aur udhar jaate the abbas
Talwaarein hi padti thi.n jidhar jaate the abbas
(51)
Oondaa hua tha fauj ka dariya lab-e-saahil
Gher-e-huey ghazi ko chale aate the qaatil
Rehwaar bhi majrooh tha aur aap bhi ghaayil
Taa khaima pahunchna tha alamdaar ka mushkil
Talwaar to uski saf-e-aada ki taraf thi
Aur aankh khayaam-e-shah-e-waala ki taraf thi
(52)
Tha rukh se tapaktaa kabhi juu.n ashk-e-paseena
Ghum tha kabhi lab tashna na rehjaaye sakina
Ladne me ye tha mashk bachaane ka qareena
Seene pe kabhi mashk kabhi mashk pe seena
Sab surat-e-ghirbaal badan chhingaya uska
Chaar aayina teero se zira bangaya uska
(53)
Allah ne di thi jo usay himmat-e-aali
Deta tha kabhi waar ko talwaar ke khaali
Yun aafat-e-rustam uss ghaazi ne taali
Seene ko sipar kardiya aur mashk bachaali
Har hamle me lashkar ko bhaaga dete the abbas
Paani ke liye jaan ladaa dete the abbas
(54)
Nagaah munaal ibne anas badhke pukaara
Lo ghaaziyo yaawar hua iqbaal tumhaara
Tha fauj ke narge me yadullah ka pyaara
Talwaar chali waan ali akbar gaya maara
Bhaayi ko madad ke liye chillaate hain shabbir
Laasha ali akbar ka liye jaate hain shabbir
(55)
Sab bibiyaan khaime se nikal aayin khule sar
Wo roti hain kulsoom wo zainab hain khule sar
Chillaati hai abbas ko ek chhoti si dukhtar
Lab khusk hai hilte hai pade kaan ke gauhar
Kehti hai kumak karne ko aata nahi koie
Hai hai mere baba ko bachaata nahi koie
(56)
Ye sunte hi ghabragaye abbas-e-alamdaar
Aur roke kaha haaye mere bhaayi ke ghumkhwaar
Khaime ki taraf jald chale pherke rahwaar
Wa hasrat-o-dard aake lagi shaane pe talwaar
Mudkar taraf-e-raast nazar ki ke ye kya tha
Talwaar se yaan dusra baazu bhi judaa tha
(57)
Tha haatho ka kattna ke laga mashk pe bhi teer
Chillaake kaha haaye sakina teri taqdeer
Ghode se giraa khaak pe jiswaqt wo dilgeer
Aa pahunche garebaan ko phaade huey shabbir
Muh paaun pe mal malke fidaa hote the abbas
Shah roke lipat jaate the jab rote the abbas
(58)
The narge me abbas pa bhaayi se ye pucha
Akbar ki to hai khair ye farmaayiye aaqa
Shah bole hifaazat ko hai ghar ki usay chhoda
Ye sunke suye qibla kiya shukr ka sajdaa
Sajde hi me duniya se safar kargaye abbas
Mashkeeza liye chhaathi tale margaye abbas
(59)
Khaame ko bas ab rok anees-e-jigar afgaar
Har bait hai iss marsiye ki matlaa’-e-anwaar
Bargashtaa zamaana hai to kuch ghum nahi zinhaar
Haami hain tere hazrat-e-abbas alamdaar
Fayyaaz-e-do aalam hain anees-e-guraba hain
Sab mushkilein aasaa.n hain ke wo uqdaa kusha hain
Allahumma solle alaa mohammad wa aale mohammad