Bismi Rabbil Hussain jjh
(1)
Mehr(suraj) e sipihr izz o sharaafat hai fatima
Shar e kitaab ismat o iffat hai fatima
Muztaah baab gulshan e jannat hai fatima
Noor e khuda o aaya e rehmat hai fatima
Rutbe me wo zanaan e do aalam ka fakhr hai
Hawwa ka iftikhaar hai mariyam ka fakhr hai
(2)
Zahera ko kya khuda ne diye rutba e jaleel
Qidmat guzaar jinke saraafeel o jibraeel
Uss sayyada ka koi jahaa.n me nahi adeel
Jiski kafeel fatima uska khuda kafeel
Hai fauq uske martaba ko mehr o maah par
Likha hai naam fatima arsh e ilaah par
(3)
Allah re fatima ki buzurgi zahe sharaf
Baba mila to fakhr e rasoolan e maa salaf
Shauhar mila ameer e arab aur shah e najaf
Allah ne hussain o hasan se diye khalaf
Dono imaam e khalq ke haajat rawaa huey
Mushkil kusha ke bete bhi mushkil kusha huey
(4)
Yaan ay zabaa.n khamoosh adab ka hai ye maqaam
Kausar se muh ko dhole to le fatima ka naam
Ay dil ba juz durood na kuch kijiyo kalaam
Ay kilk apne sar ko jhukaade ba ehteraam
Kaagaz pe pahle sura e mariyam ko dum karu.n
Tab fatima ki ismat o iffat raqam karu.n
(5)
Wo fatima ke jo hai saraapa khuda ka noor
Parwaana jiske chehra e aqdas ki shamm e toor
Gar hoor usko kahiye to hai aql ka qusoor
Uske qadam ki khaak hai surma baraaye hoor
Kisko milaa ye rutba e aala jahaan me
Bheja khuda ne aaya e tatheer shaan me
(6)
Aksar zabaa.n se apni ye farmaate the nabi
Hai fatima ko haq ne buzurgi ataa wo ki
Paida agar jahaa.n me na hota mera wasi
Duniya me phir batool ka humsar na tha koie
Jo samjhe hoor aql ka uske qusoor hai
Mai saaya e khuda hoon wo khaaliq ka noor hai
(7)
Shams ul zuhaa ali hai to badr ul dujaa hai ye
Wo jism hai to jaan o dil e mustafa hai ye
Behr e saqaa ali guhar e be bahaa hai ye
Abd e khuda hai wo to kaneez e khuda hai ye
Zaahid hain haq parast hain khush khu hain nek hain
Dono khuda ke fazl se rutbe me ek hain
(8)
Dono ka ek noor e khuda se zahoor hai
Taahir hain inme rijs se har ek door hai
Hain khaasgaan e haq adab inka zaroor hai
Wo noor e chashm hai to ye dil ka suroor hai
Naari hai jisne dono ki khaatir malool ki
Inki khushi khushi hai khuda aur rasool ki
(9)
Haqqake fatima ke fazaail hain be shumaar
Dozaq pe aur khuld pe uska hai ekhtiyaar
Likha hai hoga arsa e mehshar jo aashkaar
Uss roz hogi noor ke naaqe pe wo sawaar
Tabaanda honge laal o zabarjad zanaam me
Hoorein juloos hongi malak ehtemaam me
(10)
Howega haq se hukm shafaa’at ka sar pe taaj
Qeemat na jiski hosake kaunain ka khiraaj
Howegi uss se sabko shifaaa’at ki ihtiyaaj
Gul hoga dekho martaba e fatima ko aaj
Kis dabdabe se beti payambar ki aati hai
Sar ko sawaari shaafa e mehshar ko aati hai
(11)
Aayengi uss shikoh se mehshar me jab batool
Aur jaayengi behisht me wo dilbar e rasool
Dekhengi shiyyayaan e ali ko jo dil malool
Howega hukm e haq ke dua hai teri qabool
Kya dekhti hai fatima kya intezaar hai
Bakshish me inn sabho ki tera ikhtiyaar hai
(12)
Karlengi yun wo apne ghulaamo ko intekhaab
Daano ko jis tarha se sanche bhook me uqaab
Kholega chashm e shauq se khuld e baree.n ka baab
Uss dum khataayein shiyyo ki hojaayengi sawaab
Khandaa.n phirenge saaya e lutf e raheem me
Jannaat e adn me kabhi baagh e naeem me
(13)
Ab zehd o fikr e fatima ka kuch sunaau.n haal
Faaqe pe faaqa karti thi aksar wo pur malaal
Laate jo mazd e aab e kashi sher e zul jalaal
Tab jau.n mangaake peesti thi wo neku khisaal
Daulat se kuch gharaz thi na hashmat se kaam tha
Aatho pahar khuda ki ibaadat se kaam tha
(14)
Juz ek rida e kuhna na thi dusri rida
Usme bhi laif khurma ke paiwandjaa ba jaa
Bistar se tha kabhi na tan e paak aashna
Farsh e zamee.n tha khwaab gaah e bint e mustafa
Duniya me jeete ji kabhi raahat nahi mili
Faaqo me gar mili bhi naan e joyi.n mili
(15)
Naaqil hai iss hadees ka musalmaan khush sair
Masjid se ek din mai gaya fatima ke ghar
Fizza ne aan kar ye kaha tab qareeb e dar
Uriyaa.n hai paara e jigar e sayyad ul bashar
Karle hijaab kuch abhi aana rawaa nahi
Bint e rasool e paak ke sar par ridaa nahi
(16)
Fizza ko maine apni rida deke ye kaha
Le jaake odh lewe isay ashraf ul azaa
Baad iske mai jo daakhil e bait ul sharaf hua
Dekha ke chakki peesti hain bint e mustafa
Mehnat kashi ka ranj hai uss haq shanaas par
Ek haath hai hussain par ek haath aas par
(17)
Peshaani par araq hai kaf e dast hai figaar
Deti hain doodh rota hai jab tifl e sheer khwaar
Jaari zabaan e paak pe hai humd e kirdigaar
Pahelu me maare bhook ke shabbir hain be qaraar
Farmaati thi na ro’o kuch isme bhi raaz hai
Waari khuda kareem hai bandaa nawaaz hai
(18)
Zahera ka haal dekh ke dil hogaya kabaab
Ki arz fatima se ye ba deeda e pur aab
Ay dukhtar e rasool e khuda ay falak janaab
In mehnato ki aapke dil me kahan hai taab
Jau.n peesti hain doodh pisar ko pilaati hain
Fizza ke hote aap ye eeza uthaati hain
(19)
Farmaaya fatima ne pasaz shukr e kirdigaar
Ek din to fizza karti hai sab ghar ka kaarobaar
Aur ki hai maine mehnat e ek roza ikhtiyaar
Eeza ho isko ye nahi manzoor zinhaar
Go mai mohammad e arabi ki azeez hoon
Haq ki kaneez wo bhi hai mai bhi kaneez hoon
(20)
Salmaa.n ye sunke jaanib e masjid huey rawaa.n
Eeza e fatima ka nabi se kiya bayaa.n
Be ekhtiyaar rone lage sarwar e zamaa.n
Dekha kabhi ali ko kabhi su e aasmaa.n
Aansu bhar aaye aankh me sher e ilaah ki
Zahera ki bekasi pe mohammad ne aah ki
(21)
Ismat-saraa me rote gaye shaah e laa fataa
Ek dum ke baad aaye khushi pesh e mustafa
Pucha sabab nabi ne khushi ka to ye kaha
Soti thi ghar me fatima jiswaqt mai gaya
Qaadim bhi koie tha na mere noor e ayn ka
Par hil raha tha aap se jhula hussain ka
(22)
Chakki ke aas paas koie tha na mutlaqa
Gardish me aap surat e gandoo.n thi aasiya
Jo fakhru hote jaate the aata bhi girta tha
Thi pesh rawaa e fatima tasbeeh ki sadaa
Sote me shafl e taa’at e rabb e durood tha
Dil me khuda ki yaad thi lab pe durood tha
(23)
Kehne lage ye sunke rasool e falak janaab
Roze se aaj fatima hai ya abu turaab
Thi chakki peesne ki tan e zaar me na taab
Chaaha ye kibriya ne ke aajaye usko khwaab
Gaafil kiya batool ko raahat ke waaste
Bhijwa diya farishto ko qidmat ke waaste
(24)
Aksar farishte aate hain khair ul nisaa ke ghar
Aksar khuda batool ki mangwaata hai khabar
Jhoole ko jhulaate hain jibreel naamwar
Aur chakki peeste hain saraafeel khush sair
Maikal zikr e haq me hai badle batool ke
Pesh e khuda ye rutbe hain bint e rasool ke
(25)
Mohtaaj thi magar tha sakhaawat ka bhi ye haal
Faaqe me dar pe aan ke jisne kiya sawaal
De aayein kuch na kuch usay jaakar wo khush khisaal
Duniya ke maal ko na samajhti thi.n kuch bhi maal
Seene me dil ‘alaaiq e duniya se paak tha
Koh e tilaa bhi saamne zahera ke khaak tha
(26)
Karta hai ek raavi e shiree.n sukhan bayaa.n
The masjid e madeene me paighambar e zanaa.n
Aaraabi ek aage lagaa kehne nagahaa.n
Faaqe pe faaqa karta hoon ay shaah e ins o jaa.n
Eemaa.n bhi laa chuka pa faraagat nahi mujhe
Kapde banaaun itni bhi taaqat nahi mujhe
(27)
Ye sunke aab deeda huey shaah e kaayenaat
Ashaab e ba wafaa se nabi ne kahi ye baat
Kuch dewe isko hai koie aisa neku sifaat
Uthe sukhan ye sunte hi hallaal e mushkilaat
Sartaaj e dee.n ne apna amaama diya usay
Haidar ke baad saa’d ne jaama diya usay
(28)
Phir unn sabho se kehne lage sayyad e anaam
Aisa bhi hai koie jo khilaade isay taa’am
Salmaa.n ne haath jod ke tab ye kiya kalaam
Tehseel tosha karta hai iske liye ghulaam
Koshish me amr e khair ki jaana sawaab hai
Bhooke ko khaana laake khilaana sawaab hai
(29)
Salmaa.n ye kehke waan se gaye fatima ke ghar
Saail ka haal arz kiya sab ba chashm e tar
Makhdooma e jahaa.n ne kaha tab jhukaake sar
Gair az khuda kisey hai mere haal ki khabar
Farzand mere bhook ki shiddat se marte hain
Mujhpar to teen roz se faaqe guzarte hain
(30)
Mohtaaj khud taa’am ko hain fakhr e anbiyaa
Karte hain roz faaqa kashi shaah e laa fataa
Saail se aah sakht khijaalat hai doon mai kya
Bacho ko ghash hain kaanpte hain mere dast o paa
Taaqat nahi hai itni ke uthkar khadi hoon mai
Sajjaad e par namaaz me gir gir padi hoon mai
(31)
Par hoon sakhi ki beti mujhe aata hai hijaab
Ye to kabhi na hoga ke saail ko doon jawaab
Khair ul nisaa khuda ne kiya hai mera khitaab
Hai sharm ki jaga jo na howe wo behr e yaab
Abtak to ru sawaal kisi ka kiya nahi
Iss dar pe saail aan ke khaali phira nahi
(32)
Mash’hoor hai sakhaawat e mehboob e zul jalaal
Fayyaaz hain ali o wali shaah e khush khisaal
Kya jaane ajnabi mere faaqa kashi ka haal
Dil me kahega wo mera khaali gaya sawaal
Ek naan e jau.n batool ne mujhko ataa na ki
Haajat rawaa e khalq ne haajat rawaa na ki
(33)
Aakhir utaar kar sar e pur noor se ridaa
Salmaa.n se zauja e asadullah ne kaha
Kar rahen ye ridaa meri aur jo shutaab laa
Taa sair ho taa’am se ek banda e khuda
Khaalik ne ki hai chaadar e rehmat ataa mujhe
Kaafi hai sar pe saaya e lutf e khuda mujhe
(34)
Lekar rida ko hazrat e salmaa.n huey rawaa.n
Sham’oo ke paas jaake kiya iss tarha bayaa.n
Rakh ye ridaa e dukhtar e paighambar e zamaa.n
Jo de ke ek faqeer hai zahera ka mehmaa.n
Ghar me jo kuch na dene ko paaya batool ne
Chaadar garo ko bheji hai bint e rasool ne
(35)
Ye sunte hi wo rone lagaa aur ye kaha
Wallah zahed ye hai ye hai himmat o sakhaa
Kiska ye hausla hai ba juz bint e mustafa
Haqqake mustafa hai farastaada e khuda
Naatiq kalaam e haq hai sanaa e batool ka
Taureet me hai zikr rawaa e batool ka
(36)
Ye kehke usne rakhli wo chaadar ba chashm e tar
Noor e khuda se hogaya raushan tamaam ghar
Har taar jo.n khutoot shuaa’i tha jalwa gar
Laaya yahoodi kalma e tayyab zabaan par
Be dee.n ko dum me saahib e eemaa.n banaa diya
Kaafir ko iss ridaa ne sulaimaa.n bana diya
(37)
Le aaya kuch rutab o jau wo baalqee.n
Salmaa.n wo leke bint e nabi ke gaya qaree.n
Jaldi se leke dukhtar e sulthaan e mursalee.n
Chakki me peesne lagi jau ba dil e hazee.n
Par thi.n ye naa tawaa.n ka badan thar tharaata tha
Zahera ko maare zof ke ghash pe ghash aata tha
(38)
Faaqe se maare zof ke be haal the hasan
Chakki ke paas aake kiya maa se ye sukhan
Bhooko pe shukr hai ke hua fazl e zul-minan
Faaqe se sunsunaata hai amma mera badan
Duniya me log khaate hain nemat zamaane ki
Do din ke baad yaan huie tadbeer khaane ki
(39)
Kehne lagi.n hasan se wo bint e rasool e haq
Waari hai iss taa’am ka ek aur mustahaq
Hone se der ke mera hota hai rang faq
Bhooka wo phir na jaaye yahi hai mujhe qalaq
Khaake tumhaare haq me jo saail dua kare
Hai kya ajab ke haq tumhe nemat ataa kare
(40)
Saail ka fatima se hasan ne sunaa jo naam
Kehne laga wo lakht e dil e sayyad e anaam
Saail hai mehmaa.n to na maangenge hum taa’am
Dewega humko ajr mera rabb e zul karaam
Ladke hain go ye aaj to mehnat uthaane do
Hoga sawaab humko bhi chakki phiraane do
(41)
Kurte ki aasteen ulatkar wo khush sifaat
Chhota sa chob e aas ki jaanib badha ke haath
Jau peesne ko hogaye aamaada maa ke saath
Lekar balaayein fatima ne tab kahi ye baat
Jau pis chuke kudhaao na ahmad ki jaayi ko
Sadma na pahunche kuch teri naazuk kalaayi ko
(42)
Aakhir pakaake rotiyaa.n aur usme khurma dhar
Salmaa.n ko dee.n to kehne lagaa yun wo khush sair
Hain aap teen deen se garasna ma e pisar
Ek naan e jau rakho ke hasan howe behr e war
Boli.n batool isme se lena rawaa nahi
Saail ka kya khuda hai hamaara khuda nahi
(43)
Salmaa.n ne jaake jab diya saail ko wo taa’am
Tab uss se puchne lage wo sayyad e anaam
Khaana diya ye kisne to bola wo nek naam
Zahera ke ghar se laaya hoon ay shaah e khaas o aam
Faaqa jo tha rasool ko bhi murtaza ko bhi
Hairat huie nabi ko bhi sher e khuda ko bhi
(44)
Uthkar gaye batool ke ghar sarwar e zaman
Dekha ke fatima me nahi taaqat e sukhan
Aankho me halqe padhgaye hain zard hai badan
Murjhaa gaya hai surat e gul chehra e hasan
Faaqo se fatima ka zebas sher khushk tha
Jhoole me doodh bin lab e shabbir khushk tha
(45)
Aankho me aansu bharke mohammad ne ye kaha
Ay mere noor e ayn ye kya haal hai tera
Ki arz fatima ne ke ay fakhr e anbiyaa
Guzre hain teen roz ke khaana nahi mila
Raazi hoon mai to jo ke razaa e ilaah hai
Lekin hasan hussain ki haalat tabaah hai
(46)
Sunkar sukhan ye rone lage sarwar e umam
Godi me phir nawaase ko lekar ba dard o ghum
Ki ye dua rasool e khuda ne ba chashm e num
Ay raaziq ul bunaad kar iss bacho par rahem
Aasoodgi hai saare zamaane ke waaste
Aal e rasool rote hain khaane ke waaste
(47)
Zahera hai teri khaas kaneezo mein intekhaab
Tere karam se qaasim e rozi hai bu turaab
Dono ko par hai daulat e duniya se ijtinaab
Zahera ki haal dekhne ki ab nahi hai taab
Sadme ajeeb guzre hain iss baa tameez par
Faaqe hain teen roz se teri kaneez par
(48)
Hazrat ka ye na khatm hua tha abhi kalaam
Maujood ek tabaq me hua khuld ka taa’am
Khushbu wo thi ke jis se moattar hua mashaam
Aayi sadaa e gaib ke ay sayyad e anaam
Rutba ye kab tha mariyam o hawwa ke waaste
Khaana ye humne bheja hai zahera ke waaste
(49)
Iss sayyada ko humne wo baksha hai ekhtedaar
Khidmat hai jiski neet e sulaymaa.n ka iftikhaar
Sab nemato pe khuld ki isko hai ikhtiyaar
Kehdegi ye jisey wahi howega rastgaar
Duniya me aaj go isay ‘usrat ke ranj hain
Par fatima ke waaste ‘uqba ke ganj hain
(50)
Jispar ho kibriya ki inaayat ho ye karam
Uspar khaleel umr me kya kya huey sitam
Duniya se kooch kar gaye jab sarwar e umam
Uss faaqa kash pe toot pada koh e dard o ghum
Mehboob e kibriya sa padar sar se uthgaya
Saaya tha jiska sar pe wahi sar se uthgaya
(51)
Tha rone peetne ke siwa aur kuch na kaam
Seene se aahein bharti thi.n leke padar ka naam
Kehti thi.n daadhein maarke ya sayyad e anaam
Tum kya jahaa.n se uthgaye zahera huie tamaam
Rehti hai subh o shaam nazar su e dar meri
Shafqat se puchte nahi aakar khabar meri
(52)
Tumko to mujh bagair na tha ek dum qaraar
Beti se kyun khafa huey ya shaah e naamdaar
Chhathi se mujhko kaun lagaa kar karega pyaar
Furqat me aapki na jiyegi ye sogwaar
Iss faaqa kash ko chhodke baba kidhar gaye
Aabaad ghar batool ka weeraan kar gaye
(53)
Seene me dard o ghum to badan zaar rang zard
Sozish jigar me hosh paraaganda dil me dard
Tan me kabhi bukhaar kabhi haath paaun sard
Poshaak mail baal pareshaan rukh pe gard
Band aankhein dil me yaad e risaalat panaah ki
Takiye se sar kabhi jo uthaaya to aah ki
(54)
Hazrat ke khaali hujre me din bhar guzaarti
Bistar ke gird aapko phir phir ke waarti
Takiyo pe malti aankho ko aur daadhein maarti
Bu e padar jo aati to ro ro pukaarti
Laaun kahan se aah do aalam ke shaah ko
Soye zamee.n me chhodke iss khwaabgaah ko
(55)
Fariyaad ki kabhi kabhi chhaathi pe maara haath
Gar baat ki shafqat e khair ul wara ki baat
Ghum tha yahi ke sar pe nahi shaah e kaayenaat
Zahera jiye jahaa.n se payamabar ki ho wafaat
Duniya ke dard o ghum se chhudaate nahi mujhe
Paas apne baba jaan bulaate nahi mujhe
(56)
ragbat na khaane par bhi na tha paani ka khayaal
Chehre pe aansu behte the aankhein thi.n dono laal
Kurta siyaah barmein pareshaan sar ke baal
Pahero zamee.n pe ghash me padi rehti thi nidhaal
Na farsh se garaz thi na bistar se kaam tha
Gar kaam tha to zikr e payambar se kaam tha
(57)
Iss sadme par bhi dar paye eeza the ahl e kee.n
Baagh e fadak siwa jo thikaana na tha kahin
Masjid me khat sanad ka gaie leke wo hazee.n
Usko diya jawaab ke ye tera haq nahi
Bas chal saka na zauja e sher e ilaah ka
Purze kiya noshataa risaalat panaah ka
(58)
Maanind e baid gaiz se tharraayi fatima
Roti nabi ki qabr pe phir aayi fatima
Chhati pe haath maarke chillaayi fatima
Fariyaad karne aayi hai dukh paayi fatima
Ya shaah zabt milk meri aaj hogayi
Beti tumhaari qoot ko mohtaaj hogayi
(59)
Looti gayi batool mera baagh chhingaya
Haasil isi ka tha mere jeene ka aasra
Bacho ko apne aah khilaaungi ab mai kya
Hazrat ke ghum se hogaye haidar shikasta paa
Mazdoori karke laate the so wo bhi chhut gayi
Zahera tumhaare marne se har tarha lut gayi
(60)
Do daad ay padar mujhe aada sataate hain
Har roz ranj nau mujhe dene ko aate hain
Bache gurasangi se mere tilmilaate hain
Be aas hoke aankho se aansu bahaate hain
Kis se kahun jo kuch meri tauqeer huie hai
Sher e khuda ke qatl ki tadbeer huie hai
(61)
Ye bayn karke khol diya fatima ne sar
Haatho se peetne lagi chhathi ba chashm tar
Masjid ke kaanpne lage deewaar o baam o dar
Junbish aagayi lahad e sayyad ul bashar
Riqqat huie na zabt jo uss dil figaar se
Nikle nabi ke dast e mubaarak mazaar se
(62)
Qabr e rasool e paak se phir aayi ye sadaa
Zahera ko kyun sataate ho usne kiya ye kya
Pehchaana sab ne haath aur aawaaz e musatafa
Aasaar hashr ke huey aalam me gul padaa
Gardoo.n pe sunke hashr ke shor e fashoor ko
Nazdeek tha ke phoonke saraafeel soor ko
(63)
Itne me rote aaye wahan shaah e laa fata
Chaadar udhaayi fatima ko aur yun kaha
Bas bas khuda ke waaste karti ho kyun buka
Ghar me chalo ke rote hain sibtain e mustafa
Laazim hai tumko rahem ke rahemat ka baab ho
Aisa na ho ke khalq pe naazil azaab ho
(64)
Ye kehke ghar me laaye janaab e batool ko
Ghash aaya fart e zof se bint e rasool ko
Uspar bhi dushmani thi ye qaum e jahool ko
Rehne diya na chayn se uss dil malool ko
Paas e adab rasool ke ghar ka uthaa diya
Darwaaza aake aag se uska jalaa diya
(65)
Dar se lagi wo kehti thi aansu baha baha
Kyun ghar mera jalaate ho maine kiya hai kya
Ek shaks ne sitam ye kiya waa museebata
Darwaaza laat maarke uspar giraa diya
Pehlu pe aayi zarb jo bint e rasool ke
Mohsin hua shaheed shikam me batool ke
(66)
Sad haif rahem aaya kisi ko na zinhaar
Baazu pe taaziyaane se uska kiya figaar
Khainchi khuda ke dost pe shamsheer e aabdaar
Rasti me gale me daalke misl e gunaahgaar
Gul tha ke kal to ahmad e mukhtaar margaye
Aur aaj fatima pe ye sadme guzar gaye
(67)
Uss roz se batool ki haalat huie tabaah
Roti thi.n apne hujre me pahero ba ashk aah
Hasrat se muh pe bacho ke karti.n kabhi nigaah
Kehti kabhi ali se ke ay zaigham e ilaah
Karti hai maut qate’ sukhan ishtiyaaq ke
Ayyam e wasl guzr e din aaye firaaq ke
(68)
Rukhsat hai tumse aur wasiyyat hai ye meri
Bacho se mere rahiyo khabardaar ya ali
Mere hasan hussain ko eeza na ho koi
Mujhse juda ye raat ko soye nahi kabhi
Marjaau’n jab to chhaati pe unko sulaayiyo
Dono ko pyaar kijo gale se lagaayiyo
(69)
Har dum mujhe ghash aata hai ya shaah e behr o bar
Zainab abhi se roti hai muh dhaanp dhaanp kar
Hota hai uske haal pe tukde mera jigar
Ye meri laadli mere ghum me na jaaye mar
Mujko duaayein jeene ki paas aake deti hai
Har dum balaayein nanhe se haatho se leti hai
(70)
Rokar kaha ali ne ye kya karti ho kalaam
Maatam me mustafa ke to rota hoon subh o shaam
Furqat tumhaari ab hai mujhe marg ka payaam
Samjhaaya fatima ne ke hai sabr ka maqaam
Bin maa ke thi jahaa.n me padar ko bhi ro chuki
Muddat tamaam umr ki zahera ke ho chuki
(71)
Shab ko mujhe uthaayiyo ya shaah e laafata
Dekhe na dushmano me janaaza koie mera
Bezaar e ahl e zulm se hai bint e mustafa
Bhooli nahi hoon mai jo mujhe jisne dukh diya
Mohsin ke khoo.n ki daad na jabtak mai paaungi
Pesh e khuda mai arsh ka paaya hilaaungi
(72)
Ye sunke aab deeda huey shaah e mashraqain
Itne me aaye muztar o hairaa.n hasan hussain
Maadar ke muh ko dekh ke roke ba shor o shayn
Kehne lagi ali se ye ahmad ki noor e ayn
Mehmaa.n koie ghadi ki mohammad ki pyaari hai
Behlaao tum unhein ke mujhe dum shumaari hai
(73)
Bole ali ye beto ko chhati laga laga
Tum jaao su e roza e mehboob e kibriya
Waan nanhe nanhe haath uthaakar karo dua
Taa rahem fatima ke kare haal par khuda
Bheja inhein udhar jo wasi e rasool ne
Hujre ke dar ko band kiya yaan batool ne
(74)
Masjid me murtaza gaye rote paye namaaz
Yaan fatima ne haq se kaha apne dil ka raaz
Ay khaaliq e zameen o zamaa.n rabb e be niyaaz
Mai hoon teri kaneez tu aalam ka kaarsaaz
Maqbool ye dua meri iss aan kijiyo
Mushkil fishaar e qabr ki aasaan kijiyo
(75)
Beti tere rasool ki mai hoon jigar figaar
Zauja hoon uski bakshi jisey tu ne zulfiqaar
Farzand wo diye ke kiya jinko tu ne pyaar
Sab kuch diya to de mujhe itna bhi ikhtiyaar
Mehshar me uthke qabr se jab aaye fatima
Chaahe jisey behisht me le jaaye fatima
(76)
Ye kehke chup huie jo wo makhdooma e zamaa.n
Zainab ye boli fizza se ba chashm e khoo.n fishaa.n
Kuch kehte kehte hogayi.n khaamoosh amma jaa.n
Aayi sadaa e ahmad e mukhtaar naagahaa.n
Chhoda jahaan e faani ko bint e rasool ne
Saf maatami bichhao qazaa ki batool ne
(77)
Zainab ne sunke nana ki aawaaz dard naak
Khola jo dar to dekha sidhaari.n batool e paak
Muh peeta chhaati kooti kiya pairahan ko chaak
Fizza ne bayn ye kiye sar par udaake khaak
Shahezaadi meri haaye jahaa.n se guzar gayi
Fizza na fatima ki balaa le ke margayi
(78)
Itne me aaye fatima zahera ke naunehaal
Aankho me ashk gard bhare geysuwo ke baal
Muh dekh ek ek ka bole basad malaal
Kya ghash phir aagaya abhi amma ka kya hai haal
Zainab pukaari qaher hua nang e sar karo
Baba ko maa ke marne ki jaakar khabar karo
(79)
Ye sunte hi wo rone lage daadhein maar kar
Phainkee.n zamee.n pe topiyaa.n sar se utaar kar
Waa hasrata kahaa kaie baari pukaar kar
Pairaahano ki jeb ko phir taar taar kar
Masjid me jaake kehne lage baba jaan se
Ghar me chalo ke uthgayi.n amma jahaan se
(80)
Beto se marg e fatima ki sunte hi khabar
Ghash hogaye ali o wali shaah e behr o bar
Chillaaye shiyyayaan e ali peet peet kar
Taaza hua phir aaj ghum e sayyad ul bashar
Maara tha be gunaah jisey taaziyaane se
Wo faaqe karne waali sidhaari jahaan se
(81)
Ghaasib fadak ke roz sataayenge kisko aah
Ab kiska ghar jalaane ko jaayenge rusiyaah
Mohsin ke khoo.n ki hoyegi ab haq se daad khwaah
Bint e rasool e paak ko eeza di be gunaah
Kis dard se nawaasey payambar ke rote hain
Dono ki bekasi pe jigar tukde hote hain
(82)
Ek dum ke baad hosh me aaye jo murtaza
Dekha pachhaadein khaate hain sibtain e mustafa
Rote hain dhaadein maarke ashaab e ba wafaa
Gul hai ke haaye dukhtar e sardaar e anbiyaa
Phailaaye haath dekh ke uss shor o shayn ko
Roye gale lagaa ke hasan aur hussain ko
(83)
Beto ko saath leke imaam e falak janaab
Aaye haram saraa me jo baa deeda e pur aab
Zahera ko murda dekh ke dil hogaya kabaab
Muh se ridaa uthaake ye ro ro kiya khitaab
Bibi ali ko chhod ke dair e kharaab me
Aakhir gayin rasool e khuda ki janaab me
(84)
Ab kaun lega shabbar o shabbir ki khabar
Chhote se sin me hogaye bekas mere pisar
Kya kehke dewe haaye tasalli unhein padar
Afsos hai ke hogaya weeraa.n ali ka ghar
Jeete hain kab jo hijr ke sadme uthaate hain
Hum bhi tumhaare paas koie dum me aate hain
(85)
Sunkar khuda ke sher se pur dard ye bayaa.n
Barpa tha hashr khaana e zahera ke darmiyaa.n
Tha haal aseeraan e ali pe ke al amaa.n
Muh peet ti thi.n betiyaa.n baa naalaa o fughaa.n
Murde se maa ke dono pisar lipte jaate the
Haidar hata hata unhein chhaathi lagaate the
(86)
Maatam me guzri bint e nabi ke jo aadi raat
Mayyat ko deke gusl o kafan shaah e khush khisaal
Ghar se janaaza le chale beto ko leke saath
Zainab pukaari.n maarke chhati pe dono haath
Kya hai jo betiyo se bhi muh mode jaati ho
Amma akela ghar me hamein chhode jaati ho
(87)
Ab aage dafn e fatima ka kya sunaaun haal
Kaagaz hai seena resh qalam ki zabaa.n hai laal
Gar dil me tere marsiya goyi ka hai qayaal
Bas ay anees haidar o safdar se kar sawaal
Zehn e saleem apne karam se ataa karo
Ya murtaza ali meri haajat rawaa karo
Allahumma solle alaa mohammad wa aal e mohammad