Bismi Rabbil Hussain
(1)
Daulat koie duniya me pisar se nahi behtar
Raahat koie aaram e jigar se nahi behtar
Lazzat koie paakeeza samar se nahi behtar
Hikmat koie bu e gul e tar se nahi behtar
Sadmo me ilaaj e dil e majrooh(zaqmi) yahi hai
Rehaa.n hai yahi raah yahi rooh yahi hai
(2)
Maa baap ka dil guncha e khandaa.n hai isi se
Wo gul hai ke ghar rashk e gulistaa.n(phoolo ka baagh) hai isi se
Sab raahat o aaraam ka saamaa.n hai isi se
Aabaadi ka shaana afsaa.n hai isi se
Kis tarha khule dil ke jigar band nahi hai
Ghar qabr se badtar hai jo farzand nahi hai
Dss
(3)
Ye wo hai asaa peer jawaa.n rehta hai jis se
Ye wo hai nagee.n naam o nashaa.n rehta hai jis se
Wo shamma hai pur noor makaa.n rehta hai jis se
Wo durr hai qawi(mazboot) rishta e jaa.n rehta hai jis se
Khote nahi ye maal zar o maal ke badle
Moti bhi luta dete hain iss laal ke badle
(4)
Saulat(rob, dabdaba) yahi shaukat yahi ijlaal(azmat, shaan o shaukat) yahi hai
Sarwat(maal o daulat, khush haali) yahi hashmat(saaz o samaan, asbaab)yahi iqbaal(khush naseebi) yahi hai
Sarmaaya(maal, paisa,rupiya) yahi naqd yahi maal yahi hai
Gauhar yahi yaaqoot yahi laal yahi hai
Dilband ho pahelu me to ghum paas nahi hai
Kuch paas nahi gar ye raqam paas nahi hai
(5)
Maa baap ki asaaish(sukh, chayn) o raahat hai pisar se
Talqi(museebat, takleef) me bhi jeene ki halaawat(mithaas) hai pisar se
Khoo.n jism me aankho me basaarat(nazar, raushni) hai pisar se
Ayyaam e zaeefi me bhi taaqat hai pisar se
Aaraam e jigar quwwat e dil raahat e jaa.n hai
Peeri(zaeefi) me ye taaqat hai ke farzand jawaa.n hai
(6)
Wo shay hai khushi dar pe khadi rehti hai jis se
Wo chayn hai raahat ki ghadi rehti hai jis se
Wo laal hai ummeed badi rehti hai jis se
Wo durr hai ye durr jaan ladi rehti hai jis se
Aaraam e jigar taab o tawaa.n saath hai iske
Phirta hai jidhar rishta e jaa.n saath hai iske
(7)
Maalik se bhare ghar ke ujad jaane ko pucho
Ghar waalo se iss tafriqa(judaai) padh jaane ko pucho
Maa baap se qismat ke bigad jaane ko pucho
Yaqoob se yusuf ke bichad jaane ko pucho
Allah dikhaaye na alam(ghum) noor e nazar ka
Ye jaata hai aankho se lahu qalb o jigar ka
(8)
Ab rukhsat e akbar hai shah e tashna dahaa.n se
Farzand bichadta hai imaam e do jahan se
Peeri me chhudaata hai falak taaza jawaa.n se
Kis fasl(zamana) me dar pesh hai furqat tan o jaa.n se
Aati hai ajal god ka paala nahi jaata
Saabir se kaleje ko sanbhaala nahi jaata
(9)
Farmaate hain farzand se aankho ko chura kar
Dekh aao zara maadar e naa shaad ko jaakar
Kaheta hai wo naa shaad jawaa.n ashk bahaa kar
Ab jaayenge khaime me sina seene pe khaa kar
Muh neza o shamsheer se moda nahi jaata
Sab chhode magar aapko chhoda nahi jaata
(10)
Maula ye ghulaam ab mutamanni(khwahish mand) hai raza ka
Mushtaaq hai ye khushk gala aab e baqa ka
Shohra hai alamdaar e dilaawar ki wiga ka
Kuch kaam to khaadim se bhi ho raah e khuda ka
Iss khaak ka zarra ho jo khursheed wahi hai
Jo aaj mare zinda o jaavid wahi hai
(11)
Jeene pe mere ishq e khuda jisko nahi hai
Phattar hai mohabbat ka maza jisko nahi hai
Khaak iss zard gauhar pe baqa jisko nahi hai
Lut ti hai wo daulat ke fanaa jisko nahi hai
Adna(chhota) ho to aala(bada) ho gadaa(faqeer) ho to ghani(maal daar) ho
Hissa ye usi ka hai jo qismat ka dhani ho
(12)
Doobega jo haidar ke safeene me nahi hai
Naam uska shafa’at ke nageene me nahi hai
Dil murda hai gar dard bhi seene me nahi hai
Marne me jo lazzat hai wo jeene me nahi hai
Sar dene ki lazzat koie sardaar se puche
Zaqmo ka maza shah ke namak khwaaro se puche
(13)
Phir maut hai gar umr mili laakh baras ki
Bulbul se ab uthti nahi takleef nafas(saans) ki
Daamaando ko aati hai ye aawaaz jaras(ghadiyaal jo qafle wale kooch ke waqt bajaate hai, halki si aawaaz) ki
Eeza hai musaafir ko faqat chandd nafas(saans, lamha) ki
Uss din ke siwa nosha e uqbaa na milega
Dhundoge to phir qaafla aisa na milega
(14)
Doori nahi kuch umr e safar hoti hai kotaah
Himmat ho to katt jaati hai narmi se kadi raah
Saalik(raah chalne waala) hai wahi raah e raza se jo ho aagaah
Aseel(aala qism ka) ki surat tujhe kausar ki hai gar chaah
Jaata hai wahin phir ke jo aata hai jahan se
Din bhar me kahan meher(suraj) pahunchta hai kahan se
(15)
Kotaahi e qismat ne chhudaaya hume sab se
Mehboob e mohammad se khajil(sharminda) shaah e arab se
Sar denge dum e subha iraada tha ye shab se
Tadpaa kiye aur kuch na kaha paas e adab se
Dushman pe na aise alam o ghum ho jahan me
Qaasim to ho firdos me aur hum ho jahan me
(16)
Chhote jo ho.n wo jauhar e shamsheer dikhaayein
Hum khaak basar rote huey laasho pe jaayein
Abbas e ali khoo.n me lab e naher nahaayein
Baad unke bhi sar dene ka hum izn na paayein
Farzand fida baap pe hote nahi shaayad
Hum haidar e karraar ke pote nahi shaayad
(17)
Bachpan me hume aapne shamsheer ataa ki
Mit jaayenge jauhar jo hami ne na wiga ki
Hum sher hain shero ke qasam sher e khuda ki
Hurmat hai shuja’at ki to izzat hai khuda ki
Shabzuu me kamaa me rahe hathiyaaro se khele
Bachpan me jo khele bhi to talwaaro se khele
(18)
Na sabr me hazrat sa koie hai na raza me
Ghar aapne sadqe kiya sab raah e khuda me
Ye hausla kiska hai ke roye na azaa me
Kije meri imdaad bhi iss ranj o bala me
Gar baad khuda ke hain to maa baap hain moula
Dije mujhe rukhsat ke saqi aap hain moula
(19)
Ay saalik(raah chalne waale) e minhaaj(rastaa) e ali raah dikhaa de
Mushtaaq hoon jis dar ka wo dargaah dikhaa de
Darwaaza e rahemat mujhe lillah dikhaa de
Darbaar e shahenshah e falak jaah dikhaa de
Waan pahunche jahan arsh bhi paaya nahi rakhta
Humsaaye me uske hoon jo saaya nahi rakhta
(20)
Ye kahke jo qadmo pe gira wo ma e anwar
Sar chhati se liptaa ke ye kahene lage sarwar
Mai maana e satheel sa’adat nahi dilbar
Jo tumse ban aaye wo karo haaye ali akbar
Ye sunte hi duniya se guzar jaayegi zainab
Rona mujhe iska hai ke mar jaayegi zainab
(21)
Umr usne gawaayi hai mohabbat me tumhari
Sab hain pa wo aashiq hai haqiqat me tumhaari
Atthaara baras kaate hain ulfat me tumhari
Kyun kar usay sabr aayega furqat me tumhari
Allah hi chaahe to na haail(beechme aane waala) koie shay ho
Ye marhala aisa hai ke do baato me tay ho
(22)
Bismillah agar azm(iraada, niyyat) hai to khaime me jaao
Maa se bhi phupi se bhi raza jung ki laao
Rokunga na mai shauq se phir barchiyaan khaao
Aab e dum e shamsheer se pyaas apni bujhaao
Der ab kahin duniya se guzarne me na howe
Haan jald ke arsa mere marne me na howe
(23)
Shohrat hai jo ab dijiye sar raah e khuda me
Sau nafa’(faaida) se behtar hai zarar(nuqsaan) raah e khuda me
Aabaadi hai lutt jaaye jo ghar raah e khuda me
Ho eid jo qurbaa.n ho pisar raah e khuda me
Ek ye bhi ataa hai ke bane kaam hamara
Daulat usi ki hai sab aur naam hamara
(24)
Ye sunke gaya khaime me wo saahib e tauqeer
Ulfat se phiri gird e pisar baanu e dilgeer
Lipta ke gale kahene lagi shaah ki humsheer
Sunnlaagayi hai dhoop me ye chaand si tasweer
Do din se iss aafat me nahi soye ho beta
Aankho pe waram(sujan) kaisa hai kya roye ho beta
(25)
Hazrat ki to hai khair kaho ay mere dilbar
Ashk aankho se tapka ke ye bola wo dilaawar
Ab khair kahan katt gaya sab shaah ka lashkar
Ne aapke bete na bhatije na baraadar
Ammu ne bhagaaya tha jinhein wo bhi phire hain
Mazloom padar laakh sawaaro me ghire hain
(26)
Ek hum hain ke baba ki madad kar nahi sakte
Izhaar jawaa.n mardi(dilariz shuja’at) jadd kar nahi sakte
Faujo ke hataa dene me kad(zid) kar nahi sakte
Be hukm koie waar bhi radd kar nahi sakte
Darbaar me sar dene ki baari nahi aati
Sab marte hain aur maut hamari nahi aati
(27)
Rukhsat humein maa dein na phupi dein na padar dein
Majboor hain kyun kar qadam e shaah pe sar dein
Dum bhar me ye maidaan e wiga laasho se bhar dein
Sarkash jo badhe aate hain paspa(shikast, haar) unhe kardein
Andwa o museebat ki safein hatt nahi sakti.n
Wo bediyaan hain paaun me jo katt nahi sakti.n
(28)
Jaayenge kidhar jab na rahe sayyad e aali
Ne dost na humdard na moula na mawaali
Kaisi ye museebat falak e peer ne daali
Ye aaj ka jeena nahi do haal se khaali
Ya koh me ya dasht ke maidaa.n me marenge
Ya bediyaan pahene huey zindaa.n me marenge
(29)
Ulfat me bigadta hai bana kaam hamara
Ab saf’ha e hasti se mita naam hamara
Shohra tha bahot room se taa shaam hamara
Aagaaz to wo aur ye anjaam hamara
Ye manzil e andwa e balaa kaat ke marte
Gar mana’ na hota to gala kaat ke marte
(30)
Sar de ke shuja’aan e arab khuld me pahunche
Duniya se basad aish(aaram o rahat) o tarab(khushi) khuld me pahunche
Phir raahat o aaraam hai jab khuld me pahunche
Ay raah hami.n rehgaye sab khuld me pahunche
Ulfat me koie rokne walaa hi na hota
Ay kaash phupi ne hamein paala hi na hota
(31)
Kisko hai nazar tashna dahaani pe hamaari
Dega na koie nazr bhi paani pe hamaari
Rone ki hai jaa martaba daani pe hamaari
Jeete rahe khaak aisi jawaani pe hamaari
Charcha na fida hone ka duniya me rahega
Maane’(mana karne wala, rukawat) huey maa baap ye koie na kahega
(32)
Hathiyaar kidhar phenkein kahan chhupne ko jaayein
Kis ban me rahein kaunse jangal ko basaayein
Tanha hain sifaarish ke liye kisko bulaayein
Imdaad karein sher e khuda fatima aayein
Ejaaz ho to kaam mera band na hoga
Yun to koie rukhsat pe razamand na hoga
(33)
Zainab ne kaha kispe ye gussa hai mai waari
Kuch muh se kaha maine ke maadar ne tumhaari
Kya waja ye kis baat pe hai girya o zaari
Saj lijiye hathiyaar talab kije sawaari
Insaaf karo sadqe gayi ahl e wafa ho
Rokein to padar paalne waali se khafa ho
(34)
Kyun kaato gala gaiz se kyun hont chabaao
Mai shah e dila dungi raza shauq se jaao
Mar jaaungi sar peet ke aansu na bahaao
Lo rukh ki balayein to mai leloon idhar aao
Taqseer hami se huie lo jaane do beta
Uljhi huie zulfo ko to suljhaane do beta
(35)
Baanu ne kaha lo unhe yun kaun manaaye
Gussa bhi uthaaye wahi jo naaz uthaaye
Samjhi mai ye hazrat se khafa hoke hain aaye
Iss parde me paighaam e judaai bhi hain laaye
Kuch unki hain kuch aapke hain bhaayi ki baatein
Mai khoob samajhti hoon ye daanaai ki baatein
(36)
Baanu ka ye kahena tha ke rukhsat ka hua gul
Raando me shaheedo ki museebat ka hua gul
Aafat ki padi kok qaymat ka hua gul
Iss shor me akbar ki bhi rukhsat ka hua gul
Ghabraa gaye sajjad e hazee.n chaunk ke ghash se
Samjhe ke safar hogaya asghar ka atash(pyaas) se
(37)
Fizza se kaha kya hua kaisi hai ye zaari
Sar peet ke wo khaadima e khaas pukaari
Shabbir akele hain ghazab hogaya waari
Ab jaati hai ran ko ali akbar ki sawaari
Maa khaak udaati hai phupi ghash me padi hain
Sab bibiyaan halqa kiye gird unke khadi hain
(38)
Farmaaya asaa laa ke baraadar se mil aayein
Ghazi se mujahid se dilaawar se mil aayein
Dariya e shahadat ke shanaawar se mil aayein
Shabbir ke pyaare ali akbar se mil aayein
Bhaayi ka nahi kooch ye rukhsat hai nabi ki
Hum aap chalenge ke ziyaarat hai nabi ki
(39)
Fizza ne asaa de ke ye baazu ko sanbhaala
Bistar se uthaa kaamp ke wo geysuvo waala
Kham hogaya tha dard e kamar se qad o baala
Tharra ke pada paaun kahin aur kahin daala
Ashk aankho se bahete the garebaan e qaba par
Har baar thaher jaate the sar rakh ke asaa par
(40)
Aawaaz e hazee.n thi ke meri jaan baraadar
Beemaar baradar tere khurbaan baradar
Hum aate hain thahere raho ek aan baraadar
Zee qadr baraadar mere zeeshaan baraadar
Hum royein tumhe tum kahin rote huey jaao
Bhaayi se bagalgeer(gale milna) to hote huey jaao
(41)
Aabid ki taraf dekh ke daude ali akbar
Aankho ko malaa haatho se qadmo pe malaa sar
Sajjaad ne farmaaya kaleje se lagaa kar
Gardan me meri daaldo baaho ko baraadar
Shaane ke qaree.n zulf e ma’nabbar rahe bhaayi
Chahera mere chahere ke barabar rahe bhaayi
(42)
Ay raushni e khaana e zahera tere sadqe
Ay baap ke aashiq mere shayda tere sadqe
Ay tashna lab ay bekas o tanha tere sadqe
Ay rah e ru e firdaus e mo’alla tere sadqe
Ghar aaj ujadta hai lute jaate hain bhaayi
Hum qaafla walo se chhute jaate hain bhaayi
(43)
Ghurbat me mubaarak tumhe humraahi e shabbir
Kya dekhiye daamaando ko dikhlaati hai taqdeer
Marne ki ijaazat nahi dete shah e dilgeer
Tab kya mujhe aayi ke padi paaun me zanjeer
Lutt jaayega ghar baad shahenshah e zaman ke
Haihaath gala howega halqe me rasan ke
(44)
Ay akbar e meh ru tujhe paaunga kahan mai
Ay safdar e khush khu tujhe paaunga kahan mai
Ay zeenat e pahelu tujhe paaunga kahan mai
Ay quwwat e baazu tujhe paaunga kahan mai
Be ghusl o kafan aap to maidaa.n me rahenge
Hum bediyaan pahene huey zindaa.n me rahenge
(45)
Bhayya ye naqaahat(beemaari se kamzori) meri aur bojh ye ghar ka
Kya zor hai jo hukm e shah e jinn o bashar ka
Ammu ka sahaara na tumhaara na padar ka
Ghurbat to ye aur saamna iss lashkar e shar ka
Ghar jalne me rehne ka nahi hosh kisi ko
Bacho ko sanbhaalunga ke naamoos e nabi ko
(46)
Ay raahat e jaa.n yaawar o ghum khwaar hamaare
Dildaar e madadgaar parastaar(khidmat gaar) hamaare
Pahele na chali halq pe talwaar hamaare
Afsos huye tum na azadar hamaare
Milte hain kahan saath ke khele huey bhaayi
Fariyaad ke hum aaj akele huey bhaayi
(47)
Allah re inn bhaayiyo ki giriya o zaari
Jistarha barasta hai kabhi abr e bahaari
Maa kaheti thi qurbaan mai ulfat ke tumhaari
Bas sabr karo tap me ghash aajaayega waari
Sahera asadullah ki jaayi ko dikhaaye
Bhaayi ka khuda daagh na bhaayi ko dikhaaye
(48)
Ghash aane laga jab to kaha bhaayi se rokar
Kuch humse wasiyyat to karo ay ali akbar
Aahista kahan jaate hain bhaayi suye kausar
Paani jo mile yaad hamein kijo baraadar
Markar bhi pisar qibla o kaaba ke qaree.n ho
Turbat meri paayin e mazaar e shah e dee.n ho
(49)
Iss ma’arka(ladaai) se jab ho watan aap ka jaana
Sughra ko kaie baar kaleje se lagaana
Kahena ke bahen phir gaya baba se zamaana
Waada to kiya tha pa na tum tak hua aana
Shabbir pe faujo ki ghataa chhaa gayi sughra
Aane hi ko hum the ke ajal aayegi sughra
(50)
Ye kaheke phupi paas gaye akbar e dilgeer
Haatho ko bhi joda ke bajal kijiye taqseer
Muh dekh ke maadar ka ye ki yaas se taqreer
Doodh aap bhi bakshein to mile izzat o tauqeer
Iss murda se tan me mere jaan aagayi amma
Do roz ki ye pyaas abhi bujh jaayegi amma
(51)
Zainab ne kaha mai hoon razamand o sana khwaa.n
Taqseeri teri kuch nahi ay akbar e zeeshaa.n
Maa boli mai inn sukhe huye honto ke khurbaa.n
Lo doodh bhi baksha tumhe maa ne badal o jaa.n
Aage tere duniya se safar kar na gayi maa
Ye zikr sunaa haaye ghazab mar na gayi maa
(52)
Ye sunke tadapne jo lagi zainab e na shaad
Hai hai ali akbar ki huie raando me fariyaad
Jis waqt chala khaime se wo ghairat e shamshaad
Gul tha ke bahu fatima ki ab huie barbaad
Yun gird haram rote the iss sarvi rawaa.n ke
Jistarha ke maatam ho janaaze pe jawaa.n ke
(53)
Fizza ne jo parda dar e daulat ka uthaaya
Khursheed e mubee.n burj e sharaf se nikal aaya
Zarro pe jo padhne laga iss meher ka saaya
Chillaayi zamee.n sabse fazo.n hain mera saaya
Mai rutbe me hoon charq(falak) e chahaarum se ziyaada
Khursheed mere paas hain anjum se ziyaada
(54)
Geti(duniya, kayenat) meri iss noor se hai toor e tajalla
Bhaari hai taraazu ke falak se mera pallaa
Daaman hai mera hoor o malaaik ka musallaa
Mujh par wo mere jisko ali se hai tawallaa
Taa hashr hai ye faiz shahenshah e huda ka
Tasbeeh meri hoyegi aur zikr khuda ka
(55)
Pahunche jo qaree.n shah ke to ki arz ke hazrat
Iqbaal se moula ke mili jung ki rukhsat
Farmaaya ke deti hai chehre ki bashaashat(khushi)
Mas’ood(mubarak, saeed, nek) wo mubaarak safar e gulshan e jannat
Marzi ho to ye peeri bhi de saath tumhaara
Nibh jaayenge hum thaame huey haath tumhaara
(56)
Akhar ne kaha aap salaamat rahe aaqa
Duniya ka sharaf daulat e dee.n izzat o uqbaa(aakhirat, dusra jahan)
Kausar ki na khwaahish hai na jannat ki tamanna
Hoon mai faqat aab e dum e shamsheer ka pyaasa
Tauqeer mile khalq me maa baap ke aage
Mushtaaq hoon iska ke maroo.n aapke aage
(57)
Naam aapke baba ka hai kaunain me shaaha
Yaaseen kaha haq ne kaha hai kahin taaha
Jo aapne tifli me kaha usko nibhaaya
Chaaha wahi moula ne jo allah ne chaaha
Qurbaan mujhe kijiye ye tamanna e dili hai
Meeraas e khaleel aapko hisse me mili hai
(58)
Farmaaya aala rahe pisar aaqil o daana
Hai zaat e khuda qaadir o qayyum o tawaana(ekhtiyaar waala)
Jo aaya hai ek din usay dar pesh hai jaana
Aage koie peeche koie hota hai rawaana
Waqza kabhi din ka hai to arsa kabhi shab ka
Jab tay huie manzil to makaa.n ek hai sabka
(59)
Thi subha ke ahbaab musaafir huey saare
Din do paher aaya tha ke abbas sidhaare
Ab jaate ho tum baad e zawaal ay mere pyaare
Arsa nahi kuch aate hain hum baad tumhaare
Tum aur na bhaayi na bhatija na pisar hai
Rote hain hum iss par ke zaeefi ka safar hai
(60)
Ek hum hain ke iss pyaas me kaam aaye hain sabke
Laashe hain le aaye shuja’aan e arab ke
Faaqe se kaie roz ke jaage huey shab ke
Hota tha ye saabit ke ghash aajaayega ab ke
Aada ne jahan dost ko maara wahin pahunche
Maidaa.n me hume jisne pukaara wahi pahunche
(61)
Itna bhi koie mera nahi ay akbar e meh ru
Jab teero se girbaal(chalni) karein jism jafa joo
Talwaaro se majrooh(zaqmi) ho sar teero se pahelu
Ghode se utaare to koie thaam ke baazu
Paamaal hume lashkar e naa ahel karega
Par khair ye mushkil bhi khuda sahel karega
(62)
Har tarha guzar jaayegi ay akbar e zee jaah
Par ulfat e aulaad se aajiz hai bashar aah
Kuch jaan chali jaati hai tan se tere humraah
Ghash aata hai girte hain sanbhaalo hume lillah
Bas paas pisar ho wo jawaa.n bakht(naseeb, qismat) ho beta
Ye hijr to kuch maut se bhi sakht hai beta
(63)
Kis tarha sanbhaaloo.n ke dil e zaar na tadpe
Kuch dil ki kahun qalb jo ek baar na tadpe
Iss tarha koie marge giraftaar na tadpe
Yun marte huey saahib e aazaar na tadpe
Taaza ghum e mehboob e khuda hogaya mujhko
Abtak to mai acha tha ye kya hogaya mujhko
(64)
Guzri nahi iss tarha ki eeza kabhi dil par
Ay laal ye sadma nahi pahuncha kabhi dil par
Barchi kabhi seene pe hai neza kabhi dil par
Gah dil hai kaleje pe kaleja kabhi dil par
Ab ashko ki nadi bhi bahaayi nahi jaati
Wo aag lagi hai ke bujhaayi nahi jaati
(65)
Lo chhaati se lipto ke qaraar aaye jigar ko
Farzand ne kham ho ke rakha paaun pe sar ko
Hazrat ne kaha chhaati se lipta ke pisar ko
Barbaad kiye jaate ho akbar mere ghar ko
Manzoor ye tha saath maroo.n saath fida hoon
Par khair sidhaaro ke mai raazi ba raza hoon
(66)
Rukhsat huey jab shah se ali akbar e zeeshaa.n
Ghode pe chadhe aap khula rahel pe quraa.n
Wo rakhsh(sufaid aur surkh mila hua rang) chhal-bal(chamak, chaalaaki) Wo ziyaa(noor) e rukh e taabaa.n
Ek barq(bijli) chamakti huie pahunchi sar e maidaa.n
Zardi rukh e khursheed pe chhaayi nazar aayi
Purto se zamee.n ran ki tilaayi(jis par sone ka kaam kiya hua ho) nazar aayi
(67)
Sab dasht basa phoolo se bu(smell) tan ki jo phaili
Firdaus me mehmaan e khuda jin ke tufaili
Noor aisa jahan chaadar e mehtaab(chaand) bhi maili
Geysu wo ke majnoo.n(paagal) ho jinhe dekh ke laili
Ek ishq hai honto ke halaawat(mithaas) talabo ko
(68)
Aankho se khajil(sharminda) aahu e cheeni ko khataai(naan khatai, sweet biscuit)
Dono ne ye chatoon ye siyaahi nahi paayi
Mardum(aadmi, narm dil wala) ke liye faqr hai yaan naasiya saayi(aajiz, peshani zameen par ragadne walaa)
Shero ko tap aati hai dum e chashm numaayi(zahoor, izhaar)
Yaan kuch gul baa daam haqeeqat nahi rakhta
Nargis(ek qisam ka phool ka pauda) wo kahega jo basaarat nahi rakhta
(69)
Deewaani ho.n pariyaan nazar aaye jo ye raftaar
Go shauq e shahadat hai pa ujlat(jaldi) nahi zinhaar(hargiz)
Tham tham ke uthaate hain qadam murdim e deedaar
Pahuncha na sulaimaa.n se kabhi mor ko aazaar
Laazim hai sadaa paas zaeefo ka qavii(taqat war) ko
Dekha hai kabhi sher ki aahista ravii(nek chalani) ko
(70)
Pehshaani pe thahere ye nazar ko nahi yaara
Sajde ka nashaa.n hai ke chamakta hai sitaara
Dushman ke liye tegh hai abru(bhaau) ka ishaara
Palkein bhi hain khoo.n rezi(qatl, lahu nikaalne ka amal) aada pe safd aara
Khaal aise ke akhtar(sitaare) sabhi sharmaate hain jin se
Aankhein wo hiran sher dabak jaate hain jis se
(71)
Wo shaan wo shaukat wo tahoor(paak o saaf) wo jalaalat
Chhupte hain kahin jauhar e shamsheer e asaalat(asliyat, asl nasl)
Teenat(aadat, mizaaj, tabiyyat) me karam taaba’(tabiyyat wala, zahen) me insaaf o adaalat
Iqbaal ali shaan e shahenshah e risaalat
Dekha jo wo rukh arsh ke sartaaj ko dekha
Zulfo ko jo dekha shab e meraaj ko dekha
(73)
Bheegee.n hain masee.n(daal mung, mota chhota,gareebo ka khaana) sabza e khat bhi hai namoodaar
Goya ke khizr aab e baqa ke hain talab gaar
Wo fasl e shabaab(jawaani) aur wo rang e gul e rukhsaar
Dandaa.n wo sab almaasjawaahiraat, diamonds) se lab laal gohar baar
Yaan jode huey haath fasaahat(khush bayaani) bhi khadi hai
Taqreer musalsal hai ke moti ki ladi hai
(74)
Kis husn se lab par sataaish(humd o sana) ab o heed(tavajja) ki
Aada ko dikhaate hain wigaa badr o uhad ki
Naara hai ke haidar ne rasoolo ki madad ki
Toda hai dar e khilla ko shiddat me ramad(aankhi dukhne ki beemaari jisme aankh surkh aur laal hojati hai) ki
Gardish kabhi wahi kabhi uncha kiya sar se
Halka tha wo dar dast mubaarak me sipar se
(75)
Tha fauj ko khandaq se utarne me taa mul
Khandaq ka isi dar ko bahaadur ne kiya pul
Jabtak na gayi fauj e nabi khilla me bilkul
Thaame rahe ek haath se dar saahib e duldul
Wo paaye mubaarak the hawa par na zamee.n par
Moula ke qadam the par e jibreel e amee.n par
(76)
Taqseem ganeemat se huie jab ke faraagat(fursat)
Phir tod ke iss dar ko lage baantne hazrat
Faulaad(sakht loha) hua mom zahe(shabaash, wah wah, subhanllah) zor e wilaayat
Kisme thi siwa baazu e ahemad ke ye taaqat
Sab tukde barabar the ajab adl o karam tha
Tola to jau(barley/jau ka daana) bhar ye ziyaada na wo kam tha
(77)
Aagaz e rajaz tha ke huie teero ki bochhaar
Shahezaada e aalam ne bhi li mayaan se talwaar
Talwaar ke kheenchna ke tha fauj me rahewaar
Rahewaar ki chal phir me safein pas gayin do chaar
Iss shaan se lakht e dil e sher e samad aaya
Goya saf e aahu pe yakayak asad aaya
(78)
Halchal thi ke talwaar chali fauj pe san se
Dhaalien to rahe haatho me sar udgaye tan se
Taair(parinde) bhi hawa hogaye sab zulm ke ban se
Aage tha hiran sher se aur sher hiran se
Gul tha ye jari misl e yadullah ladega
Tar hogi zamee.n khoo.n se wo ran aaj padega
(79)
Talwaar thi jarraar ki ya qaher e khuda thi
Sar tha to alag tha jo kamar thi to juda thi
Bijli jo idhar thi to udhar sail(bahaau, sailaab) e fanaa thi
Talwaar bhi yun sar pe jab aayi to qaza thi
Be sar huie wo saf jo nazar chadh gayi uski
Chaaha jo lahu aur burish(kaat, dhaar) badh gayi uski
(80)
Jis saf me chali khoon me gultaa.n(lutt putt) kiya usko
Majma tha jidhar dum me pareshaa.n kiya usko
Jo aage badha gaul se be jaa.n kiya usko
Bakshi jisey jaa.n banda e ahesaa.n kiya usko
Be sar tha azal se thi khataa asl me jiski
Maara usay deendaar na tha nasl me jiski
(81)
Kya haath tha kya tegh thi kya himmat e aali
Dum bhar me namoodaar safein hoti thi.n khaali
Jab jhoom ke dhaalo ki ghataa aati thi kaali
Bijli si chamak jaati thi shamsheer e balaa li
Milta tha nashaa.n ran me safo ka na paro ka
Tha shor ke minh(baarish) aaj barasta hai saro ka
(82)
Aafaaq me jinki qadr aandaazi ka tha shor
Haath unke piyaado ki tarha hogaye kamzor
Be jaa.n koie sarkash koie bad keesh lab e gor
Kar deti thi taa bandagi barq e do dum e kor
Soofaar(teer ke nichle hisse ka wo shigaaf jise kamaan ke tar par rakh kar chalate hain ) ko chale se milaana kisey sujhe
Rukh phirgaye ho.n jab to nashaana kisey sujhe
(83)
Kya harb(ladaai, jung) thi qurbaan jigar gosha e shabbir
Nikla jo kamaa.n se to qalam hoke gira teer
Aaya jo kamaa.n leke kamee.n se koie be peer
Gosha tha na chilla tha na halqa tha na zahegeer(wo anghoti jo teer chalate waqt ungli ke hifazat ke liye pahunch jaati hai)
Jo daar tha safdar ka judaai se juda tha
Qabze se kamaa.n haath kalaai se juda tha
(84)
Ya sher e khuda kaheke jab aada me dar aaye
Anbaar tan o sar ke do rasta nazar aaye
Yun gaiz o ghazab me idhar aaye udhar aaye
Jaise saf e aahu ki taraf sher e nar aaye
Jaano ko bachaate the piyaade bhi na hatt kar
Gir padte the ghode bhi sawaaro pe ulat kar
(85)
Kat kat ke har ek zarb me sar girte the sar par
Barchi pe na phal tha na koie phool sipar par
Phir jaati thi gardan pe kabhi gaah jigar par
Markaz ki tarha thi kabhi dushman ki kamar par
Nikli jo kamar se to chali khaana e zee.n par
Zee.n se thi jo markab me to markab se zamee.n par
(86)
Ne khud na chehra ya jhilam(lohe ki kadiyaan jo zira ki tarha hoti hai jo jung me pahente hain) chhodti thi wo
Ne haath na beeraq na alam chhodti thi wo
Ne halq na seena na shikam chhodti thi wo
Ne khoo.n na ragein tan me na dum chhodti thi wo
Aajaati thi aawaaz zahe(wah wah) zarb ki zah se
Gul tha ke ye kadiyaan nahi uthne ke zirah se
(87)
Waan shaamiyo me shab thi idhar noor ka tadka
Qarnaa(ek qisam ki cheez jis se awaaz paida hoti ho) ki wo awaaz wo kadketiyo ka kadka
Tadpaata tha har qalb ko sar katne ka dhadka
Ek gul tha ke do laakh pe bhaari hai ye ladka
Tan jalte hain phir kis se jo barq iss me nahi hai
Sar jism se ud jaayenge farq isme nahi hai
(88)
Allah re zabaa.n aavri tegh e bala nosh
Zar hain huma tan chashm thi.n daalein huma tan gosh
Ghaat aisa ke dar se lab e dariya bhi the khamoosh
Baadh aisi ke thi.n machhliyaan paani me zira posh
Kitne the gale tez zabaani se usi ki
Dariya bhi the chakkar me rawaani se usi ki
(89)
Taabe wo ke shay rag kisi gardan me na chhodein
Dushman ka gala khilla e aahan me na chhodein
Jauhar wo ke halqa kisi jaushan me na chhodein
Passhe wo qayamat ke lahu tan se na chhodein
Muh wo hai ke dum shat e khoo.n behti hai jiske
Qabza wo hai qabze me zafar rehti hai jiske
(90)
Badli ki tarha shaam ki jab fauj ghar aayi
Phir tegh ne bijli safe aara pe giraayi
Daawa tha magar bhool gaye har zah dar aayi
Chillaate the bhaago ke wo khoo.n khwaar phir aayi
Har baar hai maujood to har baar nahi hai
Ye marg e mufaajaat(achaanak) hai talwaar nahi hai
(91)
Shamsheer se ek khairu se hai sher jo hum naam
Rob isne ye paaya hai ke tharraate hain andaam(jism, badan)
Tham jaati hai bijli magar isko nahi aaraam
Geti(duniya, kayenat) ko ulat de ye qayamat hai wo samsaam(shamsheer)
Mareeq larazta hai to jauhar se isi ke
Shero ke chadhi rehti hai tap dar se isi ke
(92)
Chaar aayina yun katt te the ek ek jawaa.n ke
Jis tarha ke mehtaab me tukde ho kataa.n ke
Sehme the kamaa.ndaaro ke dil khauf se jaa.n ke
Chilla na khincha tha ke ye thi sar pe kamaa.n ke
Chillaate the sab misl e ajal aati hai ye to
Saifi se bhi jaldi kahin chal jaati hai ye to
(93)
Ladne jo bada bol koie bol ke aaya
Ye sher bhi shamsheer e do dum tolke aaya
Shahebaaz e ajal said(shikar karna) pe par khol ke aaya
Udta hua sar beech me iss gol(bheed) ke aaye
Haq jiski taraf wo zabardast raha hai
Sach hai ke bade bol ka sar past raha hai
(94)
Hum chashm tha abru se hussainiyo ka kham uska
Allah re chamak barq bhi bharti thi dum uska
Naagin thi utarta hi na tha chadh ke sam(surr,taal, aawaaz) uska
Har haath me haath iska to baazu qalam uska
Jauhar ki chamak dekhi na heero ki nagoo.n me
Yun daudti thi tan me lahu jaise rangoo.n me
(95)
Ek barq si girti thi har ek dastmi jaa.n par
Gah sar pe kabhi dhaal pe aur gaah sina par
Tarkash(teer) pe kabhi san se kabhi gaah kamaa.n par
Kis tarha bhala zikr e burish(kaat dhaar) laau zabaa.n par
Dil se kahin jeene ki hos qata’ na hojaaye
Dum band hai dar se ke nafas qata’na hojaaye
(96)
Lohe se isi tegh ke aayina bane gar
Aks isme jo dushman ka nazar aaye to be sar
Paaye nahi abtak kisi harbe(ladne waale ne) ye jauhar
Zikr iski burish(kaat, dhaar) ka jo musaafir ke ho lab par
Qataaye’ tareeq(tareeqa) aaye to wo khauf se hatt jaaye
Kaisi hi kadi raah ho ek aan me katt jaaye
(97)
Maashooq ko aashiq se juda karti thi shamsheer
Har aan akbar ka adaa karti thi shamsheer
Jhukti thi jidhar hashr bapa karti thi shamsheer
Jab uthta tha sar humd e khuda karti thi shamsheer
Mareeq bhi dil baakhta(haara hua) tha saamne uske
Gardoo.n sipar andaakhta(nikla hua, phenka hua) tha saamne uske
(98)
Halchal me ye saf girti thi jab saf pe udhar ki
Na hosh tha tan ka na khabar tegh o sipar ki
Bhoola hua tha baap mohabbat ko pisar ki
Jaage to ye samjhe ke hame paaun ne sarki
Marte to lahu tegh ki gardan pe na hota
Karte na madad paaun to sar tan pe na hota
(99)
Sau sau ka saraak zarb me kahete nahi dekha
Yun gaiz me shero ko jhapat te nahi dekha
Badhkar kabhi jarraar ko hatt te nahi dekha
Ghode ko kisi baag pe phat te nahi dekha
Jab haath utha barchiyo phir aata hai ghoda
Putli(deeda jo gol aur kaala hissa aankho ka) ke ishaare ko samajhta hai ghoda
(100)
Aafat me ramaana(jism ko aalooda karna, qabze me karna) tha talaatum(toofaan) me khudaai
Chilaati thi.n pariyaan ke sulaimaa.n ki duhaai
Dikhlaa gayi tegh apni burish sar pe jab aayi
Har saf ko dikhaa deta hai haath apni safaayi
Wo choor tha taapo se jo tausan(ghoda) pe chadha tha
Aswaar to aswaar faras ran pe chadha tha
(101)
Har laal tha gairat dahe tegh e safhaani
Jab taap padi khaak se paida hua paani
Kaff muu se giraata ye ghazab ki thi nishaani
Tezi ye hawaa me thi na dariyaa me rawaani
Yum rakhta tha aahista qadam dosh e saba par
Yun gultari jaati hai jistarha hawa par
(102)
Sar’at(haalat) me tag(tez, daudna) o do me chilaade se ziyaada
Baag iski thi kya jo dil e raakib ka iraada
Dariya pe samajhta tha har ek mauj ko jaadah
Tayyaar khanal tang kamar seena kushaada(khula hua, phaila hua)
Shola hua paska jo zara gaiz me aake
Bijli ko ragein aag ka dum paaun hawa ke
(103)
Jab khaak pe khangal(ek qism ka zira) me qadam rakhta tha tan ke
Sar apna shapak(tezi se rasta tay karna) dete the taaus(mor) chaman ke
Rashk e ma-e-nu(chaand gardan e pur noor ke manke
Jam jam ke udaa dah to uday hosh hiran ke
Paamaal hua jaata tha dil kabk e dari(pahaadi chukoor) ka
Ghode ke achaanak ke jhakda tha pari ka
(104)
Kar laakh madad gardish e ayyaam ko pahunche
Kab sara’t e shabdez subuk(halka, kam wazan) gaam(qadam) ko pahunche
Waan pahunche ye aur subha na aur shaam ko pahunche
Jis ban me laseem sahari shaam ko pahunche
Daf’fa kahin ye asp e subuk(tez na chalne wala ghoda) pe nahi karta
Khursheed bhi manzil koie yun tay nahi karta
(105)
Kar aag kahun aag ba sar’at nahi rakhti
Gar kahiye hawa wo ye haraarat nahi rakhti
Gar barq kahun barq ye jaudat(tezk) nahi rakhti
Gar hoor kahun hoor ye surat nahi rakhti
Yaan qadr na bijli ki na kuch paik hawa ki
Bas khaahmaas par hai ke khudrat hai khuda ki
(106)
Pariyo ki bhi iss tarha sawaari nahi chalti
Inn pheriyo se baad e bahaari nahi chalti
Iss zor se talwaar do baari nahi chalti
Chalte hain qadam yun ke kataari(chhoti khanjar) nahi chalti
Do gaam bhi saath iske zee.n chal nahi sakti
Iss tarha ye chalta hai ke bas chal nahi sakti
(107)
Jis waqt wiga ka na raha ek ko yaara
Khaime se nikal kar pisar e saad pukaara
Do laakh ne bhi milke na ek tifl ko maara
Ab chaadarein odho ke mita naam tumhaada
Jee haar diya fauj ne izzat gayi sabki
Le aab huie aaj se talwaar zarb ki
(108)
Ye sunte hi gaiz ek yal(pahelwaan) e gaddaar ko aaya
Maidaa.n me udaata hua rahewaar ko aaya
Kis gaiz se tole huey talwaar ko aaya
Dilband e yadullah se paikaar(ladaai, jung) ko aaya
Kaandhe pe sipar lab pe sukhan be adabi ke
Zaalim ko adaawat thi gharaane se nabi ke
(109)
Rustam(pahelwan) ki tarha apne tan o tosh pe garra(ghuroor, tang mizaaj, ghamand)
Khursheed pe gaalib kabhi hota nahi zarra
Badkaar jahan husn liya qat se muarra(nanga, aari,)
Gardan thi azal se ta shamsheer tabarra
Pur hol ho rasta wo siya roo jo guzar jaaye
Surat wo ke ‘ifreet(shaitan, khabees) jisey dekh ke dar jaaye
(110)
Wo khud tahmatan(pahelwan) se bhi jiska na uthe baar
Chaar aayina ek khilla e faulaad ki deewaar
Azdar to khud aur maare siya neza o khoo.n khwaar
Wo gurz e garaa.n(bhaari, wazni) sar jo kare koh(pahaad) ko mismaar(munhadam, tabah o barbaad)
Khanjar wo ke mareeq(marne wala) ka rang udta tha jis se
Dhaal aisi ke talwaar ka muh mudta tha jis se
(111)
Qaatil ne rajaz padhke taga dar(talwaar) ko nikaala
Akbar bhi badhe chalne laga bhaale pe bhaala
Azdar the zabaano ko nikaale tahobala
Gardan ko ladaaye huey tha kaale se kaala
Padti thi sina par jo sina dasht e wiga me
Chingaadiyaan udti nazar aati thi hawa me
(112)
Har ta’n(neze ka waar) me yaan mudge waan udgaye rahewaar
Nuqat ye samatne me wo phir jaane me parkaar
Choome jo kaie khaake jhabakne laga garraar
Naize ko udaa le gaya naize se wo jarraar
Kya band bandhe lakht e dil e uqda kusha par
Dekha to sina khaak pe thi daand hawa par
(113)
Guess me kamaa.n le ke badha sarkash e be peer
Sar par tha uqaab e ali akbar sifat e teer
Panja tha ke sar panja zirgaam(babar) adad geer
Gul tha zahe(waah waah, subhanallah) zor e jigar gosha e shabbir
Ya dekhti thi fauj faras ki tag o do ko
Ya panja e khursheed me dekha ma e nu ko
(114)
Phir gurz e garaa.n sher ko gaddaar ne maara
Uss zarb ko rokar ke badha shaah ka pyaara
Chamka jo tabrez malakul maut pukaara
Lo qata hai ab naql e hayaat e sitam aara
Shero ke jigar kaamp gaye khauf se barme
Do tukde hua gurz e garaa.n ek tabar me
(115)
Khiffat(sharmindagi) huie jhatke kaie zaalim ne jo khaaye
Paise kabhi daant aur kabhi hont chabaaye
Rubaah(hirni) zafar sher pe kis tarha se paaye
Phir gird se khaak udke agar arsh pe chhaaye
Haan sar ka sharaf paaun ko haasil nahi hota
Asfal(past,haqeer, adna) kabhi aala ke muqaabil nahi hota
(116)
Akbar ne kaha khair thaka gar hai to dum le
Be tere badhe waar karein hum to qasam le
Dum le ke bas ab mayaan se shamsheer e do dum le
Kya karte hain hum dekh zara shero ke hamle
Naakhun jo na ho uqda e mushkil nahi khulta
Jabtak ke na talwaar khinche dil nahi khulta
(117)
Margoob hai dirham ki na deenaar ki jhankaar
Bhaati hai na zanjeer ki ne taar ki jhankaar
Dilchasp nahi zarf tilaakaar ki jhankaar
Kaano ko bhali lagti hai talwaar ki jhankaar
Waarastaa isi ki hai zira dhaal isi ki
Kitne hai gale jiske rah hai chaal isi ki
(118)
Hai tool amal neza e khafi ka hilaana
Karti hai kamaa.n teer safaahat(kameena pan, bewakufi) ka nashaana
Gurz e faqat baar e garaa.n dosh pe laana
Lohe ko magar tegh ke maane hai zamaana
Aisa koie munsif(aadil) hai arab me na ajam me
Jab khinch gaie talwaar to hai faisla dum me
(119)
Khooshtar hai kham uska kham abru e zam se
Butt usne nikaale hain ishaare me haram se
Paaya hai rah e raast ko talwaar ke kham se
Seekhe koie aatish nafsi tegh e do dum se
Dushman jo badhe taab kahan rehti hai usko
Saifi ki dua wird e zabaa.n rehti hai usko
(120)
Talwaar se kaampa kiye kuffaar e arab sab
Duniya se jahannum ko kiye antar o marhab
Sar taaba qadam ‘amrid bhi tha jahel e markab
Zulmat na rahi kufr ki wo qatl hua jab
Nusrat thi jidhar tegh chali haq ke wali ki
Allah ne ki aap sana zarb e ali ki
(121)
Sar sabz kiya gulshan e islaam usi ne
Kaabe se juda kardiye asnaam(butt) usi ne
Shaaho ko diye maut ke paighaam usi ne
Qabze me kiya room se taa shaam usi ne
Kaampa kiye khaakhane jahan harb se uski
Jaari hua sikke ka chalan zarb se uski
(122)
Aafaaq me hai dabdaba shaahi ka usi se
Aagaaz hai mulko ki tabaahi ka usi se
Iqbaal chamakta hai sipaahi ka usi se
Baitha hai amal sher e ilaahi ka usi se
Yaad unko na bhooli koie dum tegh e ali ki
Jibreel bhi khaate hain qasam tegh e ali ki
(123)
Chaar aayina murdo ke liye dafe’ zarar hai
Jauhar hai zira qabza e shamsheer sipar hai
Gah haath ki zeenat hai gah zeb e kamar hai
Rakhlijiye pahelu me to aaraam e jigar hai
Khush qadr hai khush asloob(surat, dhang) hai khush hai hasee.n hai
Jab ye ho to haajat kisi harbe ki nahi hai
(124)
Jab tezi e shamsheer e zabaa.n usko dikhaai
Thanda to hua tha pa haraarat bhi kuch aayi
Talwaar alam karke jo dhaal usne uthaayi
Maloom hua tera ghata koh pe chhaayi
Khursheed hua zard udi gird ye ban ki
Ghode ki tagaabo se zamee.n hil gayi ran ki
(125)
Shabrez ko akbar ne bhi kaawe pe lagaaya
Waan se bhi tadap kar faras e tez tag aaya
Muh khole huey sher pe hamle ko sag aaya
Par dab ke alag zid se gaya aur alag aaya
Laati thi ajal kheench ke shamsheer ke muh par
Aasakta hai rubaah kahin sher ke muh par
(126)
Akbar ne sadaa di ke thaher saamne aakar
Kyun muh ko chhupaata hai sipar chahere pe laakar
Murda na dikha waar hareefa na wiga kar
Kuch apne risaale ke jawaano se haya kar
Nadaan hai tameez haq o baatil nahi rakhta
Tu aise tan o tosh pe kuch dil nahi rakhta
(127)
Ye khauf kahin jaan na ghabraake nikal jaay
Boda(darpuk, kamzor) hai jo ladne ki jagah paake nikal jaay
Aisa na ho talwaar koie khaake nikal jaay
Panje se na shero ke shikaar aake nikal jaay
Ek jaa sifat e saaya e aahu nahi thamta
Beemaab thaher jaata hai par ru nahi thamta
(128)
Tujhsa to jawaa.n lashkar e bad khu me nahi hai
Haan zor e shuja’at tere baazu me nahi hai
Ghoda hai ye chaalak pa qaabu me nahi hai
Faujein hain udhar yaan koie pahelu me nahi hai
Hum ek hain jaa.n baaz ke faujo se lade hain
Kya tujhko kahenge jo safein baandhe khade hain
(129)
Naize ke hilaane me bhi tu zor ko haara
Kyun maine kamaa.n phenli aur teer tumhaara
Ek zarb e tabar thi huwa gurz do paara
Ladne pe tabar hai tere dastam(haath) aara
Aa tegh jawaanaan e khush iqbaal ke upar
Chehre ko chhupaata hai jhilam(zira) daalke muh par
(130)
Ye sunke bade gaiz o gazab me wo yal(badd zaat) aaya
Akbar ne kaha aa ke muqaam e ajal aaya
Yaare shajar e jurriyat o himmat me phal aaya
Bas rok le bode ke faras muh ke bal aaya
Ye phoolne phalne ki magar fasl nahi hai
Gir padta jaldi teri kuch asl nahi hai
(131)
Talwaarein khinchi barchiyaan chamki alan uthe
Ghodo ke tag o po hain barabar qadam uthe
Nazzaara ko gardoo.n pe malaaik baham uthe
Gir gir idhar khaak pe shaah e umam uthe
Akbar jo muqaabil huey iss zaal(aurat) o muzil(gumrah, gumrah karne wala) se
Shabbir qareeb aagaye be taabi e dil se
(132)
Chillaaye ke ay mere bahaadur tere qurbaa.n
Ye pyaas kaie roz ki ye dhoop ye maidaa.n
Kuch ye jino se bhi qavi(takhatwar) teri hai meri jaa.n
Iss dev(khabees, zaalim shaks) pe allah zafar de tumhe iss aa.n
Kya pyaas bahot hai ke pukaara nahi jad ko
Ab dil nahi qaabu me hum aate hain madad ko
(133)
Rone lage akbar ye sada sunke padar ki
Jode huey haatho ko rukh e shah pe nazar ki
Ki arz dua bas hai shah e jinn o bashar ki
Iss waqt nahi pyaas qasam aapke sar ki
Ghazi hain alam tashna dahaani ka nahi hai
Iss shakl me kuch dhyaan bhi paani ka nahi hai
(134)
Tashweesh na farmaayiye(pareshaani) maine isay maara
Aaya hai to jaata hai kahan ye sitam aara
Marhab ki tarha tool me karta hoon do paara
Allah ki taaid hai moula ka sahaara
Dil aap badhayenge tobadh badh ke ladunga
Iss dev(jin, khabees, badkaar) se mai sura e jinn padhke ladunga
(135)
Har channd sin iska hai ziyaada mere sin se
Paani bhi labo tak nahi pahuncha kaie din se
Bezaari hai jinn o malak o ins ko inse
Hum wo hai ke jaa.n bar(mehfooz) na huey dev bhi jinse
Uss jaah ke azdar bhi churaaye hain dum abtak
Mash’hoor afsaana e beerul alam abtak
(136)
Qaadim ki ladaai nahi kuch qaabil e taareef
Aaqa ki karam se hai bahot pyaas me tanzeef(khoon nikaalna, aurat ka khoon nikaalna)
Ghum ye hai ke moula ko nihaayat huie takleef
Hai dhoop kadi saaye me le jaayiye tashreef
Gardan hai ta e tegh ab iss abd juu ki
Chhintein na pade qibla e aalam pe lahu ki
(137)
Hazrat ne kaha khair khuda haafiz o naasir
Jurraat me na tum kam ho na mai sabr me qaasir
Ye bekas o be par hai madad karne ko haazir
Dab jaayega adna se bhi adna hai ye kaafir
Tewar kahin chhupte hain shujaa e azali ke
Aala se tum aala ho ke pote ho ali ke
(138)
Haan dahni taraf aane na dijo usay zinhaar
Ghode ko badhaye huey roke huey talwaar
Maghroor tan o tosh pe apne hai ye gaddaar
Khud muh ke bal aayega jo khaali gaye do waar
Dushman jo lade jamke to phir lutf siwa hai
Haan thaamlo baag iske faras ki to maza hai
(139)
Ye sunke badha jung ko wo sher e nareena
Pahuncha tha jisey zor e ali seena ba seena
Shaukat wahi sab thi wahi hamle ka qareena
Shabeez pe the aapke khaatim pe nageena
Yun seena kushaada gaye uss ahd e shikan par
Jis tarha jhapat ta hai kabhi sher hiran par
(140)
Lad jaana wo dhaalo ka wo talwaaro ki jhankaar(talwar chalne ki aawaaz)
Aafat ki ladaai thi qayamat ka har ek waar
Marhab tha udhar aur idhar haidar e karraar
Talwaar pe talwaar thi rahewaar pe rahewaar
Bijli si fazoo.n(ziyaada) thi tadap aatish nafso ki
Aswaar tak aajati thi taapein faraso ki
(141)
Mehmeez(taaziyaana) pe mehmeez thi aur kode pe koda
Har martaba muh daalta tha ghode pe ghoda
Kul phirgayi jis baag pe jisne jisey moda
Zaqmi huey par khet ko dono ne na chhoda
Uss roz se teero ki bhi sareeyaa.n(asar) nahi chalti
Yun jhoom ke chalte the ke pariyaa.n nahi chalti
(142)
Sun le jo wo talwaar ghani sunn se phir aayi
Wo khud se malti huie gardan se phir aayi
Wo kheench ke sipar se gayi joshan se phir aayi
Wo said(shikaar karna) se khaali gayi tausan se phir aayi
Haan baad e ali kam huie jung o jidal aisi
Ghul tha kabhi dekhi nahi ru dabdal aisi
(143)
Gusse me jo saffaak(zaalim) ne ki rakhsh(ghoda) ko mehmeez(taaziyaana)
Shahezaade ke ghode ke qareeb aagaya shabreez(kaala ghoda)
Bas thaam li akbar ne anaan(baag, lagaam) e faras(ghoda) e tez
Jhapka tha wo ghoda ke chali tegh e sharar rez
Hosh udgaye uss baani e be dard o sitam ke
Sar kat ke gira farq pe chaalees qadam ke
(144)
Taazi(ghoda) ki anaa.n chhodke ek haath jo maara
Chaaro sume rahewaar kate saaf qazaara(achanak)
Ghoda jo gira dasht e sitam hil gaya saara
Bas choor hua piske wo kaafir sitam aara
Dikhlaadiya safdar ne jo irshaad e pidar tha
Ne paaun the ghode ke na aswaar ka sar tha
(145)
Masroof the ladne me idhar akbar e dilgeer
Betaab the thaame huey dil hazrat e shabir
Tharraate the haath aur zabaa.n par thi ye taqreer
Ye sab teri taaid(imdaad) hai ay maalik e taqdeer
Bekas tere bande pe ajab waqt pada hai
Ya rab ye pisar teesre faaqe me lada hai
(146)
Haftum se hai paani ka talatum(pareshaani, museebat, hangaam) mere ghar me
Na sajr me paani ka thikaana tha na bar me
De sabr ke betaab na ho.n hijr e pisar me
Loota hai mujhe ummat e ahemad ne safar me
Farzand jawaa.n baap se muh mod raha hai
Chhota jo hai gehwaare me dum tod raha hai
(147)
Taalib nahi iska ke salaamat ye phir aaye
Majrooh(zaqmi) teri raah me ho barchiyaan khaaye
Khaadim ke buzurgo ka jo mansab(rutba, darja, ohda) hai wo paaye
Jurraat jo dikhaayi hai to gurbat bhi dikhaaye
Duniya se pur armaan safar karne pe royein
Sab peer o jawaa.n iske jawaan marne pe royein
(148)
Ye kaheke ali akbar e mehru ko pukaare
ahsant mere sher mere pyaas ke maare
Tahero ke padar choome haatho ko tumhaare
Khaali hai alamdaar ki jaa ay mere pyaare
Jafar isi kis bal se isi dhab se lade the
Khaibar me ali bhi yuhin marhab se lade the
(149)
Boseeda(khasta, shikast) hua shah ki sada sunke wo jarraar
Mujra kiya rahewaar se jhuk jhuk ke kaie baar
Ki arz shahadat ki dua ka hoon talabgaar
Ab pyaas ne maara mujhe ya sayyad e abraar
Garmi se ghash aata hai jhuka jaata hai sar bhi
Hathiyaar bhi sab garm hai jalta hai jigar bhi
(150)
Quwwat ka hua zaaf ghata zor e jawaani
Ab deti hai paighaam ajal tashna dahaani
Hai dhoop kadi ay asadullah ke jaani
Jaan aaye zira par jo chidakde koie paani
Sanbhloon to bhagadoon abhi iss lashkar e shar ko
Aisi ho koie cheez ke thandak ho jigar ko
(151)
Hazrat ne kaha paani ka milna to hai dushwaar(mushkil)
Ab door karo khud se kya tumko sarokaar
Jalti hai zira gar to utaaro mere dildaar
Kaafi hai ladaayi me jawaa.n mard ko talwaar
Rahene do jo ho dhoop me aaraam sipar se
Jo seena sipar ho usay kya kaam sipar se
(152)
Kahene ko kaha ye pa hua dil tahobala
Ek seb tar o taaza garebaa.n se nikaala
Bola ye usay soongh ke wo geysuwo waala
Farzand me jaa.n aagayi ay sayyade waala
Ejaaz e imaamat shah e khush khu ne dikhaaya
Paani ka asar seb ki khushbu ne dikhaaya
(153)
Iss seb me boo ki sana ka kisey yaara
Deed iski hai yusuf ke zanqda ka nazaara
Uthjaaye gar iski taraf angusht ishaara
Allah re taaqat ke wo hojaaye do paara
Behtar koie seb iss se nahi khuld e baree.n me
Lau (shamma) aaj tak iski hai mazaar e shah e dee.n me
(154)
Tasleem aur asp saba(thand hawa) dum ko udaa kar
Phir doob gaya fauj me wo sher e dilaawar
Yaan baith gaye thaam ke dil sibt e payambar
Waan shaam ke baadal me ghira ma e anwar
Teero ki jo bochhaar huie chhin gaya seena
Rozan huey itne ke zira bangaya seena
(155)
Tukde huey tegho se pa himmat ko na haare
Majrooh ne isi nafr isi fauj ke maare
Sehra me kabhi the kabhi dariya ke kinaare
Phir dekh gaye baap ko phir ran ko sidhaare
Roke na padar qatl ho lakht e jigar aisa
Baap aisa ho saabir to jari ho pisar aisa
(156)
Ladte the ke peshaani e anwar pe laga teer
Sab khoo.n se bhari ahemad o muqtaar ki tasweer
Likha hai makee.n(pazeer, gira hua shaks, zaalim) me tha koie zaalim e be peer
Barchi jo lagi seene me haalat huie taageer
Allah re shuja’at ke na abru pe bal aaya
Phal usne jo khincha to kaleja nikal aaya
(157)
Tukde jo bahe khoo.n ke wadeedo.n me jigar ke
Ghash hogaye sar gardan e rahewaar pe dhar ke
Nazdeek se phir waar chale tegh o tabar ke
Sab pasliyaan kat kat gayi.n tukde huey sar ke
Talwaarein thi.n ya aap the ya sar pe khuda tha
Jis haath se ladte the wo pahuncho se juda tha
(158)
Jis waqt hawa dene laga zaqm jigar ka
Seene me ruka aake dum uss rashk e qamar ka
Girte huey ghode se qayaal aaya padar ka
Chillaaye ke ab kooch hai duniya se pisar ka
Bekas ki musaafir ki madad kijiye baba
Apne ali akbar ki khabar lijiye baba
(159)
Bete ki sada sunke hua sadma e jaa.n kaah
Ek hook(dard) kaleje me uthi baith gaye shaah
Maaloom hua jaan chali aah ke humraah
Dil thaam ke haatho se kaha ya asadullah
Maa baap ke seene ka maza le gaye beta
Ohda jo tumhaara tha humein de gaye beta
(160)
Chillaaye bataao ali akbar kidhar aayein
Dhundein tumhe iss sajr me ya suye bar aayein
Be taab hai dil qalb me lashkar ke dar aayein
Tum aa nahi sakte to hamee.n laash par aayein
Rang udgaya tha geysuwo par gard gamee thi
Tyoraake jo sanbhle to basaarat me kami thi
(161)
Beta hume phir ya abtaa kaheke pukaaro
Mazloom gareebul guraba kaheke pukaaro
Na shaad giraftaar e balaa kaheke pukaaro
Lab tashna o majrooh e jafaa kaheke pukaaro
Jo waqt moiyyan hai wo hargiz na talega
Khanjar meri gardan pe isi tarha chalega
(162)
Mehru ali akbar ali akbar ali akbar
Diljo ali akbar ali akbar ali akbar
Gulru ali akbar ali akbar ali akbar
Khush khu ali akbar ali akbar ali akbar
Iss umr ka pauda koie be barg na howe
Tujhsa koie duniya me jawaa.n marg na howe
(163)
Attharwa ye saal ye ghurbat ye jawaani
Ye shaan ye iqbaal ye shaukat ye jawaani
Dekhi thi na abtak ye shuja’at ye jawaani
Yun khaak huie haaye ye surat ye jawaani
Kistarha mushaaba(shareek, humsurat) the rasool e arabi se
Goya ke hussain aaj bichhadta hai nabi se
(164)
Le aayi jo be taabi e dil laash e pisar par
Jhukne me nazar pahele padi zakhm e jigar par
Ek teer laga qalb e shah e jinn o bashar par
Seene pe kabhi haath ko maara kabhi sar par
Upar ke dum uss sher ko bharte huey dekha
Baba ne jawaa.n bete ko marte huey dekha
(165)
Honto pe zabaa.n rukh pe araq(paseena) khaak pe geysu
Pathraayi huie aankh kate tegho se abruu
Gardan to kaj(kham, latakna) aur halq pe ek teer sa pahelu
Chehre pe lahu gaalo pe dhalte huey aansu
Ye zer e lab aawaaz ke aaqa nahi aaye
Nazdeek ajal aagayi baba nahi aaye
(166)
Ay dard e jigar tham ke shah e baher o bar aa lein
Ay jaan na ghabra shah e jinn o bashar aa lein
Ay rooh tauqaf shah e waala idhar aa lein
Ay maut thaherjaa padar aa lein aa lein
Armaan e dil e zaar e pisar hosh me nikle
Hasrat hai ke dum baap ke aaghosh me nikle
(167)
Chillaaye shah e dee.n ali akbar padar aaya
Utho mere pyaare mere dilbar padar aaya
Tum dhundte the ay ma e anwar padar aaya
Na shaad padar bekas o be par padar aaya
Kuch dil ki karo baat zara hosh me aao
Sadqe padar aao meri aaghosh me aao
(168)
Muh khole ho kyun teer ko gardan se nikaaloo.n
Gird dahano haatho se baazu ko sanbhaaloo.n
Girta hai pahaad isko mai kistarha se taaloo.n
Marte usay dekhu jisey aaghosh me paaloo.n
Beh behke lahu me jigar aata hai tumhaara
Seene se kaleja nazar aata hai tumhaara
(169)
Kuch muh se to bolo ali akbar ali akbar
Aankho ko to kholo ali akbar ali akbar
Rukhsat bhi to ho lo ali akbar ali akbar
Lo baap ko ro lo ali akbar ali akbar
Dulha bhi iss aaraam se sote nahi beta
Hum rote hain aur tum hai rote nahi beta
(170)
Hum aayein hain lo paas hamaara karo beta
Ek aan ki takleef gawaara karo beta
Kuch kuch to mere dard ka chaara karo beta
Bola nahi jaata to ishaara karo beta
Hoorein tumhe gherein hain mehmaan naye ho
Baatein hain ye kis se ke hamein bhool gaye ho
(171)
Ghash me jo suni baap ki aawaaz pisar ne
Bas haatho ko phailaa diya uss rashk e qamar ne
Lipta liya chhaati se shah e jinn o bashar ne
Muh khol ke dikhlaayi zabaa.n tashna jigar ne
Farmaaya ke qatra mere jaani nahi milta
Majboor hoon akbar mujhe paani nahi milta
(172)
Ki arz ali aayein hain ya shaah e khush anjaam
Haatho me hai kausar ke jhalakte huey do jaam
Ek jaam mujhe de ke basad shafqat o in’aam
Farmaate hain peele isay akbar e gulfaam
Mai kaheta hoon majrooh hoon aawaara watan hoon
Dono mujhe dije ke bahot tashna dahan hoon
(173)
Ashk aankho se tapkaake ye farmaate hain haidar
Shabbir bhi pyaasa hai bahot ay mere dilbar
Ghabra na ke nazdeek hai ab chashma e kausar
Hissa ye tere baap ka hai ay ali akbar
Do din se uthaayein hai ta’ab(ranj) tashna labi ke
Ye teesra faaqa hai nawaase pe nabi ke
(174)
Ye kahete hi aankho se bas aansu huey jaari
Muh pher ke dekha suye sehra kaie baari
Ki arz huzoor aati hai zahera ki sawaari
Phir dard utha seene me phir ghash hua taari
Khole huey aankho ko musaafir huey akbar
Hichki ka bas aana tha ke aaqir huey akbar
(175)
Likha hai ke nikla ali akbar ka idhar dum
Nikli dar e khaima se udhar zainab e pur ghum
Sar nange thi.n peeche kaie saidaaniyaan baaham(saath)
Muh peet ti thi koie koie karti thi maatam
Hilta tha falak naala o fariyaad o buka se
Ek hashr tha haye haye ali akbar ki sada se
(176)
Khursheed chhupa gard(matthi) udi zalzala aaya
Ek abr siya dashr pur aashob(takleef o museebat) me chhaaya
Phaili thi jahan dhoop wahan hogaya saaya
Bijli ko siyaahi me chamakta hua paaya
Jo hashr ke aasaar hain saare nazar aaye
Girte huey maqtal me sitaare nazar aaye
(177)
Mehboob e ilaahi ke nawaasi ka tha ye haal
Sar pe na rida thi na qasaaba tha na roomaal
Kuch chehre pe kuch dosh pe bikhre huey the baal
Har gaam thi bismil ki tadap zaqmiyo ki chaal
Toota tha museebat ka falak zaar o qaree.n par
Thi nasf rida dosh pe aur zulf zamee.n par
(178)
Chillati thi jangal ki mujhe raah bataado
Saidaani hoon rastaa mujhe lillaah bataadi
Kis abr me panhaa.n hain mera maah(suraj) bataado
Laashe pe kidhar ho shah e zee jaah bataado
Aankho me basaarat bhi nahi jaaun kidhar ko
Mai pahle pahl dhoondne nikli hoon pisar ko
(179)
Zainab ki sada sunte hi daude shah e waala
Daamaan e abaa farq pe humsheer ke daala
Farmaaya qadam khaime se kyun tumne nikaala
Ay binte ali margaya wo geysuwo waala
Tukde hain badan kushta e shamsheer hain akbar
Dekhogi kisey khaak pe ab dher hain akbar
(180)
Khamoosh anees aage nahi taab raqam ki
Shaq hoti hai chhaati dum e tahereer qalam ki
Kyun kar koie rudaad likhe ahle haram ki
Haqqa ke nihaayat nahi shabbir ke ghum ki
Masroof har ek ashk bahaane me rahega
Maatam ali akbar ka zamaane me rahega