Bismi Rabbil Hussain
(1)
Phoola shafaq se charkh pe jab laalazaar subh
Gulzaar-e-shab khizaañ huie aayi bahaar-e-subh
Karne laga falak zar-e-anjum nisaar-e-subh
Sar garm-e-zikr-e-haq huey taa’at guzaar-e-subh
Tha charkh-e-akhzari pe rang aaftaab ka
Khilta hai jaise phool chaman me gulaab ka
(2)
Chalna wo baad-e-subh ke jhonko ka dum-ba-dum
Murgaan-e-baagh ki wo khush alhaaniyaañ baham
Wo aab-o-taab-e-naher wo maujo ka pech-o-kham
Sardi hawa me parind ziyada bahut na kam
(3)
Wo subh-e-noor aur wo sahera-e-sabza zaar
The taairo ke gol darakhto pe-be-shumaar
Chalna naseem-e-subha ka reh rehke baar baar
Koo koo wo qamariyo ki wo taaoos ki pukaar
Waa the dareeche baagh behishti naeem ke
Harsu rawaañ the dasht mein jhonke naseem ke
(4)
Aamaada aaftaab ki wo subh ka samaañ
Tha jiski zuu se wajd me taaoos e asmaañ
Zarro ki raushni pe sitaaro ka tha gumaañ
Nehr-e-furaat beech mein thi misl e kahkashaañ
Har nakhl par ziyaa-e-nakhl-e-sar-e-koh-e-toor thi
Goya falak se baarish-e-baaraan-e-noor thi
(5)
Auj e zameeñ se past tha charkh-e-zabarjadi
Koso tha sabza zaar se sahera zamarrudi
Har khushk-o-tar pe tha karam-e-behr-e-sarmadi-Be-aab the magar dur-e-
dariya-e-ahmadi
Roke huey thi naher ko ummat rasool ki
Sabza haraa tha khushk thi kheti batool ki
(6)
Wo phoolna shafaq ka wo meena-e-laa jurad
Makhmal si wo giyaah wo gul-e-sabz-o-surkh-o-zard
Rakhti thi phoonk kar qadam apna hawa-e-sard
Ye khauf tha ke daaman-e-gul par pade na gard
Dhota tha dil ke daagh chaman laalazaar ka
Sardi jigar ko deta tha sabza kachhaar ka
(7)
Tha bas ke roz-e-qatl-e-shah e aasmaañ janaab
Nikla tha khooñ male huey chehre pe aaftaab
Thi nehr-e-alqama bhi khijaalat se aab aab
Rota tha phoot phootke dariya me har habaab
Pyaasi jo thi sipaah-e-khuda teen raat ki
Saahil se sar patakti thiñ maujein furaat ki
(8)
Tha lashkar-e-yazeed me saamaan-e-qatl-e-shaah
Harsu jama raha tha safein shimr-e-rusiyaah
Kheti ko tahelka tha ye thi kasrat-e-sipaah
Mumkin na tha ke ho guzar-e-taair-e-nigaah
Sab mustaeed the qatl-e-shah-e-kaayenaat par
Toofaan-e-aab-e-tegh utha tha faraat par
(9)
Ek saf me barchiyo ki chamak thi ke alhazar
Lachka rahe the daand sawaaraan-e-kheera-sar
Wo boriyaañ jo sang ke dil me kare guzar
Enaañ wo tod daale jo faulaad ka jigar
Tha ek gala to khanjar-e-be peer ke liye
Wo barchiyaañ thi sab tan-e-shabbir ke liye
(10)
Naavak figan liye huey halqe kamaan ke
Chillaate the ye chhaathiyo ko taan taanke
Dushman hain baadshaah-e-do aalam ki jaan ke
Dum lenge jism-e-shaah ko teero se chhaan ke
Hargiz karenge paas na ahmad ki aal ka
Reti pe khooñ bahaayenge zehra ke laal ka
(11)
Jab bandh chukiñ safein to alam khul gaye tamaam
Gul padgaya ke jung ko niklein shah-e-anaam
Halqe me ahlebait ke rote the yaan imaam
Lipti hui thi qadmo se baanu-e-nek naam
Bikhraaye sar ke baal haram saath saath the
Patke me shaah e deeñ ke sakina ke haath the
(12)
Zainab bilak rahi thi pareshaañ the sar ke baal
Naalayn ka na hosh na chaadar ka tha khayaal
Seena kabood chaak garebaañ shikasta haal
Kehti thi mujhpe rahem kar ay fatima ke laal
Puchega kaun saath chhutega jo aapka
Ne maa ka aasraa hai mujhe ab na baap ka
(13)
Zainab iztiraab pe shah roye zaar zaar
Farmaaya ay bahan teri ulfat ke mai nisaar
Yaad aagaya hussain ko iss waqt maa ka pyaar
Lekin mai kya karun nahi kuch mera ikhtiyaar
Wallaah apne qaul ka har dum khayaal hai
Bheena hussain mukhbir-e-saadiq ka laal hai
(14)
Bachpan me jo zabaañ se kaha hai karenge hum
Khaayenge teer-e-zulm lahu me bharenge hum
Halq apna zer-e-khanjar-e-qaatil dharenge hum
Ummat ke bakshwaane ko pyaase marenge hum
Ab haath uthaao fatima ke noor-e-ayn se
Hogi kabhi na waada khilaafi hussain se
(15)
Ye sunke gir padi jo qadam par wo nauhagar
Lipta liya gale se bahan ko-ba-chashm-e-tar
Rokar kaha ke hota hai tukde mera jigar
Zainab khuda ke waaste peeto na apna sar
Khaasaan-e-haq ka khalq me rutba buland hai
Saabir raho ke sabr khuda ko pasand hai
(16)
Farmaake ye sakina ke muh par nigaah ki
Godi me leliya usay aur dil se aah ki
Boli balaayein leke wo rukhsaar-e-shaah ki
Samjhi mai aakhri hain nigaahein hain chaah ki
Rona ye-be-sabab nahi muh mod modke
Marne chale hain aap mujhe ghar me chhodke
(17)
Maaloom hogaya ke na ab aayiyega aap
Chhaathi pe sone waali ko tadpaayiyega aap
Chhoda agar mujhe to na phir paayiyega aap
Mai apni jaan dungi agar jaayiyega aap
Furqat me mujhko jee se guzarna qubool hai
Acha sidhaaro gar mera marna qubool hai
(18)
Muh choom kar ye kehne lage shaah-e-khush khisaal
Sadqe aqeeq-e-lab pe tere fatima ka laal
Maaloom hai hussain ko bibi tumhaara haal
Kyun kar na roun mai ke qalaq hai mujhe kamaal
Inn barg-e-gul se honto ke sadqe imaam ho
Saula pahar huey hain ke tum tashna kaam ho
(19)
Tadbeer ek nikaali hai aansu na ab bahaao
Hum paani lene jaate hain tum maa ke paas jaao
Sookhi zabaañ dikhaake na shabbir ko rulaao
Bibi dua ke waaste nanhe se haath uthaao
Haq se kaho batool ke jaani pe rahem kar
Yaa rab hamaari tashna dahaani pe rahem kar
(20)
Naachaar shah ki godi se utri wo rashk-e-hoor
Rote huey mahal se baramad huey huzoor
Phaili zameeñ pe raushni-e-aaftaab-e-noor
Padhne lage durood rafeeqaan-e-zee shaoor
Chooma adab se paa-e-imaam-e-anaam ko
Kham hogaye tamaam namaazi salaam ko
(21)
Haq ke wali musaahib-e-sardaar-e-ins-o-jin
Koie jawaan koie mutawassit koie muhsin
Faaqo me baa hawaas ladaayi me mutmain
Kehte hain roz-e-qatl hamein eid ka hai din
Maango dua ke aaj ye marna saeed ho
Qurbaan hoñ hussain pe ran me to eid ho
(22)
Wo gore gore jism qabaayein wo tang tang
Jiski safa ko dekh ke ho aayina bhi dung
Zevar ki tarha jism pe zeba silaah-e-jung
Haraarat ka tha josh ke chehre the laala rang
Kehte the sab chadhaaye huey aasteen ko
Aaqa abhi kahein to ulat dein zameen ko
(23)
The ek taraf azeez-e-shah e aasmaañ wiqaar
Tha jinki chaah me dil-e-yusuf bhi-be-qaraar
Jaañbaaz sarfarosh bahaadur wafa shiyaar
Ek ek raunaq-e-chamanistaan-e-rozgaar
Har channd baagh-e-daher ko kya kya mila nahi
Abtak to iss rawish ka koie gul khilaa nahi
(24)
Khalq-o-muravvat-e-hasani unpe khatm thi
Husn unpe khatm gul badani unpe khatam thi
Zor unpe khatm tegh-e-zani unpe khatam thi
Har maa’rke me saf shikani unpe khatm thi
Ghazi the saf shikan the jari the dilair the
Jisme ali rahe usi beeshe ke sher the
(25)
Unn sab gulo me ek ali akbar sa gul badan
Tha jiski jaama zebi ka shohra chaman chaman
Rukhsaar se baham the jo geysu-e-pur shikan
Hairaañ then sab ke mil gaye kyun kar halab khutan
Surkhi thi lab pe go ke na paani naseeb tha
Dekha jo gaur se to yaman bhi qareeb tha
(26)
Kehte the muskuraake padar se ye dum-ba-dum
Arsa hai kya sawaar hoñ ab qibla-e-umam
Aamaada-e-wiga hain udhar lashkar-e-sitam
Dushman agar bahut hain to hum bhi nahi hain kam
Naa mard barq-e-tegh se jal jaayein to sahi
Dab dabke morcho se nikal jaayein to sahi
(27)
Kehte the ashk bharke imaam-e-falak janaab
Sadqe tere jalaal ke ay mere aaftaab
Do roz se mila nahi mere chaman ko aab
Jee bharke dekh loon ali akbar tera shabaab
Taaqat nahi kaleje me mardo ke daagh ki
Pyaare hamein diya hai bhara apne baagh ki
(28)
Qurbaan-e-ihtishaam-e-alamdaar-e-haq zadoh
Larzaañ the jis jari ke tahavvur se dasht-o-koh
Sardaar safdaro ka dilairo ka sar giroh
Hamza ka dabdaba asadullah ka shikoh
Dil kaanpte the dekh ke tevar dilair ke
Goya sipaah-e-shaam thi panje me sher ke
(29)
Ek sau charaagh mehfil-e-shabbar tha jalwagar
Raushan the jinke chehra-e-anwar se dasht-o-dar
Tera baras ka tha abhi wo gairat-e-qamar
Tan tanke jhoom ta tha magar misl-e-sher-e-nar
Jurrat nisaar hoti thi uss sar farosh par
Shimla chhuta tha sabz amaame ka dosh par
(30)
Talwaar tol tolke dast-e-hinaayi me
Kehte the khooñ bahaayenge hum iss ladaayi me
Haasil tha haath ko yad-e-baiza safaayi me
Akhtar ki zuu dikhaata tha kangna kalaayi me
Saa’ad farogh dete the taare nigaah ko
Dikhlaati thiñ hatheliyaañ aayina maah ko
(31)
The pahelu-e-hussain me zainab ke dono laal
Goya qareen-e-badr the do jism-be-misaal
Kaandho pe neemche nazar aate the do hilaal
Zaahir tha chetno se yadullah ka jalaal
Nau dus baras ka sin tha magar kya dilair the
Bache bhi sher-e-haq ke gharaane ke sher the
(32)
Dono yateem-e-hazrat-e-muslim the kya aqeel
Haazir the baa adab uqab-e-sarwar-e-jaleel
Aapas me kehte the ke padar to huey qateel
Hum koofiyo ko maarenge umrein hain go qaleel
Ghar se talab kiya tha isi etiqaad par
Laanat khuda ki mazhab-e-ibn-e-ziyaad par
(33)
Mehmaañ se ye sulook musaafir se ye dagaa
Ye zulm ek gareeb pe bekas pe ye jafa
Lejaake baam par sar-e-anwar kiya juda
Khandaq me tan ko phenkdiya waa museebata
Aisi kabhi wakeel pe aafat padi nahi
Sunte hain hum ke laash abhi tak gadi nahi
(34)
Iss fauj me yaqeeñ hain ke howe wo rusiyaah
Maara hamaare bhaayiyo ko jisne-be-gunaah
Minnat pe unn gareebo ke mutlaq na ki nigaah
Sar chhote chhote kaat liye sang dil ne aah
Paayein abhi to kushta-e-tegh-e-do dum karein
Hum neemcho se haatho ko uske qalam karein
(35)
Baatein abhi karte the baaham wo gulazaar
Jo sadr e zeeñ pe masdar-e-rehmat hua sawaar
Chadh chadh ke markabo pe chale sab rafeeq-o-yaar
Aage badhe alam liye abbas-e-naamdaar
Phoola hua chaman tha imaam-e-umam ke saath
Tha haashmi jawaano ka guncha alam ke saath
(36)
Allahre faiz jalwa-e-ibne shah-e-najaf
Ran ki zameeñ ko haq ne diya khil’at-e-sharaf
Kis shaan se khade the namaazi jamaaye saf
Bas yak-ba-yak baja duhl-e-jung uss taraf
Geti laraz gayi dil-e-autaad hil gaye
Teer-e-sitam kamaano ke chillo se mil gaye
(37)
Lashkar se tab badha pisar-e-saad channd gaam
Chille me rakh ke teer ye sab se kiya kalaam
Shaahid rahein tamaam dilairaan-e-fauj-e-shaam
Mai pahle phenktaa hoon ye naawak suye imaam
Hai shaq mujhko khalq me jeena hussain ka
Kya shaad hoñ hadaf ho jo seena hussain ka
(38)
Likha hai kaher se wo naawak hataa shareer
Yak baar fauj-e-shah pe chale dus hazaar teer
Be jaañ huey pachaas rafeeqaan-e-be nazeer
Laasho pe unke roye imaam-e-falak sareer
Uftaada khaak o khooñ me wo aahl-e-tameez the
Haan kuch rafeeq baaqi the aur kuch azeez the
(39)
Jis waqt khaatma rufaqa ka hua-ba-khair
The phir to azeez na tha unmein koie gair
Rote hain haal-e-fakhr e sulaimaañ pe khash-o-tair
Karne lage azeez bhi mulk-e-adam ki sair
Maatam hua haram me imaam-e-jaleel ke
Tegho se tukde hogaye pote aqeel ke
(40)
Raahi suye adam huey jisdum wo-be-padar
Nikle wigaa ko zainab-e-zee jaah ke pisar
Maanind-e-sher-e-haq kiye hamle idhar udhar
Katt karatke neemcho se girey sarkasho ke sar
Ultiñ safein jidhar wo dum-e-jung phir pade
Aakhir zameeñ pe barchiyaañ khaa khaake gir pade
(41)
Naagaah ghar me aan ke fizza ne di khabar
Lo kaam aaye zainab-e-naa shaad ke pisar
Ran me gaye hain akbar-o-abbas-e-naamwar
Rote hain bhaanjo ke liye shaah-e-behr-o-bar
Ran se bahen ke beto ko shabbir laayenge
Saf maatami bichhaao ke laashe ab aayenge
(42)
Daude hussain jaanib-e-maqtal-ba-ashk-o-aah
Aankho ke saamne huey-be-dum wo ashk-e-maah
Murdo ko bhaanjo ke uthaa laaye ghar me shaah
Sar peete ahlebait rasool-e-falak panaah
Zainab magar na royi adab se imaam ke
Chup rehgayi kaleje ko haatho se thaam ke
(43)
Baahar imaam legaye laashe uthaake jab
Gairat ka josh aagaya qaasim ki maa ko tab
Mal malke haath kehti thi dil se ke hai ghazab
Hum shakl-e-mustafa kahin marne na jaaye ab
Aulaad apni aaj ke din gar bachaaungi
Mai fatima ko hashr me kya muh dikhaaungi
(44)
Dil me ye sochti huie uthi wo khush khisaal
Qaasim ko apne paas bulaaya basad malaal
Rokar kaha ke ay hasan-e-mujtaba ke laal
Kuch iss zaeef maa ki bhi izzat ka hai khayaal
Jaari hai ashk e khooñ mere chashm-e-pur aab se
Zainab ke aage jaa nahi sakti hijaab se
(45)
Ghar lut raha hai fatima zahera ka haaye haaye
Dushman wo dost hain jo na iss dukh me kaam aaye
Gairo ne yaan hussain ke qadmo pe sar kataaye
Kya qahr hai ke bhaayi ka jaaya na marne jaaye
Ghera hai-be-watan ko adu ki sipaah ne
Muh dekhte ho kya tumhein paala hai shaah ne
(46)
Sab mar chuke imaam-e-do aalam ke aqraba
Baaqi hai kaun akbar-o-abbas ke siwa
Hazrat ke tan ki jaan hai wo dono mahlaqa
Sar unke katt gaye to qayaamat huie bapa
Tum bhi khajil rahoge sada jadd ke saamne
Sharmaayenge hasan bhi mohammad ke saamne
(47)
Jo mard hain wo dete hain mardanagi ki daad
Kuch apne baap ki bhi wasiyyat hai tumko yaad
Jaldi dulhan se milke sidhaaro paye jihaad
Qurbaan ho chacha pe yahi maa ki hai muraad
Byaaha tumhein bar aayi har ek aarzu meri
Ab wo karo ke jisme rahe aabru meri
(48)
Maadar ke muh ko dekh ke bola wo gulazaar
Aise hain hum ke baithe rahein waqt kaarzaar?
Jaanein hazaar hoñ to chacha par karein nisaar
Rukhsat hi wo na dein to hai kya apna ikhtiyaar
Ran me chale the marne ko pahle hi sabse hum
Roka chacha ne keh na sake kuch adab se hum
(49)
Ab bhi agar na denge riza sarwar-e-umam
Rakh lenge tegh khainch ke apne gale pe hum
Amma mazaar-e-kushta-e-sam ki hamein qasam
Ran par qadam hai ab koie dum me suye adam
Kya dakhl hum se aage jo wo shahsawaar hoñ
Abbas ho ke akbar-e-aali waqaar hoñ
(50)
Ye kehke aaye sar ko jhukaaye dulhan ke paas
Aankho me aansu dard kaleje me dil udaas
Farmaaya humko haaye ye shaadi na aayi raas
Sab margaye azeez-e-shahenshaah-e-haq shanaas
Basti tamaam lutgayi wo parwaana hogaya
Shaadi ka ghar jo tha wo aza khaana hogaya
(51)
Kis se kahein jo haal-e-dil dardnaak hai
Talwaar chal rahi hai jigar chaak chaak hai
Iss zindagi pe haif hai duniya pe khaak hai
Ab koie dum me dilbar-e-zehra halaak hai
Aayi tabaahi aal-e-nabi ke jahaaz par
Narga hai shaamiyo ka imaam-e-hijaaz par
(52)
Tum bhi kuch apne baap ki iss dum karo madad
Aafat me aaj hai pisar-e-zaigham-e-samad
Dushman ko bhi khuda na dikhaaye ye roz-e-bad
Sadqe karo hame ke balaa unki hoye rad
Raazi razaa-e-haq me basad aarzu raho
Haidar se hum batool se tum surkhru raho
(53)
Wallah qatl honge jo abbas-e-naamwar
Sadme se toot jaayegi shabbir ki kamar
Akbar khuda na khwaasta maare gaye agar
Mar jaayenge tadapke shahenshaah-e-behr-o-bar
Wo mustaeed hain halq kataane ke waaste
Hum kya chale hain laash uthaane ke waaste?
(54) Socho tumhiñ gala na kataayein to kya karein
Fariyaad-e-fatima ki sadaayein suna karein
Rukhsat karo to fauj-e-sitam se wiga karein
Kholo jo laal lab to guhar hum fida karein
Saahib hamein sipurd uroos-e-ajal karo
Mushkil kusha ki poti ho mushkil ko hal karo
(55)
Ghunghat hataake humko dikhaao to rukh ka noor
Paas ab na aa sakenge ke hote hain tumse door
Aankho pe hain hatheliyaañ riqqat ka hai dafoor
Nargis ka phool haath se malna ye kya zaroor
Jeene ki iss chaman me khushi dil se faut hai
Bulbul jo gul ki shakl na dekhe to maut hai
(56)
Saahib bhala adam ke musaafir se kya hijaab
Hum yun hain jiss tarha ke sar aab ho habaab
Aisi rawa rawi me theherne ki kab hai taab
Kehti hai maut gor ki jaanib chalo shitaab
Rasta hai pur khatar khan waqfa zara na ho
Manzil bahut kadi hai ye jaldi rawana ho
(57)
Ek dum ki bhi hamein to judaayi hai tumse shaaq
Kya kijiye naseeb me tha sadma-e-firaaq
Laayi ajal pakadke garebaan suye iraq
Bolo zabaan se kuch ke na reh jaaye ishtiyaaq
Chupki yuhin rahogi tan-e-paash paash par
Kya bayn bhi karogi na dulha ki laash par
(58)
Jab ye sune kalaam to jee sun suna gaya
Dil par chhuri chali ke jigar thar thara gaya
Muh par dulhan ke saaf randaapa sa chha gaya
Josh-e-buka se kuch na zabaan se kaha gaya
Dulha ko itni baat suna kar ek aah ki
Surat bataate jaao hamaare banaah ki
(59)
Samjhi ke jeete ab nahi phirne ke ran se tum
Pyaasa gala kataake miloge hasan se tum
Soo’ge muh chhupaake lahad me kafan se tum
Acha sulook karte ho saahib dulhan se tum
Ek raat ki bani pe jafa yuhin chaahiye
Ay shamm-e-bazm-e-mehr-o-wafa yuhin chaahiye
(60)
Farmaaya kya karein jo na royein-ba-dard-o-yaas
Ne baap ki na bhaayi ki aur ne chacha ki aas
Mehmaan hain jahaan me koie dum ke haq shanaas
Sonpa tha aapko so rahe aap bhi na paas
Waaris hai kaun phir jo gale sab ke katt gaye
Tum kya karo naseeb hamaare ulat gaye
(61)
Mai kaun hoon bhala jo kahungi ke tum na jaao
Raazi hain maa tumhari to jaao gala kataao
Ghar to ujaad ho chuka jangal ko ab basaao
Nibh jaayega hamaare randaape ka ghum na khaao
Maskan karenge ran me tan-e-paash paash par
Hum bhi faqeer hoyenge saahib ki laash par
(62)
Baatein ye sunke rote the qaasim-ba-haal-e-zaar
Halmin mubaarizi ki sada aayi ek baar
Maa ne kiya ishaara ke ay mere gulazaar
Mauqa nahi hai der ka utho ye maa nisaar
Kya jaane hoga qabr me kya haal baap ka
Jee lag gaya uroos ki baato me aap ka
(63)
Farmaake alwida utha dilbar-e-hasan
Barham huie wo bazm wo sohbat wo anjuman
Gul padgaya ke lutt ti hai ek raat ki dulhan
Iss waqt sab se dulha ki maa ka ye tha sukhan
Jaati hai ab baraat mere naunehaal ki
Rukhsat hai bibiyo zan-e-bewa ke laal ki
(64)
Jaata hai sar kataane ko ran me ye rashk-e-maah
Lo maine doodh bakhsh diya sab rahein gawaah
Duniya me yaadgaar raha hashr tak ye byaah
Do raandein ek jaa ho ye thi marzi-e-ilaah
Samjhe na ab koie ke dulhan ki azeez hoon
Kal tak ki saas aaj se uski kaneez hoon
(65)
Jab khaima-e-hussain se nikla hasan ka laal
Dekha ke dar pe rote hain sarwar basad malaal
Bas gir pada qadam pe ye kehkar wo khush khisaal
Deeje raza-e-harb mujhe behr-e-zuljalaal
Chillaayi maa ke sibt-e-payambar na rokiyo
Shabbar ne di sada ke baraadar na rokiyo
(66)
Liptaake usko chhaathi se bole shah-e-umam
Pyaare tumhaara daagh bhi dil par sahenge hum
Ye pesh-o-pas se manzil-e-hasti me koie dum
Tum aage channd gaam to hum peeche do qadam
Kuch ghum nahi jo raah hai khanjar ki dhaar par
Har dum khuda ka fazl hai iss khaaksaar par
(67)
Ye keh ke dil qalaq se bhar aaya jo ek baar
Roye misaal-e-abr shah-e-aasmaan wiqaar
Tar aansuvo se hogayi reesh-e-khisaab daar
Tasleem karke qaasim-e-gulru hua sawar
Dulha ki noor rukh ki ziyaa charkh tak gayi
Joulaañ kiya faras ko to bijli chamakk gayi
(68)
Pahuncha jo razmgaah me wo gairat-e-qamar
Neza pakadke ghode ko phera idhar udhar
Bole adu ye koie farishta hai ya bashar
Khursheed khaadri ki bhi kheera hai yaan nazar
Allahre chamak rukh-e-pur aab-o-taab ki
Sehra bana hua hai kiran aaftaab ki
(69)
Kyun wasf laal lab me halaavat na paaye lab
Hai madh khwaañ ko qand-e-mukarrar sana-e-lab
Shireeñ labo ke hain lab e shireeñ fida-e-lab
Dekhein ye lab to yusuf-e-misri chhupaaye lab
Tark-e-adab hai iski sanaa iss tareeq se
Dhona zabaañ ko chaahiye aab-e-aqeeq se
(70)
Dandaañ muheet noor ke hain guhar-e-khush aab
Taraaq iss qadar hain ke hai barq ko hijaab
Inn se muqaabla ko nahi akhtaro ko taab
Battees motiyo ki ye sumran hai intekhaab
Hairaañ hain chashm-e-hoor zahoor inka dekh kar
Daana durood padhte hain noor inka dekh kar
(71)
Naagaah rajaz padhne lage qaasim-e-jari
Aalam me kaun hai jo kare humse humsari
Hum haidari hain hum me hai zor-e-ghazanfari
Humse hai auj paaya-e-aurang safdari
Shohra hai harb-o-zarb-e-shah-e-khaas-o-aam ka
Sakta hai shash-jihat me hamaare hi naam ka
(72)
Jadd hai mera ameer-e-arab shanha-e-najaf
Zargaam e deeñ maeeñ rasoolaan-e-maa salaf
Daadi janaab-e-fatima zehra zee sharaf
Ammu hussain saahib-e-loolaak ka khalaf
Mai paara-e-dil-e-hasan-e-khush khisaal hoon
Heere se jo shaheed hua uska laal hoon
(73)
Uska pisar hoon ay sipah-e-misr-o-room-o-shaam
Gulzaar fatima ka hai jo sar-o-sabza faam
Wallah uska lakht-e-jigar hoon mai tashna kaam
Taaboot jiska teero se chhalni hua tamaam
Jaañ uski hoon mai jisko na jaageer-e-jadd mili
Pahelu me mustafa ke na jisko lahad mili
(74)
Naagaah fauj-e-shaam se teer-e-sitam chale
Teer o sinaañ o neza-o-khanjar baham chale
Qaasim bhi yaan se kheench ke tegh do dum chale
Aada pe chhed kar faras khush qadam chale
Paidal to iss qataar ke the kis qataar me
Do do sawaar katt gaye ek ek waar me
(75)
Dhaalein uthiñ ke din shab-e-deehoor hogaya
Laa ma jo barq tegh huie noor hogaya
Hairaañ har ek zaalim-e-maqhoor hogaya
Chehro ka rang khauf se kaafooor hogaya
Aayi hansi ajal ko bhi iss tarha mar gaye
Ghodo pe tan chadhe rahe aur sar utar gaye
(76)
Tha ibne saad shom ko iss dum bahut hiraas
Garq-e-silaah arzaq-e-shaami khada tha paas
Uss se kaha ke fauj nihaayat hai-be-hawaas
Tu jaake lad to qatl ho shaayad ye haq shanaas
Rukta hai barchiyo se na daam-e-kamand se
Jaldi sinaañ pe isko uthaale samand se
(77)
Kehne laga bigadke wo baasad guroor-o-laaf
Tu aap-be-hawaas hai taqseer ho muaaf
Ye amr ay ameer shuja’at ke hain khilaaf
Yaan tab laduñ agar ali aaye paye masaaf
Farq aayega na meri kabhi aan baan me
Ladke se lad ke naam mitaa doon jahaan me
(78)
Darte hain sab jari meri jung-o-jidaal se
Rustam ka zor aage mere kam hai zaal se
Rukti nahi ye tegh tahmatan ki dhaal se
Naadaañ hoon kya laduñ mai jo iss khurd-o-saal se?
Beto ko mere bhej ke chaaro dilair hain
Jung aazma hain soor hain safdar hain sher hain
(79)
Likha hai chaar the pisar-e-arzaq-e-paleed
Dushman to aal-e-paak ke shaitaan ke mureed
Bola ye unko dekh ke wo pairu-e-yazeed
Haan jaake uss yateem ko jaldi karo shaheed
Rulwao qabr me hasan-e-dil malool ko
Bewa banaado dukhtar-e-Sibt-e-rasool ko
(80)
Ye chaand mujtaba ka hai khooñ me isay dubaao
Talwarein maaro zibha karo barchiyaan lagaao
Inaa’m doon ye jung agar fatha karke aao
Sehre samet kaatke dulhe ke sar ko laao
Khil’at milenge jaaoge jisdum salaam ko
Sar uska nazr deeji tumhiñ meer-e-shaam ko
(81)
Nikla ye baat sunte hi unme se ek yal
Peeche chali shareer ke hasti huie ajal
Naara kiya ye gaiz se mozi ne khaake bal
Haan ay hasan ke laal khabardaar ho sanbhal
Kaam aaye kuch to naam-e-shah-e-zulfeqaar le
Pushti pe ho koie to madad ko pukaar le
(82)
Qaasim ye naara zan huey chamkaake raahwaar
Imdaad waqt-e-jung hai shero ko naa gawaar
Kaafi hai bus hamein sipar-e-hifz-e-kirdigaar
Ao kheerasar ajal teri gardan pe hai sawaar
Dushman ko apni zarb tamaacha qaza ka hai
Aa koie waar kar jo iraada wigaa ka hai
(83)
Ye sunte hi kamaañ uthaa kar badha shareer
Chille me teen phaal ka joda shaqi ne teer
Tha bas ke tez dast hasan ka ma-e-muneer
Bijli si aayi koond ke shamsheer-e-be nazeer
Yun qate’ ungliyaañ huieñ uss tera bakht ki
Jaise koie qalam karein shaakhein darakht ki
(84)
Ek haath me girey jo kate dast-e-naabkaar
Bole kamar me rakh ke ye shamsheer-e-aabdaar
Ab dekh mere teer ka tod ao khataa shiyaar
Pakda kamaañ ke qabze ko ye keh ke astwaar
Chillaa jo kheenchne lage sarkash ko taan ke
Rustam ki fauj chhup gayi todooñ me khaak ke
(85)
Chutki se chhoot kar jo chala teer be amaañ
Qurbaan tere haath ke chillaayi ye kamaañ
Bachti hai kab khudang-e-ajal se kisi ki jaañ
Nikla wo teer todke seene ke ustkhwaañ
Ek dum me di shikast khata ko sawaab ne
Gul tha nafas ki teliyaañ todiñ uqaab ne
(86)
Markab se girke margaya jackpot wo adu e deeñ
Nikla udhar se tab pisar-e-saani e laeeñ
Naize ko tolta hua magroor o khashmageeñ
Abru pe bal nigah me qahr aur jabeeñ pe cheeñ
Humraah uske tegh-e-ba kaf sau sawaar the
Aur iss taraf madad ko shah-e-zulfeqaar the
(87)
Naize ka waar karne laga james khud pasand
Bijli sa koond ne laga dulha ka bhi samand
Naiza udaake naize se ki ye sada baland
Kyun tune dekhein naiza-e-mushkil kusha ke band
Ye sunke usne dhaal ko chehre pe ko liya
Putli ko-be-haya ki sinaañ me piro diya
(88)
Bekaar hoke kor hua jab wo kheera sar
Patke me haath daalke patka zameen par
Aawaaz di zameeñ ne ke finnaar-e-wal saqar
Jaa tu bhi hai baraadar ayni tera jidhar
Juz maut kuch shaqi ko na iss dum nazar pada
Aankhein khuliñ to qasr-e-jahannum nazar pada
(89)
Jhapta baraadar-e-suwam uska-ba-karr-o-far
Taane huey wo gurz e garaañ sar ke alhazar
Yaan behr-e-hifz dast-e-yadullah the sipar
Tegh-e-do dum ko sher ne tola bachaake sar
Yun do kiya amood-e-sar-e-naabkaar ko
Jis tarha tegh-e-tez udaa de khayaar ko
(90)
Marte hi uske fauj se chautha pisar badha
Qaasim pukaare ao yal-e-khudsar kidhar badha
Sunte hi ye wo tegh-e-do dum khainch kar badha
Jhunjlaake mujtaba ka bhi lakht-e-jigar badha
Ladta wo kya ke teer-e-ajal ka nishaana tha
Ek haath me na sar tha na baazu na shaana tha
(91)
Be jaañ huey nabard me bete jo uske chaar
Arzaq ka dil hua sifat-e-laala daagh daar
Josh-e-ghazab se surkh huie chashm-e-naabkaar
Misl-e-tanoor muh se nikalne lagi bukhaar
Jeb-e-qaba ko misl-e-kafan phaadta hua
Nikla pare se dev sa changhaadta hua
(92)
Shaane pe thi shaqi ke wo do taank ki kamaañ
Arjan bhi jis se sehem ke goshe me ho nahaañ
Chaar aayina wo pahene tha barme ke al amaañ
Dab jaayein jiske bojh se rustam ke ustkhwaañ
Kehti thi ye ziraah badan-e-badh khisaal me
Pakda hai peel mast ko lohe ke jaal me
(93)
Aamad shaqi ki dekh ke ghabraa gaye imaam
Abbas-e-naamwar se ye rokar kiya kalaam
Lo bhaayi jung ho chuki qissa hua tamaam
Aaya suye yateem-e-hasan mau ka payaam
Humshakl-e-mujtaba ko bulaalo pukaark-e-Maango dua saro se amaame
utaarke
(94)
Ye kehke qibla ru huey sulthaan-e-kaayenaat
Dargaah-e-kibriya me dua ki uthaake haath
Ay khaaliq-e-zameen o zamaañ rabb-e-kaayenaat
Arzaq ke haath se mere qaasim ko de najaat
Tu haafiz e jahaañ hai kareem-o-raheem hai
Ya rab bacha isay ke ye ladka yateem hai
(95)
Fizza pukaari khaime me aakar-ba-chashm-e-tar
Logo tumhein yateem-e-hasan ki bhi hai khabar
Aaya hai ladne arzaq maloon-o-kheera-sar
Kholo saro ko ay haram-e-shaah-e-behr-o-bar
Abbas rote hain ali akbar udas hain
Aisa hai kuch ke sibt-e-nabi-be-hawaas hain
(96)'
Nikla ye sab ke muh se haye haye hasan ka laal
Zainab uthke khol diye apne sar ke baal
Sehne se mil gaya dil-e-baanu-e-khush khisaal
Chillaayi maa guzar gaya kya mera naunehaal
Aabid ka tap me garm badan sard hogaya
Qaasim ke chhote bhaayi ka muh zard hogaya
(97)
Chillaayi roke zauja-e-abbas e naujawaañ
Ya rab hai tu yateem-e-hasan ka nigaahbaañ
Sunkar ye gul dulhan ke bhi aansu huey rawaañ
Lekar balaayein saas pukaari ke al amaañ
Khaaliq karega rahem na aah-o-buka karo
Dulha pe aabni hai mai sadqe dua karo
(98)
Iss iztiraab me jo suna saas ka sukhan
Zaanu se sar uthaake huie qibla ru dulhan
Aahista ki ye arz ke ay rabb-e-zulminan
Dushman pe fathayaab ho lakht-e-dil-e-hasan
Ladne gaye hain tashna dahan teri raah me
Rakh mere ibn-e-am ko tu apni panaah me
(99)
Ya rab dulhan bane mujhe guzri hai ek shab
Dulha jo margaya to mujhe kya kahenge sab
Abtak to sharm se na hilaaye the maine lab
Par kya karun ke ab hai meri rooh par taa’b
Shabbar ke aaftaab ka waqt-e-guroob hai
Dulha se pahle mujhko uthaaye to khoob hai
(100)
Sehre ke phool bhi abhi sukhe nahi hain aah
Jo aagaya payaam randaape ya ilaah
Ye aqd tha ke maatam tha ya ke byaah
Baad inke hoga khalq me kyun kar mera nibaah
Uthu jahaañ se dilbar-e-shabbar ke saamne
Aurat ki maut khoob hai shauhar ke saamne
(101)
Faujein idhar dua ki chaliñ suye aasmaañ
Bal khaake uss taraf ye pukaara wo bad zabaañ
Rustam bhi ho to khinch nahi sakti meri kamaañ
Jaushan ko todta hai mera sher be amaañ
Hai uski fat’ha saath hoon mai jis raees ke
Surma kiya hai dev ko chutki me peeske
(102)
Qaasim ne di sada ke bas ab kar zabaañ ko band
Allah ko guroor-o-takabbur hai naa pasand
Haq ne farotni se kiya humko sar baland
Naize ka band baandhe koie chhed kar samand
Dekhein buland kaun hai aur past kaun hai
Khul jaayega abhi ke zabardast kaun hai
(103)
Kya zor tera aur teri zarb ao zaleel
Taareef apni khud ye safaahat ki hai daleel
Jauhar khud uske khulte hain jo tegh hai aseel
Kaate hamaari tegh ne baazu-e-jibraeel
Jurratme hum kisi ko bhalaa kya samajhte hain
Mazboot jo hain wo tujhe booda samajhte hain
(104)
Ye gurz meel-e-raah-e-saqar hai tere liye
Dast-e-ajal tera ye tabar hai tere liye
Barchi ka phal qazaa ka samar hai tere liye
Kaali balaa teri ye sipar hai tere liye
Zarbat na chal sakegi jo maarenge hum tujhe-Be-aabru karegi ye tegh-e-do
dum tujhe
(105)
Kya hosakega tujhse bhala waqt-e-daar-o-geer
Dastaane dono haatho ke pakde hain ao shareer
Halqa kahiñ kamaañ ka na karle tujhe aseer
Dushman hain sab tere jinhein samjha hua hai teer
Ao tera ru bhala ye sipar kyun lagaaye hai
Aa hosh me ke tujhko siyaahi dabaaye hai
(106)
Go aslaha hai zevar mardaan sar guzaar
Sab harbe chal sakenge bhalaa waqt-e-geer-o-daar
Hai dum me faisla jo khinche tegh-e-aabdaar
Laade huey hai tan pe abas ek khur ka baar
Chhipte nahi hazaar me tevar dilair ke
Ye to hameeñ hain kalb hai burme me sher ke
(107)
Beto ke ghum ne kardiye maqtal tere hawaas
Ghabraa na bhejte hain tujhe bhi unhi ke paas
Faaqa hai hum pe aur hai saula pahar ki pyaas
Aankhein milaake dekh bhala hai khin hiraas
Kam hain jo noor-e-ayn to aankhein churaaye hain
Saabit hua jhilam se ke muh ko chhupaaye hain
(108)
Aage hamaare daawa-e-jurrat khuda ki shaan
Guddi se kheench looñ abhi badhkar teri zabaan
Maghroor ispe hai ke mai ladka hoon naujawaan
Le myaan se ke iska bhi hojaaye imtehaan
Hain khair sheer khwaar janaab-e-ameer ke
Jhoole se phaink dete hain azdar ko cheer ke
(109)
Baara baras ke sin me lade shaah-e-zulfiqaar
Marhab sa pahelwaañ na bacha waqt-e-kaarzaar
Hai dekhneka ye tab-e-tosh aur zabuñ-shiyaar
Gende ki dhaal kaat ti hai tegh-e-aabdaar
Ladko se faujein bhaagi hain muh pher pher ke
Haathi ko maar daala hai bacho ne sher ke
(110)
Qaail kiya jo mushaf-e-naatiq ke laal ne
Tarkar diya usay araq-e-infa’aal ne
Barchha uthaaya haath me uss bad khisaal ne
Chheda faras ko qaasim-e-yusuf jamaal ne
Takne lage safo se jawaañ sab lade huey
Abbas-e-naamdaar qareeb aa khade huey
(111)
Qaasim ne arz ki ke bahut dhoop hai huzoor
Rahiye chacha ke paas ye takleef kya zaroor
Farmaaya sadqe mai teri himmat ke ay gayoor
Dushman ko paas aane na do hum khade hain door
Hoshiyaar-e-jaan-e-am ke dum-e-kaarzaar hai
Jaata hai ab kahan ye tumhaara shikaar hai
(112)
Kyun tegh tol tolke badhte ho baar baar
Beta sipar to haath me lelo chacha nisaar
Sadqe tere hawaas ke ay mere shahsawaar
Haan dono paaun rakhiyo rakaabo me ustwaar
Aane do usko tegh abhi dum bhar thami rahe
Ghoda na bad mizaaj ho peedi jami rahe
(113)
Faaris hai tumsa kaun ta-e-charkh chumbari
Dikhlaa rahe ho saahib-e-duldul ki bagdhari
Sadqe mai ay nahang-e-muheet-e-dilaawari
Dikhlaado zarb-e-tegh-e-jahangeer-e-haidaari
Abru pe bal ho aankho se aankhein ladi rahein
Bhaari ziraa wo pahne hain chooti kadi rahein
(114)
Beta tumhein khuda ne diya hai ali ka zor
Go peel hai ye hum to samajhte hain isko mor
Behraam ki tarah se chala ab miyaan-e-gor
Dekho ke dehekne ka faqat hai ye zor-o-shor
Chalte hain jitne saanp wo daste nahi kabhi
Garje hain jo bahut wo baraste nahi kabhi
(115)'
Sunkar sada-e-sher pukaara wo buzdila
Kya inke saath aap bhi hain aazim-e-wiga
Tyori chadhaake hazrat-e-abbas ne kaha
Bas hai tujhe ye tifl meri ehtiyaaj kya
Kuch tujhse kam nabeera-e-khairul shikan nahi
Do ek se ladein ye hamaara chalan nahi
(116)
Neza jamaake jaanib-e-qaasim badha wo yal
Dulha ne muskuraake sada di sanbhal sanbhal
Ghoda na gir pade tere langar se muh ke bal
Tu hai faras pe aur teri gardan pe hai ajal
Zaigham hain beesha-e-asad-e-zuljalaal ke
Keejo sinaañ ke waar zara dekh bhaal ke
(117)
Ye kehke apne chote se naize ko di takaañ
Chamki ani to barq pukaari ke al amaañ
Ek band baandh kar jo faras se kaha ke haan
Daand aayi daand par to sinaañ se ladi sinaañ
Yal kya kare ke zor hi mozi ka ghat gaya
Gul tha ke azd hai se wo af’ee lipat gaya
(118)
Qaasim ne zor se jo ani par rakhi ani
Bhaaga shaqi ke jism se zor-e-tahmatani
Bigda jo dhang jaan pe zaalim ke aa bani
Thi iss sinaañ ki nok ke heere ki thi kani
Udkar giri zameeñ pe sinaañ iss takaan se
Girta hai jaise teer shahaab aasmaan se
(119)
Jhallaake chob-e-neza ko laaya wo farq par
Qaasim ne daand daand pe maari bachaake sar
Do ungliyo me neza-e-dushman ko thaam kar
Jhatka diya ke jhuk gayi ghode ki bhi kamar
Neza bhi dabke toot gaya naabkaar ka
Do ungliyo se kaam liya zulfeqaar ka
(120)
Nikla wo-be-shaoor ye jhatka uthaake jab
Chille me-be-kamaan kiya ni basad ghazab
Chille me teer jod chuka jab wo-be-adab
Tyori chadhaayi qaasim-e-naushaah ne bhi tab
Teer-e-nigaah se wo khataakaar dar gaya
Kaanpe ye dono haath ke chillaa utar gaya
(121)
Bole ye muskuraake jigar gosha-e-hasan
Rukh pheriyo na ao sitam ijaad-o-peel tan
Chillaaye badhke hazrat-e-abbas saf shikan
Kya tujhko khoob yaad hai teer-afgani ke fan
Dekha hamaare sher ki chitnooñ ki shaan ko
Daawa hai kuch abhi to chadhaale kamaan ko
(122)
Kand-o-gadaaz teer-e-nazar par bhi ki nazar
Zaalim uqaab-e-teer ke bhi udgaye hain par
Shero ko kaat daale hain royein tano ko sar
Haan ab bata sawaab kidhar hai khataa kidhar
Tarkash ko phenkde jo hamiyyat ka josh hai
Chutki se ko ko thaam ke halqa-ba-gosh hai
(123)
Jo samt se chale jo malaamat ke uspe teer
Chillaaya tegh tez alam karke wo shareer
Haan ay hitsan ke laal bad akhshaañ badaah bageer
Nikli chamak ke yaan se bhi tegh e khizaañ nazeer
Chamkaake tegh-e-tez jo qaasim sanbhal gaye
Samjha jo kuch faras ke bhi tewar badal gaye
(124)
Maanind-e-sher gaiz me aaya wo peel tan
Aankhein ubal padiñ sifat-e-aahu-e-khutan
Maare zameeñ pe taap ke larzaañ tamaam ban
Chillaaye sab ke ghode pe bhi lo chadha hai ran
Mekhein zameeñ ki uski tagaapo se hil gayiñ
Dono kanutiyaañ bhi khadi hoke mil gayiñ
(125)
Far far nafas se aati thi nathno se jab sada
Kehte then log sab ke hai raf raf ye baad paa
Dushman ko ghoorta hai dahaana chaba chaba
Gul tha ke bas faras ho to aisa ho baa wafa
Dushman ko kya nabard me bachne ki aas ho
Ladle kataariyaañ ye faras jiske paas ho
(126)
Chal bal dikhaayi fauj ko dauda thamaa utha
Surat banaayi jast ki simta jama uda
Dekhi zameeñ kabhi kabhi suye samaañ uda
Misl-e-samand baadshah-e-innama uda
Jin tha pari tha mohr tha aahu shikaar tha
Goya hawa ke ghode pe ghoda sawaar tha
(127)
Dono taraf se chalne lage waar yak-ba-yak
Do bijliyaañ dikhaane lagiñ ek jaa chamak
Takne lage falak ke dareecho se sab malak
Ek zalzala tha auj-e-sarima se taa samak
Chehra pe aaftaab ke maqtal ki gard thi
Ye khauf tha ke dhoop ki zangat bhi zard thi
(128)
Har baar jaabneen se hote the waar rad
Tha harb-o-zarb me wo shaqi bhi balaa-e-bad
Jab badhke waar kartta tha wo baani-e-hasad
Kehta tha baazu-e-shah e deeñ ya ali madad
Yun rokte the dhaal pe tegh-e-habool ko
Jis tarha rokle koie shay zor phool ko
(129)
Laaya jo harf-e-sakht zabaañ par wo bad khisaal
Jhapta misaal-e-sher-e-darinda hasan ka laal
Ghode se bas mila diya ghoda basad jalaal
Itne badhe ke lad gayi uski sipar se dhaal
Aojhad lagi ke hosh udey khud pasand ke
Ghode ne paaun rakh diye sar par samand ke
(130)
Abbas-e-naamdaar ne pahelu se di sada
Haan ab na jaane deejiyo ahsant marhaba
Dushman ke maar daalne ki bas yahi hai jaa
Sunte hi ye faras se faras ko kiya judaa
Ghoda bhi uss taraf ko udhar hoke phir pada
Maara kamar pe haath ke do hoke gir pada
(131)
Ghazi ne di sada ke wo maara zaleel ko
Bache ne aaj past kiya mast peel ko
Kya munhedam kiya rah e isiyaañ ke seel ko
Logo suno gira diya harf-e-saqeel ko
Do hogayi kamar nahi tasma laga hua
Dekha to aake laash ke tukde ye kya hua
(132)
Qaasim se phir kaha ke mubarak tumhein zafar
Tasleem ki adab se chacha ko jhukaake sar
Aur arz ki ye door se haatho ko jod kar
Iqbaal aapka ke fahm hogayi ye sar
Pushti pe aap jab hoñ to phir kya hiraas ho
Kaam aaye kyun raas-e-jo ustaad paas ho
(133)
Farmaaya jaan-e-um ye bashar tha ke devzaad
Dhaaya hai tumne kufr ka ghar khaana-e-inaad
Aao ke tumpe phoonk dein padhkar wa an yaqaad
Chillaayi dar se maa na buraayi meri muraad
Bewa ka laal bach gaya sadqe hussain par
Aspand koie karde mere noor-e-ayn par
(134)
Abbas-e-naamdaar to hanste chale udhar
Yaani khushi ki jaake shah e deeñ ko dooñ khabar
Iss ghum kade ke daher ke shaadi kahan magar
Yaan iss bane pe toot pade laakh ahle shar
Laakho se ladke pyaas se majboor hogaye
Harbe hazaar haa jo chale choor hogaye
(135)
Kyunkar tamaam fauj se ye tashna lab lade
Ek ek lada na aah baham hoke sab lade
Kha khaake zakhm misl-e-ameer-e-arab lade
Jaañbaaziyaañ ghazab ki dikhaayiñ ghazab lade
Jalwa mayaan-e-tashna dahaani dikha diya
Bachpan me lad ke zor-e-jawaani dikha diya
(136)
Lalkaara jisne bas wahiñ ghoda dapat ke aaye
Yun aaye jaise sher-e-darinda jhapat ke aaye
Bijli giri udhar ye jidhar ko palat ke aaye
Saf ko bichhaake aaye pare ko palat ke aaye
Muh surkh tha khule huey the zakhm seene ke
Bankar lahu tapakte the qatre paseene ke
(137)
Kaate risaale tegh se kaar-e-qalam liya
Dast e yameeñ ne jung me aaraam kam liya
Phir dast-e-chup me tegh-o-sipar ko baham liya
Tevraaye sanbhlee muh se lahu daal dum liya
Yaan band hoke aankh khuli jitni der me
Sau teer dil ko tod gaye utni der me
(138)
Aakhir gira sipaah me wo chaudhvi ka maah
Roke thi fauj teero se aur barchiyo se raah
Lashkar ke saath tha pisar-e-saad rusiyaah
Talwaar chal rahi thi ke allah ki panaah
Gul tha ke rond daala hai lashkar ke baagh ko
Haan ghaaziyo bujhaado hasan ke charaagh ko
(139)
Teghein chadhaayi thiñ jo laeeno ne saan par
Padti thiñ wo qareeb se sab na tawaan par
Teero pe teer the to kamaanein kamaan par
Hamla tamaam fauj ka tha ek jaan par
Yun barchiyaañ thiñ chaaro taraf uss janaab ke
Jaise kiran nikalti hai gird aaftaab ke
(140)
Ghash me jhuka faras pe jo wo gairat-e-qamar
Maara kisi ne farq pe ek gurz kaapsaar
Barchi lagi jo seene pe tukde hua jigar
Girte the asp se ke kamar par laga tabar
Taariq ki tegh khaake pukaare imaam ko
Fariyaad ya hussain bachaao ghulaam ko
(141)
Sunte hi isteghaasa-o-imdaad ki sada
Daude hussain jaanib-e-maqtal barehna paa
Ghabraake bole hazrat-e-abbas-e-bawafa
Talwaar kispe chal gayi haye haye hua ye kya
Chillaayi maa arey meri basti ujad gayi
Ay bhaayi daudo banke ladaayi bigad gayi
(142)
Jhapte wo shaah fauj pe chamkaake zulfeqaar
Bijli giri yazeed ke lashkar pe ek baar
Iss gaiz me yameeñ se jo aaye suye yasaar
Bhaage phiraake ghodo ki baago ko sab sawaar
Bhaagad me khooñ se ran ki zameeñ laal hogayi
Dulha ki laash ghodo se paamaal hogayi
(143)
Dekha imaam ne ke ragadte hain yediyaañ
Sookhe huey labo pe hai aynti huie zabaañ
Daamaad se lipat gaye hazrat basad fugaañ
Be jaañ hua hussain ke aage wo neem jaañ
Jab laash uthaayi shah ne to choor ustkhwaan the
Sab chaand se badan pe sumo ke nishaan the
(144)
Dyodhi pe laash laaye jo sulthaan-e-behr-o-bar
Parda uthaaya dyodhi ka fizza ne daudkar
Laashe ke paaun thaame tha koie to koie sar
Chaadar kamar ki thaame the abbas naamwar
Latki thiñ dono khaak me zulfein ati huiñ
Rukh par padi thiñ sehre ki ladiyaañ kati huiñ
(145)
Laasha idhar se leke chale shaah-e-karbala
Daude udhar se peet te naamoos-e-mustafa
Fizza thi aage aage khule sar barehna paa
Aayi jo sehn me to ye raando ko di sada
Chhupjaaye jis se door ka naata ho saahibo
Dulha dulhan ke lene ko aata hai saahibo
(146)
Behnein kidhar hain daalne aanchal bani pe aayein
Ab der kya hai hujre se baahar dulhan ko laayein
Rukhsat ho jald taake baraati bhi chayn paayein
Jaage hain saari raat ke apne gharo ko jaayein
Dil par sahe firaaq ki shamsheer-e-tez ko
Maa se kaho dulhan ki nikaale jahez ko
(147)
Naagaah laash sehn tak aayi lahu me tar
Peete jo sab uroos ko bhi hogayi khabar
Tha saamna ke laash pe bhi jaa padi nazar
Ghabraake tab sakina se boli wo nauhagar
Dulha ki laash aayi hai sehre ko tod do
Masnad ulat do hujre ke parde ko chhod do
(148)
Ye kehje nochne lagi sahera wo sogwaar
Afshaañ chadhake khaak mali muh pe chandd baar
Kehne lagi lipat ke sakina jigar figaar
Haye haye bahan badhaao na sahere ko mai nisaar
Wo kehti thi ke jaag ke taqdeer sogayi
Bibi na pakdo haath ke mai raand hogayi
(149)
Ye kehke ghash huie jo qalaq se wo nauhagar
Hujre se daudi baali sakina barehna sar
Aakar qareeb-e-sehn pukaari-ba-chashm-e-tar
Ay bibiyo kisi ko dulhan ki bhi hai khabar
Kaisi ghadi hai haaye ye amma kidhar gayiñ
Daudo phupi jahaan se kubra guzar gayiñ
(150)
Rokar bahan se kehne lage shaah-e-behr-o-bar
Uss-be-naseeb raand ko le aao laash par
Beti lutegu iski hamein thi na kuch khabar
Ab sharm kya hai dekhle dulha ko ek nazar
Zakhmi bhi hai shaheed bhi hai-be-padar bhi hai
Dulha hai naam ko bhi chacha ka pisar bhi hai
(151)
Hazrat ye kehke hatt gaye baa chashm ashkbaar
Peeti ye sar ke ghash huie baanu-e-dilfigaar
Chaadar sufaid udhaake dulhan ko-ba-haal-e-zaar
Godi me laayiñ zainab e ghumgeeñ wo sogwaar
Chillaayi maa ye girke tan-e-paash paash par
Qaasim bane utho dulhan aayi hai laash par
(152)
Sadqe gayi chachi ko na howe kaiñ malaal
Rakho dulhan ki peeth pe haath ay hasan ke laal
Waari bas ab utho ke pareshaañ hai mera haal
Kaisa ye khwaab hai ke dulhan ka nahi khayaal
Karwat to lo ke maa ke jigar ko qaraar ho
Ye bachpane ki neend pe amma nisaar ho
(153)
Jisdum dulhan ne laash ke tukdo pe ki nigaah
Nikli lahu me doobi huie ek jigar se aah
Qadmo pe sar jhukaake pukaari wo rashk-e-maah
Mera qusoor azu ho ay mere baadshaah
Boli na thi hijaab se taqseer waar hoon
Ab hukm ho to laash pe uthkar nisaar hoon
(154)
Ay paara-e-dil-e-hasan ay fidya-e-hussain
Kal wo khushi thi aaj ye barpa hai shor-o-shayn
Kya kehke rouñ uth gaya ab to jahaañ se chayn
Bewa koie sikhaaye to saahib karuñ mai bayn
Chhodo dulhan ki laash pe rone ke waaste
Dulha bane the qabr me sone ke waaste
(155)
Saahib bataa to do tumhein rone me kya kahuñ
Bekas kahun ke fidya-e-raah-e-khuda kahun
Pyaasa kahun shaheed kahun ya banaa kahun
Dulha kahun ke qaasim e gulguñ khaba kahun
Maatam bhi yun to hota hai shaadi bhi hoti hai
Ek shab ki raand dulha ko kya kehke roti hai
(156)
Kyun rone waalo sunte ho aawaaz-e-shor-o-shayn
Iss bazm-e-paak me hain nahaañ nauhagar hussain
Minbar ke paas fatima roti hain karke bayn
Maatam karo ke margaya hazrat ka noor-e-ayn
Shabbar ko bhi qalaq hai shah-e-be watan ko bhi
Pursa do tum hussain ko bhi aur hasan ko bhi
(157)
Likhe anees maine-ba-sur’at ye channd band
Lejaaye shauq se jisey mazmooñ ho jo pasand
Ek jaa sheer-o-shakkar-o-shahed-o-nabaat-o-qand
Uske karam se hoga ye dariya kabhi na band
Nehrein rawaañ hain faiz-e-shah-e-mashraqain ki
Pyaaso piyo sabeel hai nazr-e-hussain ki